Футбол • 11 Қыркүйек, 2019

Соңғы минут синдромы тағы қайталанды

Футболдан Қазақстан ұлттық құрамасы 2020 жылғы Еуропа чемпионатының іріктеу кезеңіндегі кезекті ойынын өткізді. Сырт алаңда Ресей құрамасымен кездескен жерлестеріміз соңғы минутта өз қақпасына гол өткізіп алып, 0:1 есебімен жеңіліп қалды. Сөйтіп, соңғы минут синдромы тағы да қайталанды. Дегенмен, Қазақстан құрамасының кешегі ойыны жанкүйерлердің көңілінен шықты.

Әли БИТӨРЕ

Еуро-2020 турнирі аясындағы Ресей мен Қазақстан матч алдында футбол мамандары қос құрама арасындағы алғашқы ойындағы нәтижені ескеріп және ресейліктердің соңғы ойындағы көрсеткіштеріне қарап, бұл жолы да Ресей құрамасы Қазақстанды қалпақпен ұрып алады деп болжаған болатын. Алайда Михал Билек шәкірттері мамандардың сәуегейлігін жоққа шығарып, оңайлықпен берілмейтінін аңғартты. Бас бапкер Михал Билек Ресейге қарсы жас әрі тың футболшыларды бірінші минуттан бастап алаңға шығарды.

Жалпы, чехиялық маман соңғы екі ойыннан бері шабуылға қарағанда, қорғанысқа көп көңіл бөліп келеді. Кипр және Ресей құрамасына қарсы өткен ойында алаңға бес қорғаушыны шығарды. Сондықтан Қазақстан құрамасы әдеттегідей қорғанысқа көбірек көңіл бөліп, қарымта шабуылға иек артты. Жалпы, бас бапкердің көксегені де тең ойын болатын. Бірақ бұл ойы жүзеге аспай қалды. Матч бойы үздіксіз шабуылдаған Ресей футболшылары тек ойынның 89-минутында ғана Қазақстан құрамасының қақпасынан саңылау тапты. Александр Головиннің сол қапталдан көтерген добына бірінші болып жеткен ресейлік футболшы Марио Фернандес баспен гол соғып кетті. Қақпашы Непогодов доптың бағытын тапқанымен, қақпаны голдан аман сақтап қала алмады. Осылайша Ресей құрамасы өз алаңында 1:0 есебімен әрең жеңіске жетті.

Матчтан кейінгі баспасөз мәслихатында Қазақстан құрамасының бас бапкері Михал Билек кешегі ойында бір ұпай алуымыз керек еді деді. Сондай-ақ ол ұлттық құрамада алғашқы ойынын өткізген жас футболшы Айбол Әбікеннің өнерін жоғары бағалады. «Қарсыластың деңгейін алдын ала ұғынып, көп қорғануға тура келетінін түсіндік. Сол себепті қорғаныс жүйесін түзуге күш жұмсадық. Жоспар бойынша ойнадық, сол себепті біздің қақпаның алдында қауіпті сәттер болмады. Бір стандарттан ғана жеңіліп қалдық. Ойыншылар соңына дейін күрескен еді. Бір ұпайға лайық болатын. Өткен ойында көп күш сарқыдық. Сол себепті өзгерістерге жүгінуге тура келді. Негізгі құрамда шыққан ойыншылардың барлығы жақсы ойнады. Айбол Әбікен ұлттық құрамадағы алғашқы ойынын мықты қарсыласқа қарсы лайықты өткізді. Қалған жігіттер де жарап тұр», деді бас бапкер.

Енді Қазақстан құрамасы 10 қазан күні «Астана Аренада» Кипр құрамасын қабылдайды.

Күннің маңызды және өзекті жаңалықтарын «Егемен Қазақстан» телеграм каналынан оқыңыз