– Жолдау Елбасы ұсынған бес институционалдық реформа мен Ұлт жоспарын толыққанды жүзеге асыруға бағдарланған. Онда еліміздің қоғамдық-саяси өміріндегі жаңғыртулар, қарқынды дамыған экономика қалыптастыру, тұрғындардың сапалы өмір сүру көрсеткішін, әлеуметтік жағдайын нығайту, ауылдық жерлерде жаңа жұмыс орындарын ашу, шағын және орта бизнесті дамыту, тағы басқа іргелі мәселелер бойынша Үкімет пен жергілікті билік органдарына нақты тапсырмалар жүктелді. Біз осындай ауқымды міндеттерді орындаудың тетіктерін қарастырып, әр бағыт бойынша талдау жасауға жиналып отырмыз, дей келіп, Құмар Іргебайұлы өңірде бірінші кезекте қандай салаларға басымдық берілетінін атап өтті.
Президент тапсырмасына сәйкес еңбек өнімділігінің нақты өсімін кем дегенде 1,7 есе өсіру талабы тұр. Петропавл ауыр машина жасау, Киров атындағы зауыттарда енгізілген озық технологиялар есебінен еңбек өнімділігін 2,5 есеге өсіруге мүмкіндік туды. Баспа платаларын шығаратын кәсіпорынға жүзден астам заманауи қондырғылар әкелінді. «РимКазАгро» ЖШС-інде 1,2 мың тонна өнім өндіретін фабрика пайдалануға берілді. Металлургиялық компаниялар алтын өндірісін 40 пайызға ұлғайтты. Шикізатқа байланған менталитеттен бас тартып, экономиканы әртараптандыру міндеттері үдесінен көріну үшін индустриялық-инновациялық даму бағдарламасы шеңберінде 36,9 млрд теңгенің 41 жобасы жүзеге асырылады. 1,5 мың жаңа жұмыс орындары құрылады.
Өңірде кәсіпкерлікті дамытудың үлгі боларлық мысалдары аз емес. Бүгінде 30 мыңнан астам шағын және орта кәсіпкерлік субьектілері жұмыс істейді. Микро және шағын бизнес саласындағы компанияларды табысқа салынатын салықтан үш жылға босату үшін заңнамалық базаға түзетулер енгізіліп, 2020 жылдан бастап күшіне енетіні, сондай-ақ тексеріс жүргізуге осынша мерзімге тыйым салынатыны бұл саладағы кедергілер мен ауыртпалықты айтарлықтай азайтары анық. Қ.Ақсақалов Жолдауда негізгі ресурсымыз болып табылатын ауыл шаруашылығының әлеуеті толық пайдаланылмай отырғаны атап көрсетілгеніне, жер мәселесі ерекше сөз болғанына жиналғандардың назарын аударды. Жүргізілген тексерістердің нәтижесінде соңғы төрт жылда 668 мың гектар жер мемлекет меншігіне алынды. Ауылшаруашылық алқаптарын жалға алушылар арасында жерді игермей, босқа ұстап отырғандар әлі де кездеседі. Алдағы уақытта оларға қатаң шаралар қолданамыз, – деді өңір басшысы.
«Ауыл – ел бесігі» жобасы аясында 292 елді мекеннің инфрақұрылымдары дамытылады. Аз қамтылған, тұрмысы төмен жандарға жан-жақты қамқорлық көрсетіледі. Бүгінде жәрдемақы мөлшері 10 есеге артып, жыл басынан бері 21,7 мың отбасы 1,3 млрд теңгенің әлеуметтік көмегін алды. 799 адам мен 125 отбасына бір реттік әлеуметтік жәрдемақы берілді. Басқосуда құрылыс индустриясын жетілдіру, еңбек ресурстары тапшылығын азайту, ауыз су, жол жайын жақсарту, медициналық қызметтің сапасын, қолжетімділігін арттыру мәселелері бойынша аудан әкімдері мен тиісті ведомстволарға бірқатар тапсырмалар жүктеді.
Жиында «Ақселеу» ЖШС-нің басшысы Серік Малаев, «MATEX» шұлық фабрикасының директоры Арамаис Тер-Аствацатурян, Н.Погодин атындағы орыс драма театрының жетекшісі Спартак Рамазанов, Петропавл қалалық мәслихатының депутаты Павел Афанасьев, тағы басқалары ой-пікірлерін ортаға салды.
Солтүстік Қазақстан облысы
