Жиынға қатысқан Экология, геология жəне табиғи ресурстар министрі Мағзұм Мырзағалиев қоршаған ортаны сақтауда волонтерлердің орны ерекше екенін айта келіп, жастарды бұл бағытта бірлесіп жұмыс атқаруға шақырды. Ведомство басшысының айтуынша, қазір адам мен табиғаттың арақатынасындағы үйлесімділіктің жоқтығынан қоршаған ортаның архитектурасы алаңдатарлық халге жетті. Сол себепті экологиялық сананы өзгертпесек, табиғатты құрдымға жіберуіміз мүмкін.
– Биылғы жыл елімізде Волонтер жылы деп белгіленді. Осы орайда біз сана-сезімді және білімімізді шыңдауымыз керек. Ол үшін волонтерлер керек. Елімізде экологияға қатысты мәселе көп. Бұл мәселелерді шешуде еріктілердің көмегі сөзсіз қажет. Ең бастысы – бір-бірімізге қол ұшын созуға дайынбыз. Осы жиыннан кейін волонтерлердің қатары артады. Экологиялық сананы өзгертетін оң істер қолға алынады деген сенімдемін, – деді М.Мырзағалиев.
Экология, геология және табиғи ресурстар министрлігі бұл басқосудың өңірлердегі бірлескен экологиялық жобалардың басталуына серпін беретініне сенімді.
– Былтыр «Бірге – Таза Қазақстан» акциясы барысында мыңдаған тонна қоқыс жиналды. Осы ақцияға қазақстандықтар жаппай тартылды. Мұндай бастамаларды қоғам қолдайды әрі бірлесіп жүзеге асыруға ниетті. Бүгінгі құрылтайда барлық еріктілермен жеке танысып, бірлескен жобалар талқыланады. Дәл осы мақсатта Қазақстанның әр өңірінен еліміздегі экологиялық бастамалардың жүзеге асырылуын қадағалап отыратын амбассадорлар анықталады, – деді министр.
Волонтер жылы аясында министрлік «Birgemiz: Taza Álem» атты жалпыұлттық жобаны іске асыруды жоспарлап отыр. Соған сәйкес волонтерлердің деректер базасы жасалып, «Taza álem» атты еріктілердің 3 әдістемелік қолдау орталығы құрылмақ.
Басқосуда қоқысты сұрыптау, қатты-тұрмыстық қалдықтарды тұтыну мен оның пайда болуын азайту, экологиялық сана мен тәрбиенің маңызы, жануарлар мен өсімдіктер дүниесін сақтау, браконьерлермен күрес сынды маңызды мәселелер қозғалды. Кездесудің нәтижесінде жол картасы әзірленіп, белсенділердің барлық бастамалары мен ұсыныстары енгізіледі.
