Қоғам • 05 Ақпан, 2020

85 мың студент жатақханаға мұқтаж

29 рет көрсетілді

Елбасы Нұрсұлтан Назарбаев осыдан екі жыл бұрын жариялаған өзінің Бес әлеуметтік бастамасында 2022 жылдың соңына дейін студенттерге арнап кемінде 75 мың орын­дық жаңа жатақхана салуды тапсырған болатын. Алайда атал­ған тапсырма негізінде өткен жылы қолға алынған жатақ­ха­налар құрылысы көңіл көншітпей тұр. Бұл туралы Мәжіліс депу­таты Павел Казанцевтың төрағалығымен өткен Nur Otan пар­тиясы партиялық бақылау комитетінің отырысында баяндалды.

Білім және ғылым вице-ми­нис­трі Бибігүл Асылованың ай­­туынша, осы жылы студенттерді бас-аяғы 15 мың жаңа жатын орынмен қамту жоспарлануда.

– Бұрын жатақханаларда тұру үшін жалдау ақысының шек­ті құнын анық­тайтын бұй­рық бар еді. Алайда жатақ­­ха­на­лар­дың қазіргі жай-күйінің төмен­деуіне нақ осы құжаттың да әсері болға­нын айту керек. Жатақханалардың басым бөлігі күрделі жөндеуді қажет етеді. Материалдық-техникалық жаб­­дық­тауда да қиындықтар бар. Яғни, жалға алудан түскен төлем нысан­дар­дың сапалы жұмыс істеуі үшін қаражат қа­­лып­­тас­тыруды былай қойғанда, қыз­­мет көр­сетудің өз құнын да ақта­ма­­ды. Мемлекеттік ЖОО үшін бұл тү­йін­ді мәселе болып отыр. Сон­дықтан қазіргідей жалға алу құнын нарықпен реттеу дұрысырақ, – деді Б.Асылова.

Жатақхана тапшылығына қа­­тысты Мәжіліс депутаты Жәмила Нұрман­бе­то­ва да пікір біл­­ді­р­­ді. 

– Елбасының тапсырмасы бойынша алғашқы 2019 жылы – 5000, 2020 жылы – 15000, 2021 жылы – 25000 және 2022 жылы – 30000 жатын орын пайдалануға берілуі тиіс еді. Бұл мақ­сатқа жету үшін республикалық бюд­жет есебінен 32 млрд теңге қарас­ты­рыл­ған бо­латын. Парламентте осы Үшін­ші бастаманы жүзеге асыру мақ­сатында заңнамалық база қа­былданды. Құқықтық тұр­ғы­да жағдай жасалды, – деді Ж.Нұрманбетова.

Депутаттың айтуынша, өткен жыл­ға жоспарланған 5000 жатын орынның тек 2810-ы ғана пайдалануға беріліпті. Оның жалпы құны 196 млн 397 мың теңгені құрады. Яғни, өткен жылғы жос­пар тек 57%-ға ғана орындалып отыр деген сөз. Сол 2810 жатын орын­ның 1209 орны жаңа жатақхана салу ар­қылы пайдалануға берілсе, 1601-і қолда бар жатақхананы қайта жаңғырту есебінен студенттерге бе­рі­ліпті. Дегенмен Елбасы тапсырма­сын­да жатақханаларды жаңғырту емес, тек жаңадан салу мәселесі айтыл­ған еді. Тиісінше бюджет те жаңа жатақханаларды са­луға қарастырылған болатын. Сондықтан Елбасы бас­та­масы өткен жылы толық ор­ын­дал­ды деуге ауыз бармайды. Себебі жаңа жатақханаларды қолданысқа беру тапсырмасы тек 25%-ға ғана орындалды.

Комитет мүшелері Білім және ғылым министрлігінің бюд­­жет қаржы­сын тиімсіз пай­да­­ланғанына да назар аударды. Партиялық бақылау коми­те­ті келтірген мәліметке сүйенсек, рес­пуб­ликалық бюджетте студенттер, магистранттар мен докторанттарды жа­тақ­ханалардағы орын­дармен қамта­ма­сыз ету үшін мемлекеттік тапсырыс беруге 15 миллиард теңге (2019 жылы – 1 млрд теңге, 2020 жылы – 4 млрд теңге, 2021 жылы – 10 млрд теңге) қарастырылған. Соған қарамастан, өткен жылы мем­лекеттік тапсырыс аясын­да бар-жоғы 177 миллион теңге игеріліп, қаражаттың 70%-дан астамы қазы­наға қайтарылды.

Бұл тұста студенттер тұрып жат­қан жатақханалардағы жағ­дай көңіл көн­шітпейтінін айту қажет. Кей жатақ­хана­лар өткен ғасырдың 60-жылдарынан бері жөн­деу көрмеген. Осы орайда, Jas Otan жастар қана­тының төрағасы Елнұр Бей­сен­баев өздері жүргізген рейд нәти­желе­рін ортаға салды. Оның айтуынша, еліміздегі 130 жоғары оқу орнында 600 мыңға жуық студент білім алуда. Бұл көрсеткіш өткен жылғымен салыстырғанда 10%-ға өскен. Бүгінгі таңда 85 мың­нан астам қазақстандық сту­­дент жатақханадағы орынға мұқ­таж.

Комитет төрағасы Павел Казан­цев аймақтар мен орта­лық­тағы ақпа­рат­тар­да сәйкес­сіз­діктер байқа­ла­тынын айтты. Жатақ­ханалар құры­лысының мерзімі көбіне бюро­кра­тия­лық кі­ді­рістерге байланысты ұз­ақ­­қа созылады. Ал кейбір жағ­дайларда университеттер бас­шы­лығы ескі ғимараттарды қал­пына келтіру арқылы жаңа орындар жасадық деп көрсетеді.

– Білім ордалары жаңа жа­тақ­хана­лар­дың пайдалануға бе­ріл­генін хабар­лағанымен, біз­дің жұмыс тобымыз шын мә­нінде жатақхана құры­лы­сы­ның әлі жүріп жат­қа­нын анықтады. Мұндай көз­бояу­шы­лықпен айналысатындарды ерекше бақылауда ұстаймыз. Nur Otan партиясының Төрағасы – Елбасы Нұрсұлтан На­зарбаев студенттердің өмір сүру жағ­дай­ларын тексеруді және жа­тақ­ханалардағы орындар­ды бө­лу­де жемқорлыққа жол бе­ріл­­меуін бақы­лау­ды тапсырды. Сон­дықтан партия бұл мәселені үне­мі бақылауда ұстайды, – деді П.Казанцев.

 

Соңғы жаңалықтар

Семейге жаңа әкім тағайындалды

Тағайындау • Бүгін, 11:57

Алматыда 10 кітапхана жаңартылды

Аймақтар • Бүгін, 10:47

Қазақстан «қызыл» аймаққа кірді

Қазақстан • Бүгін, 09:30

Жыр бәйгесі мәресіне жетті

Әдебиет • Бүгін, 07:14

Өнертапқыш өрен

Аймақтар • Бүгін, 07:13

Садақ туралы сабақ

Аймақтар • Бүгін, 07:10

Жафаровтың жеңісті жолы

Бокс • Бүгін, 07:04

Елін ойлаған Ер Едіге

Руханият • Бүгін, 07:00

Ресейдегі наразылық

Әлем • Бүгін, 06:54

Бауырбектің батылдығы

Қоғам • Бүгін, 06:36

Цифрлы офицер де болуы мүмкін

Технология • Бүгін, 06:30

Індет ауқымы ұлғайып келеді

Коронавирус • Бүгін, 06:30

Ұқсас жаңалықтар