Б.Нұрымбетов ең алдымен қаладағы «№1 арнаулы әлеуметтік қызметтерді көрсету орталығы» КММ бөлімшесі – «Өз алдына дербес тұру үйінің» жұмысымен танысты. Бұл ұйым 18 жастан асқан психоневрологиялық аурулары бар адамдарға арнайы әлеуметтік қызметтер көрсетеді. Ұйым қызметімен жан-жақты танысқан министр содан соң 3-тен 18 жасқа дейінгі I-II топтағы мүгедек балаларға арналған «№2 арнаулы әлеуметтік қызметтерді ұсыну орталығы» мекемесінде болды.
Аталған ұйымдардың жетекшілерімен кездесу барысында Б.Нұрымбетов Президент Қасым-Жомарт Тоқаевтың сайлауалды бағдарламасында белгіленген негізгі міндеттердің бірі мүгедектерге көрсетілетін әлеуметтік қызметтердің сапасын жақсарту және олардың қолжетімділігін қамтамасыз ету екенін атап өтті. Мемлекет басшысы «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында ерекше қажеттіліктері бар адамдар үшін тең мүмкіндіктер жасауға ерекше назар аударды.
«Осы жылғы мамыр айында мүгедектігі бар адамдардың құқықтарын қамтамасыз ету және өмір сүру сапасын жақсарту жөніндегі 2025 жылға дейінгі жаңа Ұлттық жоспар қабылданды. Оған әлеуметтік қорғау, білім беру, денсаулық сақтау және әлеуметтік қызметкерлердің біліктілігін арттырудың кешенді шаралары кіреді. Бүгінгі басты міндетіміз – Ұлттық жоспарда көрсетілген іс-шараларды барлық деңгейде сапалы іске асыру, мүгедектігі бар адамдарды техникалық құралдармен және оңалту қызметтерімен қамтамасыз ету. Олардың өмір сүру сапасын арттыру, тәуелсіздікке қол жеткізу, әлеуметтік және кәсіби қабілеттерін сақтау және оларды өмірдің барлық салаларына енгізу», деді министр.
Сондай-ақ Б.Нұрымбетов Алматы қаласының халықты жұмыспен қамту орталығында болып, вокзал маңы алаңында орналасқан мобильды жұмыспен қамту орталығының жұмысымен танысты. Жұмыспен қамту орталығы қызметкерлерінің алдында сөйлеген сөзінде министр халықты жұмыспен қамтуды қамтамасыз ету министрлік үшін ғана емес, жергілікті атқарушы органдар үшін де маңызды міндеттердің бірі болып саналатынын атап өтті.
«Қабылданған шаралардың нәтижесінде елдегі жұмыссыздық деңгейі 4,8%-дан аспайды. Алайда қол жеткізілген нәтижелермен тоқталып қалмауымыз қажет. Мемлекет басшысы өз Жолдауында бизнесті қолдаудың жаңа нысандарын белсенді түрде енгізу қажеттігін, ең алдымен, көп балалы және табысы аз отбасылар үшін отбасылық бизнес құруға әлеуметтік аспектілерге баса назар аудару қажет екенін атап өтті. 2017 жылдан бастап Қазақстанда Нәтижелі жұмыспен қамтуды және жаппай кәсіпкерлікті дамытудың «Еңбек» мемлекеттік бағдарламасы жүзеге асырылуда. Оның негізгі бағыттарының бірі – микрокредиттер, сондай-ақ қайтарымсыз негізде мемлекеттік гранттар беру есебінен азаматтардың кәсіпкерлік бастамашылығын дамыту болып табылады. Бұл жұмысты жандандыру қажет, сонымен қатар азаматтарды басқа бағыттағы іске асыру шараларымен қамту, яғни жұмыссыздарды мүмкіндігінше қоғамдық жұмысқа тарту, оларды қысқа мерзімді оқу курстарына жіберу, әлеуметтік жұмыс орындарын құру, оқу орындарының түлектеріне алғашқы кәсіби тәжірибелерін алу үшін жастар практикасын ұсыну керек», деді Б.Нұрымбетов.
Кездесу соңында министр жұмыспен қамту орталығы табысы аз отбасылардың еңбекке қабілетті мүшелерін белсенді жұмыспен қамтуға барлық күш-жігерін жұмсау керектігін айтты.
