Қоғам • 06 Сәуір, 2020

Отан қызметіне әрқашан дайын

25 реткөрсетілді

Президент жанындағы Орталық коммуникациялар қызметі алаңында Қорғаныс министрі Нұрлан Ермекбаев «Қазақстан Қарулы Күштерінің аумақ­тық әскерлерін жасақтау үшін әскери міндеттілерді арнайы жиындарға шақыру туралы» Президент Жарлығын түсіндірді.

Жарлықтың негізгі мазмұны – аймақ­тардағы әкімдерге аумақтық қорғаныс бригадасының штаттық құрамына қарай белгілі бір өңірдің қажеттілігі негізінде әскери даярлықтан өтуге міндетті тұлға­ларды шақыруға мүмкіндік беру. Бұл шара ең алдымен азаматтарымыздың қауіпсіздігін тиімді әрі толыққанды қорғауға бағытталып отыр.

Ведомство басшысының айтуынша, Жар­лыққа сәйкес әскери жиындар 3 ай мер­зімге дейін созылуы мүмкін. Алай­да нақ­ты мерзімді жергілікті әкімдер белгі­лей­ді. Олар арнайы қаулы қабылдап, әске­ри жиын ұйымдастырады. Сондай-ақ қажет­­тілікке және барлық іс-шаралардың орын­­далуына қарай жиындарды тоқтата алады.

– Бірқатар аймақта әскери жиын­дарға шақыру мәселесі мүлде қажет болмауы да мүмкін. Әскери бөлім­деріміз орналасқан аймақтарда әскери қызметшілердің басым бөлігі түрлі іс-шараларға жұмылдырылып үлгерді. Әскери қызметшілердің бір бөлігі өзге аймақтарға жіберілді. Жалпы алғанда, Қарушы Күштерге артылған міндеттемелер толықтай орындалуда, – деді Н.Ермекбаев.

«Әскери қызмет және әскери қызмет­ші­лер­дің мәртебесі туралы» Жарлы­ғына сәйкес, әскери есепте тұрған және денсаулығы жарамды деп танылған ел азаматтары арнайы жиындарға шақырылуға жатады. Алайда, мемлекет­тік органдарда қорғанысты, қауіпсіздікті және құқықтық тәртіпті қамтамасыз ететін лауазымдарда жұмыс істейтін адамдар; мемлекеттік, азаматтық және сынақ авиацияның авиациялық қызметкерлері; ауыл шаруашылығында және ауыл шаруашылығы техникасын жөндеу ұйымдарында жұмыс істейтін тұлғалар егіс және орақ жұмыстары кезеңінде; білім беру ұйымдарының күндізгі оқу бөліміндегі педагогтар оқу жылы кезеңіне; білім беру ұйымдарында күндізгі оқу бөлімінде оқитындар; әскери міндетті әйелдер; он сегіз жасқа толмаған үш және одан да көп балалары бар адамдар; қылмыстық заңнамаға сәйкес, оларға қатысты іс жүргізу әрекеттері жүзеге асырылатын адамдар; Парламенттің немесе жергілікті өкілді органдардың депутаттары болып сайланған (тағайындалған) әскери міндеттілер әскери жиындарға шақырудан босатылады.

Жиын кезінде әскери міндеттілер Қарулы Күштердің әскери қызметшісі мәр­тебесін алады және «Әскери қыз­мет және әскери қызметшілердің мәртебесі туралы» Жарлығына сәйкес, оларға әлеумет­тік сипаттағы барлық жеңілдіктер қолданы­лады. Тамақпен, қажетті заттармен және медицинамен қамтамасыз етіледі.

Сонымен қатар әскери жиындар кезе­­ңінде әскери міндеттілердің жұмыс орны және атқаратын қызметі сақталады. Оларға мемлекет есебінен орташа жалақы, ал жұмыс істемейтін адамдарға – ең төменгі еңбекақы мөлшері төленеді. Мәсе­лен, әскери жиынға шақырылғанға дейін әскери қызметшінің жалақысы 200 000 тең­гені құраған болса, жиындағы әр айда ол 200000 теңге алады. Ал ең төменгі еңбек­ақы мөлшері – 42500 теңге.

Ведомство басшысы әскери міндет­ті­лер денсаулығына, отбасы жағдайы­на, жасына қарай қорғаныс істері жөніндегі өңірлік бөлімдер (әскери комитеттер) арқы­лы жиындарға шақы­ры­латынын атап өтті. Жиынға шақыру кезінде еріктілерге бірқатар артық­шылық беріледі. Мәселен, азаматтар тұрғылықты жері бойынша жиындарға шақырылатын болса, онда күн са­йын қызметтік іс-шараларды орындау аяқталғаннан кейін олар өз үйлеріне орала алады.

Соңғы жаңалықтар

Майдан даласынан табылған бәкі

Аймақтар • 23 Мамыр, 2020

Ұқсас жаңалықтар