Қоғам • 28 Қараша, 2019

Мақсат – парламенттік партия болу

363 рет
көрсетілді
8 мин
оқу үшін

Нұр-Сұлтан қаласында «Ауыл» халықтық-демократиялық пат­риоттық партиясының XVI есеп беру-сайлау съезі өтті.

Мақсат – парламенттік партия болу

Съезд қарсаңында ауылдық, қалалық партия ұйымдарында және облыстық, республикалық маңызы бар қалаларда партия­ның есеп беру-сайлау конферен­ция­лары ұйымдастырылған еді. Онда агроөнеркәсіптік кешен мә­се­лелері, ауылдық аумақтарды дамы­ту, партиялық жұмыс әдіс­терін жетілдіру шаралары жан-жақты талқыланды.

Сөйтіп елорда төрінде ұйым­дас­ты­рылған съезд жұмысы­­на Ауыл шаруашы­лығы министр­лігінің бірін­ші вице-министрі Айдар­бек Сапаров, Экология, геоло­гия және табиғи ресурстар министр­лігінің жауапты хатшысы Сәбит Нұрлыбай, Еңбек және халықты әлеуметтік қорғау вице-министрі Ақмади Сарбасов, Денсаулық сақтау вице-министрі Камалжан Надыров, Мәдениет және спорт вице-министрі Нұрғиса Дәуешов, Ұлттық экономика министр­лігі­нің департамент директоры Нұр­лан Мақсұтов, қоғам және мем­лекет қайраткерлері, зиялы қауым және БАҚ өкілдері қатысты.

– Ауыл» халықтық-демо­кра­тиялық патриоттық партиясы қайта құрылға­нынан бері 4 жыл өтті. Бұл біздің партиямыз үшін тағдыршешті кезең болды. Кейбіреулер саяси аренадағы алғашқы қадамымызға күмәнмен қарады. «Ауыл» партиясының болашағына сенбегендер де болды. Алайда біздің партиямыз сөзімен ғана емес, ісімен де өзінің саяси әлеуетін, ерік-жігерін таныта білді. Ең бастысы, біз өзіміздің қоғамға аса қажетті саяси құрылым екенімізді дәлел­дік. Әрине мұнда «Ауыл» пар­тиясының әрбір мүшесінің үлесі бар екенін мақтанышпен айта аламыз, – деді «Ауыл» ХДПП-ның төрағасы, Парламент Сенатының Аграрлық мәселелер, таби­ғатты пайдалану және ауыл­дық аумақтарды дамыту комитетінің төрағасы Әли Бектаев.

«Ауыл» ХДПП-ның 2015-2019 жылдар аралығында атқар­ған жұмысы туралы баян­даған партия төрағасы кез келген бір құрылым үшін ең күрделі кезең – қалыптасу кезеңі екенін алға тартты. Партия мүшелері жұдырықтай жұмылып, күрделі кезеңнен өтті. Осы уақыт аралығында «Ауыл» партиясының іргесі бекіп, қанаты қатайып, қатары толықты.

Әли Бектаевтың айтуынша, пар­тия­ның ендігі мақсаты – пар­ламенттік партия болу. Бұл мақсат партияның алдағы төрт жылдық жоспарының негізіне айналуы тиіс. Бұған дейін де аз белес бағын­дырылған жоқ. Себебі «Ауыл» партиясы – өзіндік сая­си тәжірибе жинақ­таған партия. Өткен саяси кезеңде партия президенттік және парламенттік электоралды науқанға қатысты. Осы сайлау науқандарындағы стратегиялық ұстанымдарының нәтижесінде «Ауыл» партиясы жұмыс жүйесі  қалыптасқан, танымал саяси брендке айналды.

Партия төрағасы Ұлттық қо­ғамдық сенім кеңесінің құрылуын қолдайтынын, «Ауыл» партиясы  мұндай қоғамдық маңызы бар орган жұмысына өз үлесін қосуға қашанда дайын екенін жеткізді. Елдің тағдыршешті мәселелерін тал­қыға салатын осы тектес маңы­з­ды бастамалардан тыс қалмау қажеттілігін алға тартты.

Бүгінде «Ауыл» партиясы құрылым­дық тұрғыда күше­йіп, қадамын нық басып келеді. Еліміздің 14 облысы мен рес­публикалық маңызы бар Нұр-Сұлтан, Алматы және Шымкент қалаларында партияның 17 фи­лиалы жұмыс істей­ді. 188 қала­лық және аудандық партия ұйым­дарында 500 бас­тауыш партия ұйымы бар. «Ауыл» партиясының өкілдері елі­міз­дің заң шығарушы және өкі­летті органдары құрамына ен­ген. Пар­тияның 44 мүшесі де­путат­тық ман­датқа ие. Оның ішін­де, Парламент Сенатында – 1, облыстық мәслихаттар мен Алматы қалалық мәслихатында – 7, аудан­дық мәслихаттарда – 29, қалалық мәслихаттарда – 7 адам бар.

Сондай-ақ 2017 жылдан бастап барлық деңгейдегі депуттардан құралған «Ауыл» партиясының депутаттар Кеңесі жұмыс істеп келеді.  Аталған кеңеске Жамбыл облыстық мәслихатының депутаты Ерболат Саурықов жетекшілік етуде. Бұл – «Ауыл» партиясының өңірлердегі шынайы беделінің бірден-бір белгісі деуге болады. Еліміздің түк­пір-түкпірінде көптеген азаматтар «Ауыл» партиясына өтуге ниет білді­руде. Мәселен, 2015-2019 жылдар ара­лы­ғында партия мүшелерінің саны 44 мың адамға артты.

Нәтижесінде, аталған партия­ның кадрлық әлеуеті де арта түсуде. Партия тек аграрлық салада жетістікке жеткен тұлғалар­мен ғана мақтанбайды. Білім беру, медицина, автокөлік және өзге де салаларда жарқын жетіс­тік­терге жеткен азаматтар осы партияға мүше. 500-ге жуық партия мүшесі мемлекеттік және ведомстволық наградалармен марапатталды.

Алдағы мақсат – еліміздегі қоғамдық-саяси мәселелердің қалың қатпарынан партияның өзіндік «күн тәртібін» айқын­дап, қоғамның  әлеуметтік жаңғы­руын­да көшбасшылыққа ұмтылу. Пар­тия төрағасы мұндай саяси амбициясыз стратегиялық міндеттерді орындау мүмкін еместігін айрықша атап өтті. Ол үшін, алдымен партияның жаңа көшбасшылар буынын қалып­тастыру бағытында жұмысты жандандыру қажет. Осы мақсатта «Жаңа көшбасшылар мектебі» атты партияішілік жоба қолға алынатын болады.

Әлеуметтік желілердегі жұмыс жүйе­леніп, партия жақ­тастарының қатарын көбейтуге қатысты нақты жұмыс­тар ат­қарылмақ. «Ауыл – Достар» деп атала­тын жақтастар клубы құрылып, «Еңбек адамы – ел тірегі!» атты саяси бастама қолға алынады. Мұндағы мақсат – еңбек адамының мәртебесін жоғары­лату арқылы ауылдық жерлердегі маман­дықтардың беделін арттыру.

Бұл ретте, партия төрағасы делегаттар алдында «Ауыл» партиясы азық-түліктегі  ГМО-ға қарсы» атты тағы бір саяси бас­таманы қолға алғанын жария­лады. Бұл идея сонау 2017 жылы «Гендік модификацияланған организмсіз өмір – ауыл шаруа­шылығы ғылымы мен өнді­рі­сі­нің қазақстандық таңдауы» тақырыбында өткен дөңгелек үстел барысында пайда болыпты.

ГМО демекші, Әли Бектаев еліміздегі мал экспортына да тоқталды. Оның айтуынша, мал басының тірідей шетел асып жатқандығы – келеңсіз жағдай. Мәселен, өткен жылы шетелге 88 мыңға жуық мал сатылса, биылғы тоғыз айда ол көрсеткіш 333 мыңға жетіпті. Бұл былтырғы жылмен салыстырғанда 3,8 есеге көп. Сатылған ірі қараның саны 2 есе, ал ұсақ малдың саны 7 есеге өскен. Сон­дағы мал басының 80%-ын Өзбек­стан азаматтары сатып алған екен. Олар Қазақ­станның шекара аумағында орна­лас­қан Түркістан, Қызылорда облыста­ры­­мен қатар, Шығыс Қазақстан, Ақмола, Қа­рағ­ан­ды, Алматы, Жамбыл облыстары­нан да малдың сапалы бөлігін іріктеп алуда.

– Ең сорақысы шетке сатыл­ған малдың 50%-ға жуығы – аналық. Яғни, көршілес мемлекеттер Қазақстан малын етке ғана емес, өз малдарының сапасын жақсарту және мал басын көбейту үшін сатып алуда. Біздің депутаттық сауалымыздан соң аналық мал мен оның төлін ел аумағынан шығаруға алты ай мерзімге тыйым салынды, –  деді партия төрағасы.

Съезд жұмысы барысында партия­ның бағдарламалық мақ­саттарын орындау­дағы қыз­меті, атқарған жұмыстары туралы егжей-тегжейлі ақпарат ұсы­нылды. Партияның өңірлік фи­лиалдарының жергілікті жер­лердегі агроөнеркәсіптік кешен, әлеуметтік сала, ғылым және өн­діріс мәселелері төңірегіндегі жұмыс­тары талқыланды. Сондай-ақ партия төр­ағасы ретінде Әли Бектаев қайта сайла­нып, Саяси кеңестің жаңа құрамы бекі­тілді. Партия жарғысына өзгертулер мен толықтырулар енгізілді. 

Соңғы жаңалықтар

Су үнемдейтін қондырғы

Технология • Кеше