Барлық облыста төтенше жағдайда жұмыс істейтін арнайы волонтерлер штабтары құрылып, өз жұмыстарын бастап кетті. Осындай штабтың бірі Ақтөбе облысында Жастар саясаты мәселелері басқармасы облыстық Жастар ресурстық орталығының жанынан құрылды.
Штаб наурыз айының ортасынан бастап жұмыс істеп келеді. Қазіргі таңда 200-ге жуық волонтер күнделікті жұмыстарға араласуда. Волонтерлер арасында 18 жасқа толған, жұмыс істейтін жастар, өзін-өзі қамтыған жас кәсіпкерлер, студенттер, Жастар ресурстық орталығының өкілдері, жастар ұйымдарының, өңіріміздің белсенді жұмыс істеп жатқан волонтерлік топтарының мүшелері бар.
Волонтерлер қатарына өңіріміздің 18 жасқа толған кез келген азаматы қосыла алады. Алайда арнайы нұсқаулықтарды қатаң түрде сақтаулары керек. Волонтерлердің сақтығы үшін арнайы чат ашылып, барлық келіссөздер, ақпарат сол жерде талқыланады. Бұл топ болып шоғырланудың алдын алады. Жұмыс барысында арнайы тапсырмалар видео, қоңырау және арнайы чат арқылы ескертіліп, нұсқаулықтар беріліп отырады.
Тапсырманың мазмұнына қарай волонтерлер ақпараттандырылып, ниетті адамға міндеттеледі. Яғни тапсырманы орындау ерікті түрде. Көбіне уақытына, кәсіби біліктілігі, мамандығына қарай тағайындалады. Тапсырмалар облыстық штабқа келіп түскен өтініштерге негізделеді.
Мемлекет тарапынан бөлінген қаржымен қатар қоғамдық қорлар, кәсіпкерлер мен демеушілердің көмегімен алынған азық-түліктер пакеттері жалғызбасты қарияларға, жалғызбасты аналарға, көп балалы, аз қамтылған отбасылар мен мүмкіндігі шектеулі жандар тәрбиелеп отырған отбасыларға жеткізілді. Бүгінге дейін #Бізбіргеміз акциясы аясында 1 793 отбасына көмек көрсетілді.
Сонымен қатар волонтерлер дәрігерлермен бірге ем қабылдайтын 67 қартқа жергілікті емханалардан дәрі-дәрмек жеткізді. Дәрілерді таратуда «Ақтөбе қайырымды жандар», «Үміт Нұры», «Volunteer2020.aktobe» топтары белсенділік танытты.
Сонымен бірге волонтерлер маска тігіп, штаб жұмысына жұмылдырылған еріктілерге, әлеуметтік қызметкерлерге және қоғамдық тазалықты қамтамасыз етіп жүрген жұмысшыларға, қала тұрғындарына тегін таратты. Бүгінге дейін жалпы саны 14 033 маска таратылды.
Блок-бекет жұмыстарына тартылған қызметкерлерге қолдау білдіріп, оларға ыстық тамақтарды үлестіруде де волонтерлер белсенділік танытуда. Бұл жұмыстарға «Жүректен жүрекке», «Ақтөбе қайырымды жандар», «Қызыл Ай» қоғамдық қоры волонтерлері тартылды. Қаладағы рейд жұмыстарына түрлі волонтерлік топтардан бірлескен «Anticovid19» және «Жас сақшы» жасағы тобының жастары көмектесуде.
Бәрімізге белгілі, шетелден келіп жатқан қазақстандық студенттер қазіргі таңда карантиндік орталықтарда бақылауда. Олар өзге облыстың студенттері болғандықтан М.Оспанов атындағы Батыс Қазақстан медицина университетінің жанынан құрылған «Медик волонтерлер» мен «Қызыл Ай» қоғамдық қорының волонтерлері карантиндегі студенттерге олардың сұранысы бойынша дүкендерден азық-түліктер, жеке гигиеналық заттар жеткізіп беруде. Жұмыс барысында барлық санитарлық ережелер мен қағидалар сақталады. Волонтерлер штабы өз жұмысын әрі қарай жалғастыруға ниетті. «Бір жағадан бас, бір жеңнен қол шығарып», бірлесіп, бұл кезеңнен де аман-есен шығамыз деген сенімдеміз.
Нұрсұлтан ЕЛЕУОВ,
Ақтөбе облыстық волонтерлер штабының жетекшісі
