Мен – өмірін ұстаздыққа арнап, жан шуағын осы жолдан тапқан бақытты адаммын. 40 жыл ұстаздық еттім. Шәкірттеріме, балаларым мен немерелеріме қазақ даласының қилы тарихы мен бай мәдениеті, салт-дәстүрі туралы үнемі айтып отырамын. Біздің аталарымыз Қазақстанға ХІХ ғасырдың 80-жылдары келіпті. Содан бері, міне, әулетіміздің бесінші ұрпағы жалғасып, осы киелі топырақта тер төгіп, еңбек етіп, баянды ғұмыр кешіп келеміз. Өз басым жусан иісі аңқыған боз даланың бір шетіндегі бұйығы тіршілік кешкен шағын ғана ауылда бой жеттім. Кейін жоғары білім алып, еңбекке араластым. Тұрмыс құрып, ана атанып, әйел бақытын сезіндім. Енем марқұм үш мәрте «Құрмет белгісі» орденін алған еңбекқор адам еді. Атамның қазақ достары көп болатын. Содан болар ол кісі қазақ тіліне де жетік болды. «Анау қазақ көршім болмағанда, мен баяғыда өліп қалатын едім. Көршім құтқарып қалды. Ол болмағанда, бұл күнді көрер ме едім, көрмес пе едім» деп отыратын еді жарықтық.
Бүгінгі шуақты мерекеде мен қазақ халқына өз алғысымды білдіргім келеді. Тәуелсіздік алған 30 жылға жуық уақыт ішінде тілі һәм түрі басқа болса да, тілегі бір арнаға тоғысқан жүзден астам этнос өкілі киелі Көк байрақтың астында тату-тәтті бейбіт өмір сүріп келеді. Бұл, ең алдымен, осы елді ежелден мекен етіп келе жатқан қазақ халқының парасаты мен дархандығының арқасында орнаған игілік деп ойлаймын.
Алғыс айту күні – Елбасымыз Нұрсұлтан Назарбаев негізін қалаған татулық пен тұрақтылықтың мерекесі, бірлік пен берекенің белгісі. Тұңғыш Президентіміз бұл мерекенің мән-маңызы туралы «Осынау айтулы күні қиын-қыстау жылдары адамгершілік пен имандылық үстемдігінің жадымызда болуы Қазақстан халқын біріктіреді. Мейірімділік, өзара көмек және бір-біріне деген құрмет қазақтың киелі топырағында күллі қазақстандықтарды көздің қарашығындай сақтайтын әрі мақтан тұтатын достық пен өзара түсінушілік бірегей атмосферасын қалыптастыруға мүмкіндік береді. Өз отандастарымызға және туған өлкеге деген кіршіксіз алғыс сезімі бұл мерекеге ерекше терең мағына береді. Сондықтан Алғыс айту күнінің басты мәні – тарихи жадыны сақтау, ұрпақ сабақтастығы мен іргесі берік негіздегі ел бірлігін нығайту», деп еді. Біз осыны ұмытпауымыз керек. Өйткені Қазақстанда тұратын халықты ырыс-ынтымаққа үндейтін бұл мереке елімізге аса қажет. Себебі қазақ жеріне сұрапыл соғыстың алдында да, одан кейін де қоныс аударғандар көп. Қазақтар олардың ешқайсысының кеудесінен итерген жоқ. Қиын кезеңде киім беріп, бауырына тартып, адал дәмін, достық жүрегін ұсынған халыққа бір күн ғана емес, ай сайын, тіпті, апта салып алғыс айтсақ та артық емес.
Бүгін жүзден астам этностың алтын бесігіне айналған Қазақстан атты ұлы Отанға тағзым етіп, тізе бүгіп Көк туды сүйетін күні. Ақын Мұқағали Мақатаевтың «Жақсы аттанды демессің, сүйем десем, Табынатын тәңірім, ием де сен!» дейтін өлең жолдары бар. Мені жақсы аттанды деп ойламаңыздар! Мен Қазақстанымды, оның халқын, тауы мен тасын, өзен-суын байтақ даласын, саф ауасын шынайы сүйген адаммын! Жүрегімді толқытып тұратын осы бір ұлы сүйіспеншілік үшін баршаңызға Алғыс айтамын!
Александра СУСЛОВА,
облыстық Қоғамдық келісім кеңесінің мүшесі
Қостанай облысы
