Мектепке дейінгі білім. Министрдің хабарлауынша, балабақшалар еліміздегі төтенше жағдайға байланысты штаттық режімде жұмыс істейді. Балалардың мектепке дейінгі ұйымға бару-бармауын ата-аналар шешеді. Келмегені үшін балабақшадан шығарылмайды, яғни баланың орны сақталады. Қазіргі таңда балалардың 40 пайызы ғана мектепке дейінгі мекемеге барып жүр.
Орта білім. Оқушылар 2020 жылғы 16 наурыздан бастап 5 сәуірге дейін көктемгі демалыста болады. Мұғалімдер аталған мерзімде қашықтықтан жұмыс істейді. Ал мектеп директорлары мұғалімдердің қашықтықтан жұмыс істеуі және каникул кезінде атқарылатын жұмыс көлеміне сай жалақыны толық төлеу туралы актілерді қабылдайды. Егер каникулдан кейін де оқушылар мектепке бара алмаса, оларды қашықтықтан оқытудың мүмкіндіктерін министрлікте құрылған арнайы топ қарастырмақ. А.Аймағамбетов мектеп оқушыларын қашықтықтан оқытуға дайындықтың 5 сәуірге дейін аяқталатынын айтты. Сондай-ақ педагогтердің біліктілігін арттыру курстары онлайн-форматта өткізіледі. Кейбір курстарды өткізу биылғы жылдың екінші жартыжылдығына ауыстырылды.
Қосымша білім. 16 наурыздан бастап мемлекеттік қосымша білім беру ұйымдарының (оқушылар мен жасөспірімдер сарайы, музыка, көркемсурет, өнер мектептері және тағы басқа) қызметі тоқтатылды. Ведомство жанындағы Балалардың құқықтарын қорғау комитеті қазіргі жағдайды ескере отырып, ата-аналарға балаларын жекеменшік дамыту орталықтарына да жібермеуге кеңес береді.
Кәсіптік және техникалық білім. Колледждерде қашықтықтан оқыту мәселесі бойынша бірқатар қиындық бар. Барлығында бірдей мүмкіндік болмай тұр. Соған қарамастан колледждердің басым бөлігі тиісті жүйе бойынша жұмыс істеп көрген. Қалғандары қатарға қосылып келеді. Қазір арнайы жүйелерге контент жүктеу, оқу-әдістемелік кешенді енгізу, сондай-ақ сандық білім беру ресурстары бойынша ауқымды жұмыс атқарылып жатыр.
Жоғары білім. Қашықтықтан оқыту жүйесі отандық университеттердің білім беру үдерісі үшін жаңалық емес. Білім және ғылым министрлігі бұйрыққа қол қойған сәттен бастап, арнайы технологияларды пайдаланып жүрген кейбір ЖОО-лар онлайн-форматта оқытуды бастап кетті. Оқу процесін ұйымдастыру үшін оқытушылар мен студенттерге электронды платформаларға кіруге жағдай жасалады. Оқыту құралы ретінде видео-сабақтар, дербес онлайн-жұмыс, онлайн-курстар пайдаланылады. Бізде «Bilimland», «Google Classroom», «MOODLE», «Univer», «Platonus», «Canvas», «Daryn.online» сынды жақсы жүйелер бар. Сондай-ақ «Coursera» өз курстарын тегін ұсынды және «ZOOM» оқыту барысында сервисті ақысыз қолдануға мүмкіндік бар.
Министр мәлімдегендей, билет немесе қаржы тапшылығы сынды әртүрлі жағдайларға байланысты қаладан кете алмайтын студенттер жатақханаларда тұра береді. Бірақ олар тек өз бөлмелерінде болулары тиіс.
Айта кетейік, төтенше жағдай кезінде білім алушылар мен тәрбиеленушілердің халықаралық спорттық, мәдени, туристік іс-шараларға қатысуына және бұқаралық шараларды ұйымдастыруға тыйым салынды. Сонымен қатар жалпы білім беретін пәндер бойынша оқушылардың республикалық олимпиадасы мен ауыл мектептеріне арналған «Мың бала» Ұлттық зияткерлік олимпиадасының IV кезеңін және басқа да конкурстарды өткізу мерзімі кейінге шегерілді.
