Әрине, елдің шеті мен желдің өтінде тұратын тұрғындар арасында бірді екі етуге ұмтылып, АӘК-ті тиімді түрде жұмсаудың тетіктерін таба білген тұрмысы төмен отбасылар да жеткілікті. Атап айтқанда, Қобда ауданында өткен жылдың қорытындысы бойынша 286 отбасына 154 миллион теңге көлемінде АӘК төленген. Міне, соның ішінде 196 отбасы алған қаржылай көмектерінің бірде-бір теңгесін шашау шығармай, өз кәсіптерін ашуға жұмсаған.
Бұл тұрғыда ауыл әкімдері тұрғындардың өздеріне тиесілі АӘК-ті тиімді түрде жұмсай білуіне ұйытқы болды. Сөйтіп жүздеген шаңырақ шағын отбасылық шаруашылықтың негізі қаланған. Тұрмысы кедейшілік шегінен төмен отбасылар ірі қара мен қой-ешкі секілді ұсақ мал және қаз, үйрек, күркетауық құстарын сатып алған.
Айталық, аз қамтылған көп балалы отбасы иелері, ерлі-зайыпты Мұздақбай Жетегенов пен Динара Шындауылова 620 мың теңге көлеміндегі АӘК қаражатына 1 бас ірі қара және 10 бас ұсақ мал сатып алып, жеке қосалқы шаруашылығын құрды. Бұған дейін Динара негізінен бес баланың тәрбие күтімімен айналысып келген екен.
«Алдағы уақытта қосалқы шаруашылығымызға қарайласу маған қиындық келтірмейді. Өйткені ұл-қыздарымыз бір-біріне сүйеніш, таяныш болатындай жасқа жақындап, өсіп келеді», дейді Д.Шындауылова. Ал отағасы аудандық білім бөлімінде газ қазандығының операторы болып жұмыс істейді. Жалақысының мөлшері бес баланы асырауға мүмкіндік бермейді. Осы орайда олар өздеріне мемлекет тарапынан атаулы әлеуметтік көмек тағайындалғанына дән риза.
Тағы бір тұрмысы төмен отбасы Қайрат Қайрошұлы мен Айнар Сабырқызы туралы айтайық. Отағасы «Ерсін» жеке кәсіп иелігінде қарапайым жұмысшы екен. Зайыбы Айнар бала күтімінде көрінеді. Олар АӘК-тің 750 мың теңге көлеміндегі қаражатына үш сиыр сатып алып, жеке қосалқы шаруашылығын құрыпты. Қобда ауданында еңбекқор, табанды, жұмыс десе жанын беретін жандар қатары тек мұнымен шектелмейді.
Грант алып, жеке кәсіптерін ашқандар олардың қатарын толықтыра түсуде. Бұл тігін, аяқкиім жөндеу және жиһаз жинау цехтары, сондай-ақ азық-түлік дүкендері. Нәсібін адал еңбек, маңдай термен айырып отырған, өз отбасыларын жеткілікті табыспен қамтуға жол аша білген тұрмысы төмен отбасылар құрметке лайықты. Мемлекет тарапынан тағайындалған АӘК пен гранттар тек осындай жағдайда текке кетпей, қайтарым коэффициентін көтере алары анық.
–Мұндай санаттағы ата-аналар өз кіндігінен тараған перзенттеріне құрғақ сөз күйінде емес, нақты іс жүзінде үлгі-өнеге көрсетеді. Сонымен бірге отбасы бюджетін толтыру ісі де шешімін табады. Біздің басты парызымыздың бірі – дәл осы санаттағы шаңырақ иелеріне ұдайы қолдау көрсету. Көңілге бір медеу тұтарлық жайт, ауданымызда жағдайын жақсартуға ұмтылған отбасылардың қатары жыл сайын көбейіп келеді, – деді Қобда ауданының әкімі Мейрамбек Шермағанбет.
Ақтөбе облысы,
Қобда ауданы
