Облыстық Тауарлар мен көрсетілетін қызметтердің сапасы мен қауіпсіздігін бақылау департаменті баспасөз қызметінің берген мәліметтеріне сүйенсек, өңірдегі Майқапшағай, Бақты кеден бекеттері бақылауға алынып, коронавирус инфекциясының алдын алатын барлық қажетті дезинфекциялық құрал-жабдықтармен қамтамасыз етіліпті. «Тепловизорлар мен изолятор бөлмесі бар. Департаменттің медицина қызметкерлері мен мамандары Қытай мен өзге елдерден келген адамдарға медициналық бақылау жүргізіп отырады. Олардың барлығына мониторинг жасалады. Ешқандай вирустық инфекция белгілері анықталған жоқ. Облыста 100-ге жуық Қытай азаматтары жұмыс істейді. Олардың барлығы тиісті мекемелердің қадағалауында» дейді аталған департаменттің баспасөз хатшысы Бағлан Тауанова.
Коронавирустың алдын алу мақсатында облыста жедел штаб құрылғаны белгілі. Штаб ұсынған мәліметтерге сүйенсек, өңірге келіп жатқан адамдардың барлығы медициналық ұйымдардың бақылауына алынған. «Бүгінде облысқа келуші адамдардың саны 8733 адамды құрайды. Оның 8660-ы – Қазақстан азаматтары, 73-і – шетел азаматтары. Қазіргі таңда аймақтағы инфекциялық төсектер саны – 500. Қосымша 523 орын әзір. Вирусқа қарсы препараттар қоры жеткілікті. Медициналық ұйымдарға 1 типті қорғаныш костюмдерінің 13932 данасы жеткізілген. Қосымша 7371 данаға өтініш берілген», дейді штаб өкілдері.
ӨСКЕМЕН
