Дөңгелек үстелге бокстан әлем чемпионы Мерей Ақшалов пен жасөспірімдер Олимпиадасының чемпионы Айбек Оралбай, таэквондодан Астана қалалық федерациясының басшысы әрі ел тарихындағы жалғыз Олимпиада жүлдесінің иегері Арман Шылманов және тағы басқа бірқатар жергілікті федерацияның басшылары қатысып, өздерінің ұсыныс-пікірлерін білдірді.
Мәселен, Мерей Ақшалов тұрғын үйлердің аулаларына спорт ғимаратын салып, балалар тек жазда ғана емес, қыста да спортпен айналысуға тамаша мүмкіндік болар еді дейді. Ал Арман Шылманов бүгінгі күнге дейін қалада таэквондо федерациясының ғимараты жоқ екенін алға тартып, әкімдік жер бөліп берсе өздері инвестиция тартып ғимарат салуға дайын екендіктерін жеткізді. «Алатау» спорт сарайына жүзуге баратын спортшылардың айтуынша, аталған кешенде душтың өзі жұмыс істемей қалады екен. Сондай-ақ мүгедек спортшылар үшін жағдай жасалмаған, лифт істемейді. Ал «Барыс Аренадағы» жүзу бассейнінің бағасы қымбат.
Жиын барысында осы және бұдан да басқа бірқатар мәселелер көтерілді. Қала әкімі өз кезегінде елорданың спортын дамыту үшін барлық жағдайды жасайтынын және жоғарыда айтылған мәселелерді мейлінше шешуге тырысатынын жеткізді. «Бүгін көтерілген мәселелер бойынша жүйелі жұмыстар жүргізіліп, шешімдер қабылданатын болады. Нұр-Сұлтан еліміздің бас қаласы болғандықтан қай салада болсын алдыңғы қатардан көрінуі тиіс деп ойлаймын. Бұл ретте спорт саласының алар орны айрықша екені сөзсіз. Біз әкімдік тарапынан жан-жақты қолдау білдіруге дайынбыз. Бүгін сіздерден 16 ұсыныс-өтінішті естідім. Барлық жағдайды егжей-тегжейлі қарайтын боламыз», деп түйіндеді спорт өкілдерімен өткен кездесуді Алтай Көлгінов.
