Екі команда арасындағы кездесудің бірінші кезеңі тең есепте аяқталды. Шабуылшылар есепті ашуға қанша тырысқанымен, қорғаушылар мен қақпашылар сәтті өнер көрсетті. Дегенмен екінші кезеңнің екінші минутында алаң иелері «Барыс» қақпасына шайба соғып, есепте алға шығып алды. Шайба авторы – Игорь Руденков. Арада алты минут өткенде Роман Старченко мергендігімен көзге түсіп, есепті теңестірді.
Кездесудің үшінші кезеңі өте тартысты басталды. Өйткені жеңіс екі командаға да ауадай қажет болатын. «Барыс» бұған дейінгі төрт ойынның екеуінде жеңіске жетсе, «Амур» барлық кездесуде жеңіліс тапқан. Алаң иелері бұл жолы да жеңілістен құтыла алмады. Матчтың 56-минутында Эрик Тангрэйди «Барысты» есепте алға шығарса, 59-минутта Никита Михайлис ойындағы соңғы әрі командасының жеңіс шайбасын соқты.
Бесінші турдан кейін «Барыс» турнир кестесінде алты ұпаймен бесінші орында келеді. Жерлестеріміз келесі кездесуін бүгін Владивостоктың «Адмирал» клубымен өткізеді.
