«Барыс Аренада» төрт команда өзара күш сынасады. Атап айтсақ, жолымыз Украина, Нидерланд және Польша құрамаларымен қиысады. Осылардан озған жағдайда ғана біздің жігіттер Олимпиада жолдамасы үшін жарысты жалғастырады. Сол мақсатқа қол жеткізу үшін Андрей Скабелканың шәкірттері еш аянып қалмасы анық және де ол жоспарды жүзеге асыруға толық мүмкіндігіміз бар. Олай деуге негіз, үздіктер тізімінде жоғарыда аталған командалардың барлығынан жерлестеріміз жоғары тұр. Мәселен, Халықаралық шайбалы хоккей федерациясының рейтингінде Қазақстан 19-орынды иеленуде. Польша бізден үш, Украина алты саты төмен тұр. Ал Нидерланд 28-орынды қанағат тұтуда.
6 ақпанда отандастарымыз Украинамен шеберлік байқасады. Бірінші дивизион командалары арасындағы әлем чемпионатында біз оларды екі рет жеңгенбіз. Өз тарихында украиналықтар Олимпиадаға бір рет қана қатысты. Келесі күні Нидерландпен кездесеміз. Қызғалдақтар елі өкілдерінің спорттың бұл түрінде жеңіспен өрілген бай тарихы жоқ. Сондықтан да бұл жолы да сан соқтыру айтарлықтай қиындық туғыза қоймас. 9 ақпанда Польшаға қарсы ойнаймыз. Түрлі жарыстарда поляктармен бірнеше мәрте жолымыз қиысты. Ол бәсекелердің дені қазақстандықтардың пайдасына шешілді. Соңғы рет айтулы елдің өкілдерін 6:1 есебімен ойсырата ұттық. Оның үстіне, олар Олимпия ойындарына соңғы рет сонау 1992 жылы қатысты. Содан кейін қатарынан жеті рет төртжылдықтың басты бәсекесінен шет қалды.
Украина, Нидерланд және Польшаға қарағанда Қазақстанның жағдайы әлдеқайда жақсы. 1998 жылы Нагано Олимпиадасында хоккейшілеріміз ширек финалға дейін жетсе, 2006 жылы Туринде тоғызыншы орынға табан тіреді. Оларға қарағанда әлем чемпионаттарына да жиі қатысып жүрміз. Сондай-ақ Азия ойындары (4 алтын+2 күміс) мен Дүниежүзілік Универсиадада (1 алтын+4 күміс+1 қола) алты реттен жеңіс тұғырына көтерілдік.
Егер Нұр-Сұлтандағы сынақтан сүрінбей өтсек, іріктеу турнирінің негізгі бөлігінде күш сынасу құрметіне ие боламыз. Бұл бәсекелер Словакия, Латвия және Норвегияда өтеді.
