Қоғам • 04 Наурыз, 2020

Оқушылардың озық жобалары

40 реткөрсетілді

STEM білім беру республикалық форумында оқушылардың ғылыми жұмыстары, инновациялық әдістері мен зерттеу жобалары таныстырылды. Жетпістен аса оқушы қатысқан іс-шараны «Мирас» халықаралық мектебі, STEM академиясы мен елорда әкімдігінің Білім беруді жаңғырту орталығы бірлесіп ұйымдастырды.

STEM – оқытудың біріктірілген тәсілі. Бұл білім беру әдісі балаларға әлемнің кез келген жерінде, әрбір әрекетте, барлық пәнде, бүкіл салада, тіпті санада ғылымның бар екенін көрсетуді, зерттеуге үйретуді көздейді. Қазір STEM әлемдік білім беру­дің басты трендтерінің біріне айналды және осы бағыттағы мамандарға сұраныс көп. Себебі әр салаға сараптай алатын, бола­шақты болжап, бүгінін бағамдайтын қыз­меткер керек. Әлемдегі алдыңғы қатар­лы елдер STEM бойынша білім беруді мемлекеттік бағдарламаларына енгізген.

«Мирас» халықаралық мектебінің 9-сыныбында оқитын Әсел Әділбекқызы биология сабағында 2 жылдан бері «Акуапоника» әдісін зерделеумен айналысып келеді. «Акуапоника» (Aquaponics) акуариумдегі суды бірнеше мәрте тазартып, қайта қолдану­ға негізделген.

– «Акуапоника» – акуа мәдениет пен гидро­­пониканың қосылуынан туған. Гидро­поника – өсімдіктерді топырақсыз өсіру­ге бағытталған тәсіл. Аквариумдегі балық­тар шығаратын қалдықтардың құра­мында аммиак және микроэлементтер болады. Осы аммиак және микроэлементтері бар суды өсімдіктерге тартамыз. Ал топы­рақсыз өсіп жатқан өсімдіктер аммиак пен микроэлементтерді тыңайтқыш секілді қол­данады. Өсімдіктер қажетті заттарды су құрамынан бойына сіңіргенде су бас­тапқы қалпына келіп, тазарады. Сол тазар­тылған су қайтадан аквариумдегі балықтарға келеді, – дейді Ә.Әділбекқызы. Зерттеушінің айтуынша, бұл әдіспен жұмыс істегенде акуариумдегі балықтардың суын ауыстырып отырудың қажеті жоқ. Балықтарға жем шашудан басқа ешқандай физикалық күштің керегі болмайды, яғни су өздігінен тазартылып тұр және өсімдіктер топырақсыз өсіп, өздігінен суарылып жатыр.

Ал бас қаладағы №81 гимназияның 6-сынып оқушысы Ержұман Арлан форумға роботтехника қосымша пәнінен әзірлеген дабыл қаққыш құрылғысын таныстыруға келіпті. Ол мұғалімімен бірге құрастырған құралын жер үй макетінің қақпасына орналастырған. Ұры қақпадан өтуге әрекет­тенсе, лазер жанып, дереу құрылғыға белгі береді, сол сәтте дабыл қағылады. Оқу­шы бұл құралының батарея көмегімен қуатталатынын және қазіргі қолданыстағы дабыл қаққыш құрылғыларға қарағанда оңай құрастырылатынын айтты. Құрал әдеттегі техникалық заттар дүкенінде сатылатын Arduino материалдар жинағынан құрастырылған.

Мұнда өз өнімдерін, еңбектері мен жобаларын таныстыруға келген оқушылар әр пәнге кіріктірілген STEM білім берудің нәтижесі бойынша жиған дағдыларын тәжі­рибеде, яғни белгілі бір игілікке қол­дануға әрекеттеніп жүр. Бірі қолөнерге қызы­ғушылығы арқылы экологикалық таза сөмкелер тігуді қолға алыпты. Ақиқатында, бұл – еңбек пәнінде орындайтын тапсырма. Бірақ экологиялық таза сөмкенің қандай болатынын білу үшін оған қажетті материалдарды зерттеу керек және ғылыми негізіне тереңдеуге тура келеді. Енді бір қатысушы әскери мектептің білім алушысы ретінде қорғаныстың жаңа жүйесін іске қосуға талпынып жүр. Тағы бір оқушылар тобы әлемдік әдістерді қолданып су тазартқыштың үлгісін әзірлеуде. Ал келесі бірі экологиялық таза машина жасау жолында еңбектеп жатыр.

Білім және ғылым вице-министрі Рүстем Биғари ведомствода STEM технологиясын еліміздегі мектептердің білім беру жүйесіне енгізу жолдарын қарастыратын арнайы кеңес құрылатынын жеткізді.

– Келесі жылдан бастап барлық облыс­та STEM зертханаларын ашу үшін 5 жылға 30 млрд теңге бөлінеді. Бұл қаражат зерт­хана­ларды жабдықтауға жұмсалады. Ал биыл әр өңірдегі өкілдерімізбен, білім беру ұйымдарымен STEM білім беру бойынша жұмыстың барысы талқыланды. Бір мектепте 3 пәннен STEM зертханаларын ашуды көздеп отырмыз, – деді Р.Биғари.

Форум аясында STEM білім беру сала­сындағы мәселелер мен мүмкіндіктер тал­қы­ланып, Нұр-Сұлтан қаласында жұмыс істеп жатқан зертханалардағы STEM-жобаларының көрмесі қойылды. Білім беру саласындағы беделді спикерлер баяндама жасап, STEM технологияларын енгізу бо­йынша шеберлік сыныптар өткізді.

 

Соңғы жаңалықтар

Шымкентте 22 адамнан Covid-19 анықталды

Коронавирус • Бүгін, 10:05

Ғасыр зұлматы

Қоғам • Бүгін, 09:30

Із қалдырған ірі тұлға

Қоғам • Бүгін, 07:06

Қосаевтар әулетінің қасіреті

Руханият • Бүгін, 06:56

Құрдым (төрттаған)

Әдебиет • Бүгін, 06:20

Ұқсас жаңалықтар