Қолданыстағы заң бойынша мәйіттік донорлық үшін туыстарының рұқсатын алу міндет емес

Медицина • 19 Ақпан, 2020

Қолданыстағы заң бойынша мәйіттік донорлық үшін туыстарының рұқсатын алу міндет емес – маман

77 рет көрсетілді

«Қазақстан» телеарнасындағы «Ашық алаң» бағдарламасында тікелей эфирде Мәжілісте қарастырылып жатқан Денсаулық кодексінің жаңа жобасы талқыланды.

Egemen Qazaqstan

Тікелей эфир барысында бағдарламаға қатысқан Транспланттауды үйлестіру жөніндегі республикалық орталығы директорының міндетін атқарушы Әділ Жұмағалиев тікелей эфирде қазір қызу талқыға түскен донорлық туралы түсіндірді.
«Он жылдам асты, 2009 жылдан бері біздің әріптестеріміз бірінші кодекске сай жұмыс істеп жатыр. Қазір қоғамда кең талқыланған мәйіттік донорлыққа қатысты бап жаңа норма емес. Келісім презумпциясы 2009 жылы енгізілген. Біз транспланттау бойынша қазіргі таңда әлемде көш бастап тұрған испандық модельмен жұмыс істеп жатырмыз», - деді Әділ Жұмағалиев.
Оның айтуынша, осы күнге дейін орталық дәрігерлері 95 мәйіттік донор анықтап, әрқайсысында туыстарынан рұқсат алған.
«Дәрігерлер өздері мәйіттің туыстарынан рұқсат алып жүрді. Дегенмен, бірінші кодексте дәл осы жер көрсетілмеген. Яғни, қолданыстағы кодексте туыстарының рұқсатын алу туралы айтылмаған. Ал қазір енгізілген өзгеріске сай, жаңа Кодекс бойынша ай адам қайтыс болған соң оның тірі кезінде донорлыққа келіскен немесе бас тартқаны туралы ешқандай ақпарат жоқ болса, туыстарынан рұқсат сұраймыз», - деді ол.
Ал бағдарламаға қатысқан қоғам қайраткері Мұрат Әбенов осы күнге дейін адам донорлыққа қарсы бола алғанымен, оны тіркейтін жердің, ресми мәлімдейтін орынның болмағанын айтты.
«Сонда мен барып донорлыққа ағзаны беруге қарсымын деп айтайын десем, баратын жер жоқ. Яғни, мен қарсы болмасам, онда автоматты түрде келісім берген болып саналамын», деп наразылық білдірді.
Айта кету керек, бүгінгі таңда әлем бойынша бір миллион адам донорларға мұқтаж болып отыр.