Футбол • 02 Қыркүйек, 2019

«Астана» «Олд Траффордта» ойнайды

43 рет көрсетілді

Елорданың «Астана» командасы бесінші жыл қатарынан Еуродода ойындарының топтық кезеңіне шықты. Еуропа лигасының плей-офф кезеңінде Беларусьтың БАТЭ командасымен кездескен жерлестеріміз өз алаңында 3:0 есебімен жеңіске жеткенімен, сырт алаңда 0:2 нәтижесімен есе жі­берді. Бірақ қос ойынның қорытындысы бо­йынша 3:2 есебімен топтық кезеңге жолдама алды.

Матч басталардан бір сағат бұрын екі команданың құрамы қолымызға тигенде қандай да бір өзгеріс бар-жоғын білу үшін бірден өткен ойынмен салыстырдық. Сөйтсек екі команданың да бас бапкерлері негізгі құрамға аздаған өзгеріс жасаған екен. Елордада өткен матчта бірінші минуттан бастап алаңға шыққан Фирмин Мубеленің орнына негізгі құрамда Роман Муртазаев шықты. Ал БАТЭ сапынан Эрвен Мукам мен Слободан Симовичтің орнына Борис Копитович пен Антон Сарока алғашқы минуттан жасыл алаңда өнер көрсетті.

Кездесудің алғашқы бес минуты тең дәрежеде басталғанымен, алтыншы минутта алаң иелері жылдам гол соғуға мүмкіндік алды. Гол авторы – Максим Скавыш. Жанкүйерлердің қызу қолдауына ие болған БАТЭ футболшылары алға қарай лап қойды. Дегенмен «Астана» ойыншылары жылдам өздеріне келіп, үш минутта екі бірдей қауіпті ша­буыл ұйымдастырып үлгерді. Бірақ еш­қайсысы нәтиже берген жоқ. Сон­дай-ақ жерлестеріміз алғашқы 15 минут ішінде БАТЭ қақпасына екі бірдей бұрыштама добын орын­дағанымен, қарсылас коман­даның қорғаушылары қырағылық танытып, допты өз айып алаңынан алып шыға білді. Әрі қарай ойын екі команданың алма-кезек шабуы­лымен өрбіді. Кездесудің 21-минутында Марин Томасов БАТЭ-нің екі бірдей қорғаушысын оңай алдап өтіп, қақпаға бағыттаған соққысы қиыс кетсе, 35-минутта алаң иелері ойыншысының алыстан шірене тепкен добы Эрич қорғаған қақпаның дәл жанынан өтті. Арада бір минут өтер-өтпестен «Астана» қорғаушысы Лука Шимунович өз айып алаңында қателесіп, қарсылас ойыншысының соққы жасауына мүмкіндік беріп қойды. Алайда Эрич өз орнынан табыла білді. Бірінші таймның соңғы минуттарында БАТЭ футболшылары біздің қақпамыздың алдын торуылдап, үзіліске дейін екінші голын соғуға ұмтылды. Абырой болғанда қорғаушыларымыз сәтті қорғанып, қауіптің бетін қайтарды.

Алғашқы тайм БАТЭ-нің аз­даған басымдығымен өткенімен, «Ас­тананы» нашар ойнады деп айта алмаймыз. Дорин Ротариу мен Марин Томасов қос қапталдан қар­сыластарды қыспаққа алып, қауіпті шабуыл ұйымдастырды. Сон­дай-ақ Эричтің қырағылығын да айта кеткен жөн. Үш бірдей гол соға­тын 100 пайыздық шабуылдың бетін қайтарып, қақпасын голдан аман сақтап қалды. Осылайша, кез­де­судің алғашқы таймы 0:1 есебімен БАТЭ-нің пайдасына аяқталды.

Кездесудің екінші бөлігін БАТЭ футболшылары белсенді бастап, ә дегеннен-ақ шабуылға кірісті. Дегенмен «Астана» ойыншылары да қарап қалған жоқ. Қарсыластың әрбір шабуылына шабуылмен, соққысына соққымен жауап беріп отырды.

Матчтағы қызық жағдай ойынның 52-минутында орын алды. Стадионға жи­налған 20 мыңға жуық жанкүйер бір мезетте орнынан тұрып, 2-3 минут бойы шапалақ соқты. Мұның сырын белоруссиялық әріптестерімізден сұрағанда, БАТЭ-нің 1996-2018 жылғы басшысы Анатолий Кап­ский былтыр 52 жасында қай­тыс болған екен. Осылайша, жан­күйерлер ойынның 52-минутында Капскийді еске алып, рухына тағзым білдірді.

Матчтың 55-минутынан бас­тап алаң иелері ойынды толық өз бақылауларына алды. Біздің ойыншылар қорғанысқа мән беріп, тек қарсы шабуылға иек артуға мәжбүр болды. Бәлкім, үзілісте Григорчук футболшыларға қорғанысты мықтап ұстауға тапсырма берген болар. Өйткені «Астанаға» гол соққаннан гөрі, қақпаға гол өткізіп алмау маңызды еді.

Дүркін-дүркін шабуылдың өз жемісін берер сәті болады ғой. 65-минутта сондай сәттердің бірінде алғашқы голдың авторы Максим Скавыш қақпамызға екін­ші голын соққан болатын. Абырой болғанда қапталдағы төреші жа­лаушасын көтеріп, доп ойыннан тыс жағдайда соғылғанын білдірді. Есеп өзгерусіз қалды. Кездесудің 70-минутында Роман Григорчук ойындағы алғашқы өзгерісті жасады. Алаңда шабуылшы қызметін атқарған Роман Мұртазаевтың орнына Рангело Янганы шығарды. Матч алдындағы баспасөз жиынында гол соғуға тырысамын деген шабуылшы алғашқы мүмкіндігінде мүлт кетті. Тіпті, доп тоқтатуда қателесіп, допты қарсылас команда ойыншысының аяғына салып берді.

Қателікті кешірмейтін БАТЭ ойыншылары матчтың 85-минутында «Астана» қақпасына екінші голын соқты. Бұл жолы мергендігімен Евгений Яблонский көзге түсті. Жанкүйерлердің қызу қолдауына ие болып, голдан рухтанған алаң иелері «Астана» қақпасына шабуылды бір сәтке де тоқтатқан жоқ. Қақпамызға екінші гол соғылғаннан кейін Григорчук алаңға екі бірдей қорғаушыны шығарды. Жарко Томашевич пен Абзал Бейсебеков команданың қорғанысын қымтап тастады. Футболшылар қақпамызға гол өткізбей, әрең дегенде таблодағы көрсеткішті сақтап қалды. Осы­лайша «Астана» сырт алаңда же­ңілсе де, топтық кезеңге жолдама алды.

Жұма күні Монакода Еуропа лигасының 2019-2020 жылғы топ­тық кезеңінің жеребе тарту рәсімі өтті. Жеребе қорытындысы бойын­ша Қазақстанның бес дүркін чемпионы ағылшынның азулы «Манчестер Юнайтед», Сербияның «Партизан» және Голландияның «Алкмаар» командаларымен бір топқа түсті. «Астана» L тобындағы алғашқы ойынын сырт алаңда «Манчестер Юнайтедке» қарсы өткізетін болды.

«Астана» клубының бас бап­кері Роман Григорчук пен коман­да капитаны Ненад Эрич Еуропа ли­гасының жеребесі туралы пікір білдірді. «Мен жеребеге сал­мақ­ты қараймын, өйткені оны ешк­ім өзгерте алмайды. Бұл топты өте қызықты деп сипаттауға болады. Әрине, алда «Манчестер Юнай­тед­пен» қызықты ойын күтіп тұр. «Олд Траффордта» болып, олар­­мен бір алаңда ойнаудың өзі бар­лы­ғымыз үшін үлкен оқиға. Сол себепті өте қызық болады», дейді Роман Григорчук.

Ал Ненад Эрич «Партизанға» қарсы өтетін ойын өзі үшін қызық­ты болатынын айтады. «Өте қы­зық­ты топқа тап болдық. Үш қарсы­ла­сымыз да орналасқан себеттеріне қара­мастан ТОП команда болып есеп­теледі. «Манчестер Юнай­тедті» таныстырудың өзі ар­тық. «Партизан» Сербия чемпио­на­тын­дағы екі үздік команданың бірі. Сер­бияда туып-өскен мен үшін Бел­град командасына қарсы ой­нау қызықты болмақ. Топт­а­ғы соңғы қарсыласымыз – «Алк­маар» Еуропадағы ең мықты чемпио­нат­тардың бірі ретінде саналатын Нидерландияның үздік командасы. Сондықтан Еурододаның күзгі маусымында бізді тартысты әрі қызықты ойын күтуде. Біз өз кезегімізде жақсы нәтиже үшін ойнап, өзіміздің жоғары деңгейдегі ойынымызды көрсетеміз дегім келеді».

Айта кетейік, елорда командасы аталған командалармен Еуродода ойындарында бірінші рет кездескелі тұр.

Әли БИТӨРЕ,

«Egemen Qazaqstan» – Борисовтен (Беларусь)

Соңғы жаңалықтар

Алматыда троллейбус өртенді

Оқиға • 24 Маусым, 2022

ТүркПА-ның атауы өзгереді

Парламент • 24 Маусым, 2022

Ұқсас жаңалықтар