Спорт • 30 Қыркүйек, 2019

Екі бірдей белдікке ие болды

298 рет
көрсетілді
4 мин
оқу үшін

Қазақстандық кәсіпқой боксшы Батыр Жүкембаев Канаданың Монреаль қаласында өткен кәсіби бокс кешінің басты жекпе-жегінде шаршы алаңға көтеріліп, мексикалық Мигель Васкестен ұпай саны бойынша басым түсті. Сондай-ақ отандасымыз екі бірдей белдікке ие болды.

Екі бірдей белдікке ие болды

Бірінші жартылай орта салмақта өнер көрсеткен қандасымыз бұл жекпе-жекте екінші деңгейлі WBA Continental және IBF Inter-Continental белдігі үшін мексикалық тәжірибелі боксшы Мигель Васкеспен (41-8, 15 КО) жұдырықтасты. Қос бокшсы да 10 раунд бойы нағыз айқас көрсетті. Дегенмен әр раундты өз пайдасына жазған отандасымыз төрешілердің бірауыз шешімімен жеңіске жетті. Бір төреші 100-90 ұпаймен Жүкембаев жеңіске жетті деп есптесе, екі төреші бір раундта мексикалық боксшы басым болды деп, 99-91 көрсеткішімен жеңісті қазақстандық боксшыға берген.

Бұған дейін 16 кездесу өткізіп, оның 13-ін нокаутпен аяқтаған Батыр Жүкембаев бұл жолы өте қарымды боксшымен жекпе-жек өткізді деп айта аламыз. Оның үстіне бұл рейтингтік емес, белбеу үшін болған кездесуде қарсыластың да деңгейі соған сай болуы керек. Сондай-ақ 32 жастағы мексикалық боксшы 2010 және 2014 жылдар аралығында жеңіл салмақтағы IBF тұжырымы бойынша әлем чемпионы атанғанын да айта кеткен жөн. Васкес кәсіпқой бокста әлем чемпионы деген атағы бар бірқатар мықты боксшылармен айқасып, мол тәжірибе жинақтаған. Атап айтар болсақ, ол алғашқы жекпе-жегінде қазіргі таңда орта салмақтағы WBC, WBA және IBF тұжырымы бо­йынша әлем чемпионы, қазақстандық бокс жанкүйерлеріне жақсы таныс Сауль «Канело» Альвареспен екі рет жұдырықтасқан. 2006 жылы өткен алғашқы айқасында өзінің отандасынан жеңілсе, араға екі жыл салып Альвареспен қайта рингте жолықты. Дегенмен бұл жолы да «Канело» ұпай санымен басым түсті. Сонымен қатар Васкес америкалық әйгілі боксшы Тимоти Брэдлимен, бірінші жартылай орта салмақтағы әлем чемпионы британиялық Джош Тэйлормен қолғап түйістіріп, есе жіберген. Кәсіпқой бокста мол тәжірибе жинақтаған боксшымен жекпе-жек өткізіп, отандасымыздың жеңіске жеткені ауыз толтырып айтарлықтай нәтиже.

Осылайша, Жүкембаев бұған дейін жеңіп алған екінші деңгейлі IBO International және WBC Continental Americas белдігіне WBA Continental мен IBF Inter-Continental тұжырымы бойынша екі бірдей белбеу қосып қойды. Кешегі жарқын жеңісінен кейін Жүкембаев бірнші жартылай орта салмақтағы ТОП-20 боксшының қатарына кірді. Егер жыл соңына дейін тағы бір жекпе-жек өткізетін болса, келесі жылдан бастап төрт белдіктің бір тұжырымы бойынша чемпиондық белдікке таласуға толық мүмкіндік туады.

Отандасымыздың жекпе-жегін тама­ша­лаған канадалық бокс туралы жазатын The Fight City басылымының журналисі Мэнни Монреаль Батырдың жеңісін жо­ғары бағалады. «Жекпе-жек толық Ба­тыр Жүкембаевтың бақы­лауы­мен өтті. Дегенмен оның қарсыласын әлсіз деп айта алмаймын. Бұған дейін біраз белес­терді бағындырып, әлем чемпионы деген атаққа қол жеткізген өте әк­кі боксшы. Осы қарқынынан таймаса, Ба­тыр келесі жылдан бастап әлем чемпио­ны атағы үшін жекпе-жек өткізіп, дүние ­жүзін мойындататына күмәнім жоқ» дейді ол.

Сондай-ақ аталған бокс кеші аясында орта салмақ дәрежесінде өнер көрсететін тағы бір отандасымыз Аман Қазанғапов кезекті жекпе-жегін өткізіп, мексикалық Хесус Арриагиден ұпай саны бойынша басым түсті.