«Әзірет Сұлтан» мемлекеттік тарихи-мәдени қорық-музейі» РМҚК және Қожа Ахмет Ясауи атындағы ХҚТУ ұйымдастырған республикалық байқауда Нұр-Сұлтан, Алматы, Шымкент, Түркістан қалалары мен еліміздің барлық облысынан 40-тан астам оқушы бақ сынады. Биыл жиырма үшінші рет өтіп отырған байқаудың ашылу салтанатында «Әзірет Сұлтан» мемлекеттік тарихи-мәдени қорық-музейінің директоры Нұрболат Ахметжанов қалалық деңгейде бастау алған сайыс облыстық, республикалық, халықаралық дәрежеге жеткенін атап өтті. «Өз заманында-ақ халықтың ерекше ілтипатына ие болып, «Әулиелер Сұлтаны» атанған, кейінгі ұрпақтың да руханият әлеміндегі бағдарын айқындауда жетекші рөл атқарған Қожа Ахмет Ясауи баға жетпес байлық, өшпес мұра қалдырып кеткені белгілі. Әулиенің ізбасар шәкірттері Түркістан атырабынан асып, оның ілімін төрткүл дүниеге мәшһүр етті», деді Нұрболат Ахметжанов.
Өскелең ұрпақты ұлы баба мұрасын терең меңгеріп, зерттеуге ынталандыру, интеллектуалды пайым-парасатын арттыру, кесенеде жерленген тарихи тұлғалардың өмірі мен қызметін өскелең ұрпақтың бойына сіңіру мақсатында ұйымдастырылған байқаудың бірінші кезеңінде үміткерлер «Баба мұрасы – балаға аманат» тақырыбы аясында Қожа Ахмет Ясауидің хикметтерін жатқа айтудан сынға түссе, «Білім мыңды жығар алысқанда» деп аталған келесі кезеңде сұрақтарға жауап берді. Қазылар алқасының шешімімен Алма Қосабай (Түркістан облысы) бас жүлдені жеңіп алды. Ал 1-орынды Өмірзақ Түленов (Түркістан облысы), 2-орынды Ұлжан Аманжолова (Шымкент қаласы) мен Медеу Нұрмолда (Алматы облысы) иеленді. Үш 3-орынды Сымбат Бейбітшілік (Қызылорда облысы), Тоғжан Нұғман (Алматы облысы) мен Дилназ Үсенбаева (Жамбыл облысы) еншіледі. «Ясауи хикметтерін жаттау арқылы шыдамды болуды, қанағат етуді үйреніп, тарихы терең Түркістан жайлы көптеген дерек білдім», дейді бас жүлдегер Алма Қосабай. Ал ең жас қатысушы Алматы қаласынан келген Сабыржан Даниялұлы байқаудан көп тәрбие алғанын айтады. «Адамгершілік, әдептілік, әділдік пен мейірімділік әрбір адамның бойынан табылуы тиіс қасиеттер екендігі хикметтерде жиі айтылған», дейді Сабыржан.
Жеңімпаздар қаржылай сыйлықтармен марапатталып, Қ.А.Ясауи атындағы Халықаралық қазақ-түрік университетінің грантына ие болды. Оқушылардың жетекшілеріне де Алғыс хаттар мен сыйлықтар табысталды.
Түркістан облысы
