«Қазақ тілі» ҚБ төрағасы Бектұр Төлеуғалиевтің айтуынша, бірлестік Әбішке арналған байқауларды 1995 жылдан бері ұйымдастырып келеді. Дарынды жастарды анықтау, қолдау көрсету мақсатындағы байқауда бақ сынаған 20-ға тарта жас ақындардың облыстың белгілі өнер адамдары мен ғалымдар бағалады.
Нәтижесінде, 1-орынды Шайыр орта мектебінің 10-сынып оқушысы Амандық Орынбаев, 2-орынды «Білім инновация лицейінің» 10-сынып оқушысы Рамазан Тезекбаев иеленсе, 3-орын Маңғыстау ауданы, Шетпе лицейінің 11-сынып оқушысы Ұлдай Дауыловаға бұйырды. Марапатты Маңғыстау облысы әкімінің орынбасары Қ.Жұмашев табыстады.
Сондай-ақ шарада өзге аталымдар бойынша өткен байқаудың қорытындылары жарияланды. «Қазақ халқының ұлттық әдет-ғұрып, салт-дәстүрлер туралы шығарма» аталымы бойынша Түпқараған ауданы Ж.Мыңбаев атындағы мектеп-гимназиясының 10-сынып оқушысы Гүлдана Нұрғабылова жүйрік деп танылды. «Елбасы еңбектерінен шығарма» аталымы бойынша ынталандыру сыйлығын ІТ лицейінің 10-сынып оқушысы Шұғыла Жоламанова, 3-орынды Бейнеу ауданының Күйкен орта мектебінің оқушысы Айдана Жадигерова ұтып алса, «Әбіш Кекілбаевтың еңбектерінен шығарма» аталымынан 1-орын Қарақия ауданының №1 мектептің 9-сынып оқушысы Арайлым Сабыроваға, «Абай Құнанбаевтың еңбектерінен шығарма» аталымынан жүлде Түпқараған ауданының М.Әбдіхалықов атындағы орта мектептің 10-сынып оқушысы Ұлмира Жиделіге бұйырды.
Байқауда орын алған жүлдегерлерге дипломдар және қымбат сыйлықтар табысталды, ынталандыру сыйлығын алғандар да тартудан тыс қалған жоқ.
