Былтыр Қазақстанның теңіз порттары арқылы жалпы 6 млн тонна жүк, оның ішінде 2,2 млн тонна мұнай, 2,5 млн тонна құрғақ жүк және 1,4 млн тонна паром жүктері тасымалданды. Жүк тасымалы көлемін одан әрі арттыру мақсатында Құрық порты мен Иран және Ресейдің Каспийдегі порттары арасында жаңа паром желілерін ашу мәселесі пысықталуда. Транскаспий мультимодальдық дәліз бойынша көлік құрамын азайту жөнінде қабылданған шараларды ескере отырып, экспорттық жүк ағынының бір бөлігін Ақтау және Құрық теңіз порттарына бағдарлау жоспарланып отыр. Транскаспий бағыты шеңберінде жаһандық контейнерлеу жағдайында контейнерлердің фидерлік тасымалын арттыру жоспарланған. Бұл дәстүрлі тасымалдау бағдарларымен салыстырғанда өзінің артықшылығын дәлелдеді.
Жалпы 2030 жылға дейін порттар арқылы тасымалдау көлемін 18 млн тоннаға дейін, оның ішінде контейнерлік ағынды 300 мың ДФЭ дейін жеткізу жоспарланып отыр. Осыған байланысты перспективалы жүк ағынын порт қызметтерімен қамтамасыз ету үшін орта мерзімді перспективада Ақтау порты инфрақұрылымын жаңғырту және Құрық портында бас және үйінді жүктерді өңдеуге арналған терминал салу жоспарланды.
Төтенше жағдай кезінде порттар штаттық режімде жұмыс істеп тұр. Коронавирустық инфекцияның таралуына жол бермеу мақсатында биылғы 16 наурыздан бастап теңіз порттары арқылы жолаушыларды тасымалдау уақытша тоқтатылды. Порттарда санитарлық-эпидемиялық шаралар күшейтілді. Келетін жүк көліктеріне дезинфекция жүргізіледі. Бұл ретте порттарда бірінші кезекте қажетті тауарларды, азық-түлік өнімдерін, дәрі-дәрмектер мен медициналық мақсаттағы тауарларды тасымалдайтын жүк көліктерін өткізуді оңайлату бойынша шаралар қабылданды.
Бүгінгі таңда порттар арқылы шамамен 1,3 млн тонна жүк (мұнай және мұнай өнімдері, астық, металл) экспортталды. Бұл 2019 жылғы сәйкес кезең көрсеткішінің 98%-ына тең. Импорт көлемі 224,9 мың тоннаны құрады (халық тұтынатын тауарлар, тамақ өнімдері, құрылыс матриалдары, цемент және т.б.). Бұл өткен жылдың сәйкес кезеңімен салыстырғанда – 102%. Биылғы бірінші тоқсанда шамамен 60,8 мың тонна транзиттік жүк (азық-түлік, тұрмыстық техника, дәрі-дәрмек) порттарда өңделіп, 2019 жылдың сәйкес кезеңі көрсеткішінің 86%-ына тең болды.
Еске сала кетейік, 2015-2019 жылдарға арналған «Нұрлы жол» мемлекеттік бағдарламасы шеңберінде Ақтау портында қуаты 3 млн тонналық 3 жаңа құрғақ жүк терминалы және Құрық портында қуаты 6 млн тонналық көпфункционалды паромдық кешен салынды.
