БІРДЕ...
Сайлау кезінде Брежнев Грузияға келіп ауыл аралап жүріп бір қой жетектеп бара жатқанды тоқтатып:
– Генацвале, қойыңды сатшы?! – дейді сынап.
– Ал, таңдаңыз, – дейді анау жападан-жалғыз қойын алдына тартып.
– Не таңдайтыны бар, қойың біреу ғана ғой.
– Сіз де бір өзіңіз, біз де сізді таңдап сайлап жатыр емеспіз бе...
***
Шерлок Холмас пен доктор Ватсон бірде қала сыртында палатка тігіп алып түнеп жатыпты. Түн ортасында Ватсон Холмсты түртіп оятып, төбеден төніп тұрған жұлдызды нұсқап:
– Сонау шоқ жұлдыз бізге бір нәрсені меңземей ме? – деп сұрапты.
– Жоқ-а... Не, сізге бір белгі бере ме?
– Маған ол айтады: сіздердің палаткілеріңіз қолды болып кетті дейді...
***
Чарли Чаплиннің өнеріне тәнті болып, ол ойнаған рөлдерге риза болып жүретін Альберт Эйнштейн бірде оған: «Сіздің қай киноңызды алсақ та бүкіл елге түсінікті ғажап дүние. Сіз көп өтпей ұлы адамдардың қатарынан орын аласыз» – деп хат жазып жіберіпті.
Бұны оқыған Чарли Чаплин бірден: «Мен сізді мақтан тұтамын, бас иемін. Сіздің салыстырмалы теорияңыз көпшілікке түсініксіз дүние болса да, сіз қазірдің өзінде ұлы адамдардың қатарындасыз» деп жауап хат жазып жіберіпті.
***
Бір әйел бірде Бернард Шоудан:
– Аллатағала неге алдымен еркекті, содан соң барып әйелді жаратты екен? – деп сынай сұрағанда, ұлы жазушы: – Е, еркекті жаратқан кезде әйел жарықтық ақыл айтып мазаламасын деген болу керек, – деп мысқылдай жауап қайтарыпты.
***
Ағылшын астрономы Джон Гершель түн мезгілінде аспан әлеміне көз тігіп жұмыс істеп отырғанда үй сыпырушы әйел тақап келіп: – Гершель мырза, айтыңызшы, басқа планеталарда да күл-қоқыс бола ма екен осы? – деп кекесін сұрақ қойғанда, ғалым: – Дөп басып айта алмаймын, бірақ онда ойлы адамдар болса, күл-қоқыс, әрине, болады, – деген екен.
