Ынтымақтың ұйытқысы бола берейік
Бейсенбі, 18 қазан 2012 7:41
Замана ағымымен ата-бабаларымыз тағдыр тауқыметін тарта репрессия жылдары Жетісу жеріне жетіп, тұрақтап қалыпты. Қазақ халқының біздің бабаларымызға үлкен түсіністікпен қарап, іргелерінен жер бөліп беріп, тіршілік етулеріне мүмкіндік туғызғанына ата-бабаларымыздың рахметтерін жаудырып отырғанын сан рет естігенбіз.
Бейсенбі, 18 қазан 2012 7:41
Замана ағымымен ата-бабаларымыз тағдыр тауқыметін тарта репрессия жылдары Жетісу жеріне жетіп, тұрақтап қалыпты. Қазақ халқының біздің бабаларымызға үлкен түсіністікпен қарап, іргелерінен жер бөліп беріп, тіршілік етулеріне мүмкіндік туғызғанына ата-бабаларымыздың рахметтерін жаудырып отырғанын сан рет естігенбіз.
Бүгінгі ұрпақтың, нақтылай түссем, менің қандастарым – кәрістердің де қазақтарға айтары тек алғыс. Сол қамқорлықты жете түсінген аталарымыз қазақтарға адалдық танытумен шектелмей, жақсылыққа жақсылықпен жауап қайтару үшін жер тырмалап еңбек еткен. Шыны керек, көкөніс өнімдері, оның ішінде пияз өсіруде, жалпы сан түрлі көкөністерден ащы-тұщы салат мәзірлерін жасауда кәрістер өте шебер халық. Олардың қолынан шыққан дәм өзіндік ерекшелігімен дараланатыны тағы анық. Сонымен, Жетісу жерінде кәрістер қазақтарға адал еңбектерімен жағып, етене араласып, Қазақстан атты ортақ үйіміздің керегесі кең, босағасы берік, шаңырағы биік болуына құдды қарлығаштың қанатымен су сепкендей септігін тигізуге талпынуда. Сол үрдістен бүгінгі ұрпақ та тынбай еңбек етуде.
Елбасының Жалпыға Ортақ Еңбек Қоғамына қарай 20 қадам атты мақаласын біз – кәрістер де жиналып отырып оқып талқылағанымызда, онда айтылған мәселелер көңіліміздегі көп жайды дөп басты. Өйткені, менің қандастарымның басым бөлігі ауылдас қазақтарымен бірге алқаптарда еңбек көрігін қыздырып жүрген жандар ғой. Міне, күзгі жиын-терін жұмыстары да аяқталып қалды. Ерте көктемнен бастап ала жаздай еткен еңбектің жемісін көрудеміз. Берекесін берсе, биыл Жетісу өңірінде өнім түсімі жақсы болды. Біле білсек, бұл да ынтымақпен істелген жұмыстың нәтижесі. Қазақта «Ырыс алды – ынтымақ» деген аталы сөз бар. Өз басым осы даналыққа бас иемін. Бауырларыма да ұдайы айтып, жақсы сөздің мәнін ұғынып, жете түсінулерін талап етемін. Ондағы ойым – аталарымыздан келе жатқан жақсы әдет қазақ бауырлармен сыйласып, ынтымақты ұйыта түсу. Одан біз ұтпасақ, ұтылмаймыз. Ең бастысы – жақсылыққа жақсылық жасауды жалғастыра береміз.
Қорыта айтқанда, Алматы облысында тұратын 103 этнос өкіліне осы татулығымыздан танбай, ынтымақтың ұйытқысы бола білсек, кейінгі ұрпақтан тек алғыс қана естіп, шадыман шаттыққа бөленіп жүре береріміз хақ. Өйткені, біз қазақ халқымен біргеміз, тағдырымыз Қазақстанмен ортақ.
Сөз соңында айтарым, қадірменді мұсылман қауым, сіздерді кәріс халқының атынан алдағы Құрбан айт мейрамымен құттықтаймын!
Владимир ЛИ,
Алматы облыстық Қазақстан халқы Ассамблеясы
төрағасының қоғамдық негіздегі орынбасары.
Алматы облысы.
