Елордадағы «Қазақстан Медиа орталығында» Қазақстан Республикасы Президенті жанындағы Орталық коммуникациялар қызметінің ұйымдастыруымен ұлттық тарихты зерделеу тақырыбына арналған баспасөз брифингі болып өтті.
Елордадағы «Қазақстан Медиа орталығында» Қазақстан Республикасы Президенті жанындағы Орталық коммуникациялар қызметінің ұйымдастыруымен ұлттық тарихты зерделеу тақырыбына арналған баспасөз брифингі болып өтті.
Ұлттық тарих ғылымын реформалау жолдарын түсіндіру, тарихшы ғалымдардың қызметін үйлестіру, толыққанды тарихи көзқарасты қалыптастыру мақсатында атқарылып жатқан істерден хабардар етуді көздеген басқосуға белгілі тарихшылар мен қоғам қайраткерлері қатысып, өз ой-пікірлерін білдірді.
Шара негізінен Л.Н.Гумилев атындағы Еуразия ұлттық университеті ғалымдарының қатысуымен өткендіктен, осы ұжымның тындырған және алда атқарар жұмыстары әңгіме өзегіне айналды.
Мұнда «Қазақстан тарихшыларының ұлттық конгресі» жұмыс істеуде. «Отан тарихы» сериясымен 20 томдық еңбек шығарылмақ. Өткен жылы Лев Николаевич Гумилевтің 100 жылдық мерейтойына арналған халықаралық ғылыми форум ұйымдастырылған болатын. Университет ұжымы «Гумилев әлемі» және «Еуразия мәселелері» сериясымен жиырмадан астам кітап, қазақша оқу құралдарын басып шығарды. Сонымен қатар, оқырманға тұңғыш рет даңқты ғалымның өмір жолы мен ғылыми шығармашылығына арналған «Лев Гумилев» энциклопедиясы ұсынылды. Сондай-ақ, елімізде тұңғыш рет университет қабырғасында Қазақстан халқы Ассамблеясы кафедрасының тұсауы кесілсе, ЮНЕСКО кафедрасын ашу мәселесі қарастырылуда. Қазақстан тарихшыларының ұлттық конгресі аясында алыс және жақын шетелдегі 25 елге таралатын халықаралық ғылыми-танымдық журнал жарық көрмек.
Ұлт тарихын түгендеуге қатысты қойылған журналистердің сұрақтарына Л.Н.Гумилев атындағы Еуразия ұлттық университетінің ректоры, тарих ғылымдарының докторы Ерлан Сыдықов, көрнекті публицист, Қазақстан Ұлттық жаратылыстану ғылымдары академиясының академигі Ғаділбек Шалахметов, мемлекетіміздің Елтаңбасы авторларының бірі, Л.Н.Гумилев атындағы Еуразия ұлттық университеті кафедрасының профессоры Жандарбек Мәлібеков, «Еуразия» гуманитарлық ғылыми-зерттеулер орталығының директоры, тарих ғылымдарының докторы Зиябек Қабылдинов пен Л.Н.Гумилев атындағы Еуразия ұлттық университетінің профессоры Майдан Құсайынов жан-жақты жауап берді.
Берік САДЫР,
«Егемен Қазақстан».
