Қоғам • 30 Сәуір, 2020

Балабақшалар саны көбейді, сапасы ше?

20 реткөрсетілді

Қазіргі кезде еліміздің қалаларында да, ауылдарында да балабақшалардың саны көбейгені, соның нәтижесінде мектепке дейінгі тәрбие-білім беру нысандарымен қамтылу көрсеткіші 90-95, тіпті кейбір жекелеген өңірлерде 100 пайызға дейін жеткені үлкен жетістік ретінде айтылып жүр.

Бір қарағанда, мұның өзі желдірте айтуға да, желпіне ай­т­уға да тұраралықтай көрі­ніс екенімен келісуге болатын секілді. Өйткені шамамен бұ­дан сегіз-он жыл бұрын ата-аналардың балаларын бала­бақшаға орналастыруы күр­ме­уі қиын, шешілместей іс се­кіл­ді көрінетін. Бұл мәселеде та­­мыр-таныстық пен сыбайлас жемқорлық сипатындағы көріністер де орын алғаны жасы­рын емес.

Бүгінде тұрғындар тарапы­нан балабақшаға сұраныс әжеп­­тәуір кемігені, тіпті жоқ­қа тән екені аян. Мұндай жа­ғым­­ды жайт соңғы жылдарда рес­пуб­ликамыздың түкпір-түк­пі­рін­де жауыннан кейінгі саңы­рау­құ­лақтай қаптап, саны күрт кө­бей­ген жекеменшік бала­бақ­ша­­лардың есебінен болғанын ешкім жоққа шығармайды. Талас жоқ, қандай жағдайда да мектепке дейінгі балалар мекемелерінің көбейгені, жеткілікті болғаны жақсы-ақ. Әйтсе де сол жеке­мен­шік балабақшалардағы тәр­бие мен білім сапасының деңгейі қан­дай деген сауал еріксіз туындайды.

Осы орайда бүгінде жеке­мен­шік балабақша ашу бизнестің ең оңай түріне айналып кеткен­дей әсер билейді. Белгілі бір орны мен ғимараты болса жет­кі­лікті, ата-аналардың тиісті тө­ле­мін төлеп, балаларын ор­на­­ластырудың түк те қиын­ды­ғы болмай қалған секіл­ді. Бұған ешқандай кедергі де, тос­қауыл да жоқ. Өйткені жеке кәсіп­кер­лер балабақша ашу үшін мем­ле­кет­тік орындардан лицензия алмай-ақ, өз қызметтерін бастап кетеді.

Елімізде мектепке дейінгі ұйымдарды лицензиялау тәртібі 2011 жылдан бастап тоқтатылған. Бұл өзгеріс өз кезегінде жеке­мен­шік балабақшалар санының күрт өсуіне әсер еткені де анық. Оның бәрі бірдей мектепке дейінгі тәрбие-білім беру стан­дарт­­­тарын белден басты десек, шындыққа қиянат болар. Десек те, оның ішінде өздеріне қабылданған балалардың жас ерекшеліктерін сақтамай, үлкені мен кішісін бірге топтастыруды әдетке айналдырған жеке­меншік балабақша ие­лері де кездескені белгілі бо­лып отыр. Сонымен бірге осы санаттағы ұйымдарда тәрбие­ле­нуші­лер­дің дамуына септігі тиетін ойын­шық түрлері де алын­баған екен. Сондай-ақ сани­тар­лық-ги­гиеналық талап­тар­ға сәйкес келмейтін жеке­мен­шік бала­бақ­ша орындары да анық­талды.

Бұл жөнінде облыстық білім саласындағы сапаны қамтамасыз ету департаментінің басшысы Б.Күзембаева мәлімдеді. Мем­лекеттік мекеме мамандары ата-аналардан түскен арыз-шағымдарға орай облыс аума­­ғындағы жеті жекеменшік бала­­бақшаға тиісті тексерулер жүр­гізген кезде, жоғарыда айтып өткен көріністердің орын алға­нын анықтаған. Соған сәйкес олар мектепке дейінгі жеке­мен­шік ұйымдардың белгіленген нормативтер мен стандарттарға сәй­кес келмейтінін сала-сала бо­йын­ша көрсетіп, тиісті орган­дар­ға нұсқау-хат жолдаған.

Бұлбұл Бисенбайқызының айтуынша, білім саласындағы са­паны қамтамасыз ету жө­нін­дегі департамент жетек­шісі мен мамандары өздігінен же­ке­­меншік бала­бақша қыз­ме­­тін тек­сере алмайды екен. Өйт­­кені оларға мұндай құқық бе­ріл­­меген. Тек тиісті негіз бен арыз-шағым түскен жағдайда ғана өз өкілеттілігін пайдала­нып, мәселенің мән-жайын анықтауға қам жасайды. Оның айтуынша, 2019 жылы өңірден департаментке тәрбие мен білім беру мәсе­лелеріне қатысты 63 шағым тү­сіпті. Сонымен қатар бас­қа да қоғамдық қабылдаулар, сенім телефондары мен басшы бло­гы арқылы 123 сұрақ ке­ліп түскен. Соның ішінде ең көп арыз-шағымдардың үлесі жеке балабақшалардың еншісіне тие­ді.

Әрине бұған қарап елі­міз­дегі жекеменшік бала­бақ­ша­лар­дың санын қысқарту немесе қыз­меттерін тоқтату жө­нін­де ой-пікір туындамаса керек. Назар­дың жекеменшік бала­бақ­­шалар қызметінің сапалық деңгейін көтеруге бағытталғаны жөн се­кіл­ді. Қазіргі кезде лицензиялау тәртібін қайтадан қал­пын­а келтіру керектігі де айқын бай­қа­лады.

Қалай дегенде де, бүгінде жеке балабақшалар лицензия алуға тиіс екені еш талас туғыз­байды. Мұндай жағдайда атал­ған тәрбие мен білім беру нысандарын кәсіби деңгейі және біліктілігі жоғары кадрлармен толықтырудың тың арналары ашылмақ. Сонымен бірге балалар мекемелерін материалдық-техникалық тұрғыдан жақсарту мен жабдықтаудың жаңа мүм­кін­діктері тумақ. Ең бастысы, жеке балабақшалар елімізде қабыл­данған барлық стандарттар бо­йынша тәрбие мен білім беруге лайықты болғаны жөн.

– Дәл осындай жағдайда ғана оларға лицензия берілсе, сан мен сапа үйлесім табатыны тала­с­сыз. Бұл ең алдымен бо­лашақ ұрпақтың жан-жақты өсіп-жетілуіне өте қажетті. «Бе­сік­­ті түзеу» деген мағынасы кең ұғым­­ның бір мәнісі осында, – деген болатын пікірімен бөліс­кен есімі Ақтөбе аймағына кеңі­нен танымал ақсақал, білім беру ісі­нің ардагері Камалхан Қуанов.

 

АҚТӨБЕ

 

Соңғы жаңалықтар

Қапшағай қаласының әкімі ауысты

Аймақтар • Бүгін, 17:20

Жігіттің жақсысы

Руханият • Бүгін, 16:21

Эрик Кантона көш бастап тұр

Аймақтар • Бүгін, 15:16

Ұқсас жаңалықтар