Суретті түсірген Ерлан ОМАР, «EQ»
Жәмила АХМЕТОВА,
көп балалы ана, Республикалық диагностикалық орталығының амбулаторлық хирургия бөлімінің медбикесі:
– 2019 жыл еліміз үшін әртүрлі жаңалықтарға толы болды. Қай ана үшін де баласының амандығынан асқан байлық жоқ қой. Көп балалы аналарды түсінемін, әрқайсысы баласының амандығы, қауіпсіздігі, болашағы үшін уайымдайды. Өзім – 6 баланың анасымын. Балаларымның үлкендері жұмыс істейді, іссапарға жиі шығады. Баланың өсіп, өз алдына жұмыс істеуі, отбасы құруы – заңдылық. Осыдан артық ана үшін бақыт бар ма! Дегенмен ана жүрегі қашанда алаңдаулы. Жылды қорытындылаймыз деп жақсы естеліктерді тізіп жүргенімізде Алматыдағы ұшақ апаты туралы, онда сәбилер мен кішкентай балалардың болғанын естіп жанымыз түршікті. Келер жылдың халқымыз үшін қауіпсіз, апатсыз, төтенше жағдайсыз болғанын тілер едім. Елдегі саяси өзгерістер, демократияға қадам жасалып, халықпен диалог орнатылып жатқаны, әлбетте, құптарлық. Алайда, мұның жанында ел қауіпсіздігі ұмыт болмасыншы деген тілегім бар. Сапарға шыққан әрбір жолаушы үйіне аман-есен қайтатын, әр ана баласымен қуанышта қауышатын жыл болғай.
Ауыт МҰҚИБЕК,
қоғам қайраткері:
– Біз өткенге салауат айтып, болашаққа үмітпен қараймыз. Біз үшін 2019 жыл ерекше оқиғалармен есте қалды. Жыл соңы жақындап қалғанда ұшақ апаты болмаса, өткен жылға өкпе жоқ. Бір сөзбен айтқанда, 2019 жыл – Тəуелсіз Қазақстанның жаңа бір дəуірге қадам тастаған құтты жылы, тарихи оқиғаға толы өзгерістерімен тарих қойнауына кіріп барады. 2020 жылдан да күтер үмітіміз көп, мақсатымыз да аз емес. Біз саяси жаңару дəуірін бастадық. Құдайға тəубе, оның алғашқы қадамы сəтті басталды деп толық сеніммен айта аламын. Енді Президент Жолдауында алға қойылған жоспарлар мен талап-міндеттер жəне Ұлттық қоғамдық сенім кеңесі ұсынған ұсыныстар толық жүзеге асады деп сенемін. Себебі қазір билік те, зиялы қауым да сөзден іске, жалпылықтан гөрі нақтылыққа көше бастады. Жұрт та соны талап етіп отыр.
Жалпы, мені бүгінде халық санының аздығы ерекше толғандырады. Ендігі реформаның басым бір бағыты осы салаға – демография саласына бұрылуы керек деп есептеймін. Басқалай айтқанда, «тоғызыншы территорияда» алаңсыз өмір сүру үшін халқымыздың саны да қомақты болуы абзал. Әзірге Қадыр Мырза Әлі айтпақшы, «Көп халық жоғалмайды көптігімен, мықты болмай болмайды ал біздерге!..»
Амалбек ӨМІРТАЙ,
әлемдік экономика бойынша PhD:
– «Қазақстан-2030» стратегиясы бойынша «Азия барысына айналу» қажеттігі айтылса, енді 2050 жылы Қазақстанның дамыған 30 елдің қатарына енуі көзделген. Ал 2050 жылы дамыған елдердің қатарына ену үшін, еліміз жыл сайын 8-10 пайыз экономикалық даму көрсеткіштерін көрсетуі тиіс екендігі әрбір халықаралық экономика маманына белгілі. Біз соңғы онжылдықта бұл көрсеткіштердің жартысына да жеткен жоқпыз. Алдағы онжылдықта да жетуіміз екіталай. Уақытылы орындалмаған тапсырмалар, жаңа жылға қойылатын міндеттерді еселей беретіндігі баршамызға белгілі. Сол себепті әрбір көрсеткіш бойынша есеп алар кез жетті деп ойлаймын. Жалпы, 2020 жылдың есеп берер жыл болуын күтемін. Біздің экономикамыз, ұлттық валютамыз, сыртқы саудамыз да осы күнге дейін шикізаттық тауарларға, яғни мұнай-газға, мысқа, уранға, астық экспортына тәуелді болып келді. Келер жылы сапалы экспортқа қол жеткізсек деген де ой бар. Үкіметке жаңа леп беретін қабілетті азаматтардың келуін күтемін. Жаңа жылда еліміздің өңірлік өндірістерін өзара интеграциялап бәсекеге қабілетті тауар өндірісін қалыптастыра алуымызды күтемін.
Жазып алған
Светлана ҒАЛЫМЖАНҚЫЗЫ,
«Egemen Qazaqstan»
