Қауіпті сипаттағы коронавирустың жайылуы, әлбетте, Қазақстан және әлем елдерінің дамуына теріс әсерін тигізеді. Болып жатқан жаһандық өзгерістер экономикалық, азық-түліктік қауіпсіздікті қамтамасыз ету үшін әжептәуір күш салуды қажет етеді. Осы тұста мемлекеттік және мемлекеттік емес органдардың басты міндеті – ел тұрғындарының өмір сапасы мен экономика және қаржы секторларының құлдырауына жол бермеу.
«Әрине қалыптасып отырған жағдай оңай емес. Бұл – бүкіл әлем мемлекеттеріне түскен зор ауыртпашылық. Біз оны осындай сын сағатта септігін тигізетін халқымыздың төзімділігі, ерік-жігері және өзіне деген зор сенімі арқасында міндетті түрде жеңіп шығамыз. Ол үшін бізге қажетті нәрсе – қаржы-қаражат, материалдық ресурс, техника, азық-түлік – бәрі бар. Алаңдайтын, абыржитын еш негіз жоқ», деді Елбасы. Осы сөз бізді сабырға, төзімге шақырады.
Елбасы айтқандай, осындай қиын-қыстау шақта елдегі қоғамдық-саяси жағдайды шайқауға қабілетті күштердің пайда болуына жол бермеу қажет. Таяу және Орта Шығыс, Солтүстік Африка елдерінің тарихи тәжірибесі көрсеткендей, мұндай жағдайды халықаралық экстремистік және лаңкестік ұйымдар міндетте түрде этносаралық және конфессияаралық шиеленістер тудыру үшін қолдануы мүмкін. Сондықтан Тұңғыш Президентіміздің пайымымен бұл кезеңді біз білім алуға, ғылыммен айналысуға тиімді жұмсай білгеніміз жөн.
Қазақстан басшылығы бүгінгі жағдайдың күрделі де тұрақсыз екендігін жасырмайды. Десе де, Нұрсұлтан Әбішұлы өз мақаласында осы дағдарысты еңсеретін күшіміз де, мүмкіндігіміз де бар екенін атап өтті. Елбасының күш-жігерімен Тәуелсіздік жылдары Ұлттық қорымызды жасақтадық. Қазір онда 90 миллиард доллар бар. Яғни, әрбір қазақстандыққа мемлекет тарапынан қажетті қамқорлық көрсетіледі. Ең бастысы, біртұтас және ұйымшыл болуымыз қажет.
Әбсаттар ДЕРБІСӘЛІ,
Р.Б.Сүлейменов атындағы Шығыстану институтының директоры, академик, профессор
