Оған Ақпарат және қоғамдық даму вице-министрі Ғабидолла Оспанқұлов, Сенат депутаты, Әлеуметтік, мәдени даму және ғылым комитетінің мүшесі Айгүл Қапбарова, Нұр-Сұлтан қаласы Азаматтық бастамалар орталығының басшысы Махаббат Еспенова, «Байтақ болашақ» экологиялық альянсы» республикалық қоғамдық бірлестігінің жетекшісі, Ұлттық қоғамдық сенім кеңесінің мүшесі Азаматхан Әміртаев, үкіметтік емес ұйымдардың басшылары мен мүшелері, БАҚ өкілдері қатысты.
– 2014 жылы 27 ақпан – Дүниежүзілік үкіметтік емес ұйымдар күні болып белгіленді. Бұл ұйымның мүшелерін пайда көзін табуды емес, мемлекеттің, қоғамның, әр адамның мүддесі үшін өзінің бар күш-жігерін салатын азаматтар деп есептейміз. Үкіметтік емес ұйымдарға адамдар әртүрлі жағдаймен келеді. Бірі – өзі зардап шегіп келсе, енді бірі туған-туыстары, достары зардап шегіп келіп жатады. Үшіншілері өзінің азаматтық позициясын танытады. Сондықтан үкіметтік емес ұйым – ортақ мүддені көздейтін, ел дамуына серпін беретін қозғаушы күш деуге болады. Ендеше, мемлекеттің парызы – осындай ұйымдарға әрқашан қолдау көрсету, – деді Ғ.Оспанқұлов.
Оның айтуынша бүгінде ел аумағында 22 мыңға жуық үкіметтік емес ұйым тіркелген. Солардың белсенді дегені 14 мыңға жетіп отыр. Бұл ұйымдардың жұмысын жандандырып, іс-шараларды өткізуге қолдау білдіру мақсатында 20 млрд теңгеден астам қаражат бөлінеді. Соның 3 млрд теңгесі гранттық қаржыландыру болса, қалған 17 млрд теңге мемлекеттік-әлеуметтік тапсырысқа негізделген. Сондай-ақ азаматтық қоғамды дамытудың 2025 жылға дейінгі тұжырымдамасы әзірленуде.
– Кез келген мемлекеттің дамуының алғышарты – азаматтық қоғамды дамыту. Бұл бағытта үкіметтік емес ұйымдар ауқымды жұмыс атқарып жатыр. Себебі азаматтық қоғамды дамыту барысы өте ұзақ жүретін процесс. Азаматтық қоғамы дамыған ел ретінде АҚШ-ты жиі тілге тиек етеміз. Оған қол жеткізу үшін АҚШ-қа 240 жыл керек болды. Сондықтан бұл өте баяу жүретін процесс дер едім. Бірақ соған қарамастан, елімізде азаматтық қоғамды дамытуға деген қадам оң бағытқа ие, – деді А.Қапбарова.
Осы күнге орай Азаматтық бастамаларды қолдау орталығы үкіметтік емес ұйымдар мен мемлекеттік органдар арасында әріптестік орнату, оларды қолдау мақсатында кейінгі екі жыл мұғдарында жоспарлы түрде іс-шара өткізіп келеді.
– Өзіме таныс, өзіме жақын азаматтарды, жаңа тұлғаларды көріп, қуанып отырмын. Яғни, үкіметтік емес ұйымдардың ауқымы кеңейіп, қызметіміз сұранысқа ие болып келеді деуге болады. Бүгінде мемлекет тарапынан үкіметтік емес ұйымдарды дамытуға қатысты ауқымды қолдау көрсетіліп жатыр. Қолдау шаралары жыл санап арта түседі деген сенімдемін. Еңбегіміз еленіп, атқарған жұмысымыз бағаланса – соның өзі үлкен бақыт. Барша әріптестеріме жемісті еңбек тілеймін, – деді М.Еспенова.
Іс-шараның салтанатты ашылуы «Кәсіби және тиімді фандрайзинг», «Қажеттіліктерді бағалау әлеуметтік маркетингтің бір бөлігі», «БАҚ-ты жылжыту» сынды тақырыптар бойынша шеберлік сыныптарға, әлеуметтік кәсіпкерлікке қатысты семинарларға ұласып, қатысушылар өздерін толғандырған сауалдарын жолдай алды.
