«Жібек жолы – диалог жолы» халықаралық экспедициясы 20 тамызда Алматы қаласынан бастау алып, 1 қыркүйекте Алматыда мәресіне жеткен. Осы аралықта экспедицияға қатысушылар Қазақстан, Қырғыз Республикасы, Өзбекстанда келесі бағыттар бойынша жол жүріп өткен. Қатысушылардың ерекше саяхаты Алматы облысының көрікті жерлері Үлкен Алматы көлі, Медеу, Шымбұлақ, Шарын шатқалдарынан басталған. Одан әрі «Тянь-Шаньның көк маржандары» аталып кеткен Көлсай көлдеріне қарай жол тартты. Үшінші күні Қырғыз Республикасына асып, үш күн бойы қатысушылар Ыстықкөлдің әкімшілік орталығы және Қарақол қаласын, Жеті Оғыз шатқалын, Теріскей Алатоо жотасының солтүстік баурайында орналасқан Барскоон шатқалын аралады.
Әрі қарай қатысушылар Ұлы Жібек жолының орталығында орналасқан Азия мен Еуропа арасындағы сауда жолдарын біріктірген ежелгі Таразға табан тіреді. Мұнда олар көптеген тарихи ескерткіштер мен Қарахан, Бабажи-Хатун және Айша бибі кесенелерін, Ақыртас және ежелгі Тараз археологиялық кешенімен танысты. Одан әрі экспедиция мүшелері Өзбекстанның Ташкент және Самарқан секілді тарихи қалаларын аралады.
Журналистер, фототілшілер, туристік блогерлер мен туроператорлардан құралған экспедиция құрамы Қазақстан,Қырғыз Республикасы және Өзбекстан бағытын 13 күнде жүріп өткен. Сапардың қорытындысында еліміздің табиғи нысандары бойынша жаңа туристік бағыттар түзілді. Бұл ақпараттар көршілес Қырғыз Республикасы, Өзбекстан және отандық туроператорларға берілетін болады.
