Корпорацияның баспасөз қызметінің хабарлауынша, бүгінгі таңда несие төлеу мерзімін кейінге шегеру туралы 81 өтініш түскен. Олардың қарызының жалпы сомасы 6,3 млрд теңгеден асады. Әр өтінім жеке тәртіп бойынша қарастырылуда.
– «ҚазАгро» холдингінің «Аграрлық несие корпорациясы» жалпы сомасы 4,31 млрд теңгені құрайтын 32 кәсіпкердің қарызын төлеу бойынша мерзімді кейінге шегеруді мақұлдады. 51 өтінім қарастырылып жатыр. Айта кетерлігі, 299 млн теңге көлемінде несие алған бір кәсіпкердің өтініші мақұлданбады. Себебі, бұл қарыз алушының қолданыстағы төлемдерге қатысты жеңілдік кезеңі бар. Аталған кәсіпкер шарт талаптарына сәйкес әзірге төлем жасамайды, – деп хабарлады корпорацияның баспасөз қызметі.
Төлемдерді кейінге шегеру ережесі бойынша төтенше жағдай режімінің салдарынан қаржылық жағдайы нашарлаған клиенттердің ғана өтініштері мақұлданады. Қаржылық жағдайдың нашарлауы сатылған тауарлардың азаюы, көрсетілген қызметтер көлемінің төмендеуі, өнімді сатып алушылардың төлем мерзімін тоқтатуы немесе өзгертуі және тағы басқа да факторлар арқылы анықталады. Енгізілген шектеулерге байланысты «Аграрлық несие корпорациясы» АҚ қарыз алушыларының өсім мен айыппұлын есептеуді тоқтатқанын да айта кету керек.
Президент мәлімдемесінен кейін тиімді міндеттемелерді жүзеге асыруға тез арада кірісіп кеткен «Аграрлық несие корпорациясы» АҚ клиенттерінің кез келген мәселе бойынша хабарласуы үшін 5115 жедел желісін іске қосты. Кейінге шегеру өтінімдерін кәсіпорынның қаржылық жағдайы қиындағанын растайтын құжаттардың көшірмесімен бірге корпорацияның электронды поштасына жіберуге болады. Баспасөз қызметінің хабарлауынша, кәсіпкерлерден түскен өтініш 10 күн ішінде қаралады.