«Брифингті жақсы жаңалықтан бастағым келіп отыр. Екі емделуші коронавирустан айықты. Қазір олар соңғы тексеру сараптамаларын тапсыруда. Бұйыртса, ауруханадан ертең шығады. Бұл біздің коронавируспен күрестегі жеңісіміз», деген ведомство басшысы Үкіметтің және барша қазақстандықтың атынан медицина қызметкерлері мен Денсаулық сақтау министрлігінің қызметкерлеріне алғыс айтты.
Ақпарат және қоғамдық даму министрі 109 нөміріне хабарласып, азық-түлікке тапсырыс беруге болады деген ақпараттың жалған екенін, оны таратқан адамдардың заңға сәйкес жазаланатынын айтты. «Кеше ғана мен Президент тапсырмасы бойынша тегін азық-түлік жиынтығы туралы ақпарат жария еткен болатынмын. Оны азаматтардың 4 санаты ала алатынын еске салғым келеді. Бірінші санат: атаулы әлеуметтік көмек алатын аз қамтылған отбасылардың 6 жастан жоғары балалары. 2, 3, 4-санат: карантиндік аймақта тұратын азаматтар. Нақты айтқанда, АӘК алатын отбасылардың барлық ересек мүшесі, соның ішінде көп балалы отбасылар, барлық жастағы 1 және 2-топтағы мүгедектер мен мүгедек балалар, мүгедек баланың күтімімен отырған ата-аналар», деді министр.
Карантиндегі Нұр-Сұлтан мен Алматы қаласының жағдайына тоқталған Д.Абаев екі мегаполиске көліктер мен адамдар әкімдік тізімі бойынша кіріп-шығатынын айтты. Оның айтуынша, «Сергек» жүйесін жасаушы компания полиция департаментінің планшеттеріне арнайы мобильді қосымша енгізген. Полиция қызметкерлері бұл арқылы көліктің нөмірі мен жүргізушінің рұқсат етілген тізімде бар-жоғын анықтап, кіріп-шыққан көліктер мен адамдарды есепке алады.
Тізімнің қатарында қалаға азық-түлік, дәрі әкелетін адамдар мен көліктер енгізілген. Маска мәселесіне тоқталған министр бүгінде елімізде тігін цехтары фармацевтикалық компаниялармен бірлесіп күніне 850 мыңға жуық маска тігіп жатқанын атап өтті. Бұл маскаларды Денсаулық сақтау министрлігі барлық өңірге таратуда. Оның айтуынша, қазіргі уақытта елімізде 70 тігін цехы маска тігіп жатыр.
Төтенше жағдай режіміндегі шектеулерге қарамастан барлық өңірде тойлар мен жиындар, салтанатты шаралар өтіп жатқанын, кафелер мен интернет-клубтар, балаларға арналған үйірмелер жұмыс істеп тұрғанын жеткізген Д.Абаев осындай 313 дерек анықталғанын хабарлады. Оның 94-і жауапқа тартылып, 64-і қамауға алынған. «Бірден айтайын, азаматтарымыздың басым бөлігі төтенше жағдай режімі талаптарына түсіністікпен қарайды. Дегенмен барлығы бірдей емес. Негізінен заңбұзушылықтар Әкімшілік құқық бұзу туралы кодекстің 476-бабы бойынша орын алуда. Жауапкершілік шарасы – 10 АЕК-ке дейін айыппұл немесе 15 тәулікке қамау», деді ол.
Сондай-ақ төтенше жағдай кезеңінде табысынан айырылған Қазақстанның жұмыс істейтін азаматтары Мемлекеттік әлеуметтік сақтандыру қорынан ақшалай төлем алады. Жаңа төлем Қазақстан аумағында жұмыс істейтін ел азаматтарына беріледі. Төлем алудың арнайы шарттары бар. Алдымен төтенше жағдайдың жариялануына байланысты жалақысы сақталмай демалысқа жіберілген жұмысшыға әлеуметтік төлем беріледі. Төлем алу үшін төтенше жағдай енгізілген датаға дейінгі соңғы 12 айдың кемінде 3 айында Мемлекеттік әлеуметтік сақтандыру қорына жұмысшы үшін аударым жасалуы қажет. Әлеуметтік төлем орта, шағын және орта бизнес жұмысшылары үшін ғана жүзеге асырылады. Жаңа әлеуметтік төлемді тағайындау үшін жұмыс беруші жұмыспен қамту мәселелері жөніндегі жергілікті органға жүгініп, төтенше жағдай кезінде қызметінің шектелуіне байланысты жұмысшысының кірісінен айырылатынын дәлелдейтін құжат ұсынуы қажет. «Кеше хабарлағанымдай, БАҚ пен азаматтардан түсіп жатқан сауалдардың басым бөлігі төтенше жағдайдың енгізілуіне байланысты табысынан айырылғандарға ақшалай төлем жасауға қатысты болып отыр. Жалақысыз еңбек демалысына мәжбүрлі түрде шығуына байланысты төтенше жағдай кезеңінде кірісінен айырылған Қазақстанның жұмыс істейтін азаматтары Мемлекеттік әлеуметтік сақтандыру қорынан төлем алады. Бір жұмысшыға әлеуметтік төлемнің көлемі айына 1 ең төменгі жалақыны немесе 42,5 мың теңгені құрайды», деді ведомство басшысы.
Министр халық бірінші кезекте тұтынатын тауарлардың тапшылығы болмайтынын тағы да атап айтты. Оның айтуынша, төтенше жағдайға байланысты Қазақстан Үкіметі 9 түрлі тауарды экспорттауға тыйым салған. Оларды қазір сауда желілері, өңірлік азық-түлік бағасын тұрақтандыру қоры, көтерме сауда жасаушылар сатып алуда. «Сауда орталықтарындағы кезек азайып келеді. Осы ретте халық бірінші кезекте тұтынатын тауарлардың тапшылығы болмайтынын тағы да айтқым келеді. Қазірдің өзінде көптеген өндіруші өз өнімдерін ішкі нарыққа бағыттағанын байқап отырмыз. Сондықтан осындай күрделі уақытта өз еліне көмектесіп жатқан кәсіпкерлерге алғыс айтамыз», деді Д.Абаев.
Министрдің айтуынша, Үкімет коронавируспен күресу үшін бұрын-соңды болмаған ауқымды шаралар атқаруда. Жағдайдың күрделі екенін, халықтан мамандар айтқан қарапайым қағидаларды ұстануын өтінген ол: «Қолыңызды жиі жуыңыз, әр жуғаныңыз 20 секундтан кем болмасын. Үйден шықпаңыз. Далаға шықсаңыз маска тағыңыз және адамдармен 2 метр аралықты сақтаңыз. Көпшілік болып жиналмаңыздар. Қазір той тойлайтын, қыдыратын уақыт емес. Осы қарапайым шараларды жасау арқылы сіздер өзіңіздің, жақындарыңыздың өмірін сақтай аласыздар», деді.
Айта кетейік, кешегі күннің мәліметтеріне сүйенсек, елімізде коронавирусты 80 адам жұқтырған. Атап айтқанда, Нұр-Сұлтан қаласында – 41, Алматы қаласында – 31, Шымкент қаласында 2 жағдай тіркелсе, Қарағанды қаласында – 2, Алматы облысында – 1, Ақтөбе облысында – 1, Жамбыл облысында – 1, Солтүстік Қазақстан облысында 1 науқас анықталып отыр.
