Руханият • 25 Қазан, 2019

Қарағандыда Қасым оқуларының жеңімпаздары анықталды

299 рет көрсетілді

Кеншілер астанасында осымен тоғызыншы рет өткен «Сен неткен бақытты едің, келер ұрпақ…» атты республикалық Қасым оқуларының жеңімпаздары мен жүлдегерлері анықталды.

Байқаудың шешуші кезеңінде «Дүниеге келер әлі талай Қасым...» және «Жас дәурен» атты екі аталым бойынша 26 үміткер бақ сынады. Жалпы биылғы Қасым оқуларына Қарағанды, Шығыс Қазақстан, Батыс Қазақстан және Солтүстік Қазақстан облыстарынан барлығы 48 өтінім түскен болатын.

Құрамында айтыскер ақын,  Қазақстан Жазушылар одағының Нұр-Сұлтан қалалық филиалының төрағасы Дәулеткерей Кәпұлы, ақын-жазушы, Қазақстан Жазушылар одағының Қарағанды облыстық филиалының төрағасы Серік Сағынтай бар қазылар алқасы ақын қыз Салтанат Қайырбекті «Дүниеге келер әлі талай Қасым...» аталымы бойынша бас жүлдеге лайықты деп таныды. Сондай-ақ бұл аталымда Түркістан облысынан келген Бауыржан Ерман бірінші жүлдені жеңіп алса, Павлодар облысынан қатысқан Асылбек Марта екінші орын иегері атанды. Ал жүлделі үшінші орынды Қарағанды облысының өкілі Бек Ықыласов қанағат етті.

«Жас дәурен» аталымы бойынша Қасымның әндерін орындап сынға түскен үміткерлердің өнерін әнші, Қазақстан Республикасының Тұңғыш Президенті-Елбасы қоры сыйлығының лауреаты Сержан Мұсайын және Қазақстанның мәдениет қайраткері, Қ.Байжанов атындағы концерттік бірлестіктің әншісі Дәуренбек Әркенов бастаған қазылар бағалаған болатын. Бұл аталымда Осакаров ауданынан келген Саян Бөдесов бас жүлдені жеңіп алды. Бірінші жүлде Нұрслан Сайдалинге бұйырса, «Ұлдар» квартеті екінші орын иегері атанды. Ал үшінші жүлдені Бақытжан Үйсінбаев алды.

Жеңімпаздар мен жүлдегерлерді марапаттау рәсімінде баспадан жаңа шыққан «Qasym» атты кітаптың тұсаукесері өтті. Бұл жинаққа танымал жазушылардың Қасым Аманжолов туралы ғылыми мақалалары, эсселері, сын материалдары және естеліктері топтастырылған.

Ал Қазақстан Жазушылар одағының мүшесі, «Мағжан» баспасының директоры Алмаз Мырзахмет келесі жылы Қасым Аманжолов әндерінің басын құраған кітапты жарыққа шығару жоспарда бар екенін айтты.

 

 

Қарағанды облысы

Соңғы жаңалықтар

Ұқсас жаңалықтар