Бағалы қағаздар жөніндегі комиссиялардың халықаралық ұйымының қолдауымен халықтың инвестициялық сауатын арттыруға бағытталған кездесуге мемлекеттік органдар, «Атамекен» ҰҚП, сондай-ақ Маңғыстау облысының академиялық топтары өкілдері қатысты.
Өткен жылы аталған қаржы орталығы Маңғыстау облысы әкімдігімен өңірге инвесторлар тартуда орталық алаңын пайдалану жөнінде меморандумға қол қойған болатын. Делегация басшысы, «Астана» ХҚО әкімшілігі» АҚ Басқарма төрағасының кеңесшісі Б.Қуандықовтың айтуынша, меморандум аясында Маңғыстауда екі инвестициялық жоба жүзеге асырылуда, оның бірі қонақүй кешені құрылысы.
– Бұдан өзге тағы он жоба жоспарлануда. Аймақ басшысымен кездесіп, Маңғыстау облысына инвесторлар тарту мәселесін талқыладық. Біздің алаңымызға тіркелген әріптестер үшін салықтық жеңілдіктер қарастырылған. Сондай-ақ орын алған даулы мәселелерді шешуде халықаралық сот көмегіне жүгінуге мүмкіндік бар. Өткен жылы ірі компанияларды өз алаңымызға тарту үшін ірі шаралар қолға алынды, – дейді Б.Қуандықов.
– Инвестиция мен оны ел экономикасына тарту, сондай-ақ қаржылық сауаттылық – қажет мәселелер. Сондықтан «Астана» ХҚО кездесуі осы тақырыптағы сауалдарымызға жауап алып, бұған дейін беймәлім болып келген тұстарды терең тануымызға мүмкіндік берді. Мұнайлы өңір, әрі теңіз жолы қатынасы бар Маңғыстау өңіріне инвестиция тартуда қаржы орталығының әлеуеті күшейеді дей аламыз, дейді қатысушылар.
Маңғыстау облысы
