Карантин – шектеу, коменданттық уақыт

Қоғам • 18 Наурыз, 2020

Карантин – шектеу, коменданттық уақыт – тыйым салу

560 рет көрсетілді

19 науыз күні түнгі сағат 00.00-ден бастап, еліміздің екі үлкен шаһары – Нұрсұлтан мен Алматы карантинге жабылады. Бүкіл бір қаланы жабу тәуелсіз мемлекеттің тарихында болмапты. Сондықтан болар, мұндай төтенше жағдайды түсінбей, дал болып жүргендер көп.

Egemen Qazaqstan

Карантин дегеніміз – шектеу, яғни қалаға сырттан кіріп-шығуға тыйым салынады. Тарата айтсақ, елордаға өзге өңірлерден қатынайтын автобустар жүрмейді. Қалаға кіріп-шығу бекеттеріне шектеу қойылып, сырттың көліктерін кіргізбейді. Ал сіз карантин уақытына дейін шаһардан шығып кеткен болсаңыз және осы қала тұрғыны болсаңыз, тұрғылықты жеріңізге қайтадан кіре аласыз.
Бұл карантиннің басты мақсаты – коронавирус індетін ел арасында өршітпеу, сол арқылы тұрғындардың денсаулығын қорғап, қауіпсіздігін сақтау. Сондықтан Нұрсұлтан мен Алматы айналасындағы барлық бекетке азаматтардың қызуын өлшейтін құрылғысы бар қосымша пункттер орнатылады.

Бұдан бөлек, ірі ойын-сауық орталықтары уақытша жұмысын тоқтатады, халыққа қызмет орталықтары қысқарған режиммен жұмыс істейді. Бірақ азық-түлік дүкендері, дәріханалар, көлік жуатын орындар жұмысын жалғастыра береді. Демек, тұрғындар да керек кезде үйінен шығып, қажетті азығын, дәрі-дәрмегін сатып ала алады. Халықтың жүріс-тұрысына шектеу жоқ. Алайда шектеу жоқ екен деп көзге көрінген орынды жаппай аралап кетуге болмайды, әркім өзінің және жақындарының денсаулығы үшін үйде отырғаны абзал. Саналы адам ел билігінің жасап отырған сақтық шарасына жауапкершілікпен қарайды деп ойлаймыз.

Көпшілік карантинді барлық қозғалысқа тыйым салу деп те түсініп жүр. Олай емес. Мұндай тыйым салуды коменданттық уақыт дейді. Жұртшылыққа мәлім, елімізде коменданттық уақыт бұрыннан бар. Атап айтқанда, еліміздің заңы бойынша, кәмелеттік жасқа толмаған жеткіншектер ойын-сауық мекемелерінде түнгі сағат 22.00-ден таңғы 6.00-ге дейін жүруге болмайды, бұл – тыйым салынған коменданттық сағат. Ал карантин – коменданттық уақыт емес, тек шектеу, ел арасындакүрделі эпидемиологиялық жағдайды туғызбау үшін мемлекеттің жасап отырған алдын алу шарасы.

Өзге елдер карантинді вирустық инфекция әбден тарап, ауыздықтау мүмкін болмай бара жатқанда жариялайды. Ал Қазақстан індеттің алдын алу үшін енгізді. Бұл ең алдымен халықтың қамы үшін жасалып отыр. Сондықтан елдің тұтастығы сыналар осындай маңызды сәтте бәріміз ауызбіршілік танытып, ауруды бірге жеңуге атсалысқанымыз жөн.

Қымбат ТОҚТАМҰРАТ

Күннің маңызды және өзекті жаңалықтарын «Егемен Қазақстан» телеграм каналынан оқыңыз