Қазақстан • 24 Сәуір, 2020

Ақтөбе және Атырау облыстарында автомобиль жолдары саласындағы жобалардың жүзеге асырылу барысы талқыланды

134 рет
көрсетілді
2 мин
оқу үшін

Индустрия және инфрақұрылымдық даму министрі Бейбіт Атамқұлов Ақтөбе облысының әкімі Оңдасын Оразалиннің, Атырау облысы әкімінің орынбасары Әлібек Наутиевтің, сондай-ақ, Автомобиль жолдары комитетінің төрағасы Сайранбек Бармақов пен "ҚазАвтоЖол"ҰК" АҚ Басқарма төрағасы Ұлан Әліповтың қатысуымен бейне-конференциялық байланыс режимінде кеңес өткізді, деп хабарлады ИИДМ баспасөз қызметі.

Ақтөбе және Атырау облыстарында автомобиль жолдары саласындағы жобалардың жүзеге асырылу барысы талқыланды

Жиын барысында «Қандыағаш – Мақат» және «Атырау – РФ шекарасы (Астрахань)» жолдарының реконструкциясы мәселелері талқыланды. Аталмыш жобалар жоғарыда аталған өңірлер мен елдің көліктік әлеуетін арттыруда үлкен маңызға ие. 

Ұзындығы 359 шақырымды құрайтын «Қандыағаш – Мақат» автомобиль жолының құрылысы 2018 жылы басталған болатын. Биыл жолшылар топырақтың 40,5 мың текше метрін, жолдың 5 шақырымына жол табанының негізгі қабаттарын төседі. Сонымен қатар, қиыршық тастың 598 мың текше метрі, ТББ 2,4 мың текше метрі мен битумның 8,7 мың тоннасы дайындалды. Жұмыстарға техниканың 570 бірлігі мен 950-ден астам маман жұмылдырылған. Қайта жаңарту жұмыстары 2021 жылы толықтай аяқталады деп жоспарлануда. 

ИИДМ басшысы жұмыстарды жыл соңына дейін аяқтап, Ақтөбе облысындағы ұзындығы 154 шақырымды құрайтын автомобиль жолының учаскесін пайдалануға беруді, көліктердің Атырау облысындағы жолдың 40 шақырымында жол жабындысының төменгі қабатымен жүруін қамтамасыз етуді тапсырды.

Ұзындығы 217 шақырымды құрайтын «Атырау – РФ шекарасы (Астрахань)» жолының құрылысы 2019 жылы басталды. Биыл нысанда топырақтың 2,1 мың текше метрі, 6,3 шақырымға жол табанының қабаты төселіп, қиыршық тастың 107,4 мың текше метрі дайындалды. Жоба аясындағы жұмыстарға техниканың 171 бірлігі мен 271 адам жұмылдырылды. Жоспарға сәйкес автомобиль жолы 2023 жылы пайдалануға берілуі тиіс. Бейбіт Атамқұлов биыл жолдың 60 шақырымында қозғалысты ашу қажеттігін, жолдың толық бойында жұмыстарды белсенді жүргізу қажеттігін атап өтті. 

Бұдан бөлек, аталмыш өңірлерде ұзындығы 89 шақырымды құрайтын «Ақтөбе – Атырау» жобасын іске асыру, 27 шақырымдық Атырау қаласының бұрма жолының құрылысы жоспарланған.

Министр осы жылға жоспарланған жұмыстардың 100% орындалуын қамтамасыз етуді тапсырды.

Еске салайық, ҚР Үкіметі еліміздің автомобиль жолдары саласының алдына 2020 жылдың соңына дейін жолдардың 2,6 мың шақырымында қозғалысты ашу сияқты үлкен міндетті қойған болатын.