Оқушыларды қашықтан оқытуға техникалық мүмкіндік бар және интернеттің жылдамдығы да жеткілікті мекемелер түгелге жуық қатысып отыр. Қашықтан оқыту технологиясы оқушыларға оқуды білім ордасына қатынамай-ақ, алыстан жалғастыруға мүмкіндік береді. Мектеп әкімшілігі тарапынан онлайн-форматтағы сабақтар, интерактивті дербес тапсырмалар және қосымша әдебиеттер тізімін, оқушыларды бағалау сияқты кері байланыстарды қамтамасыз ету үшін мұғалімдермен семинар-тренингтер жиі өткізіледі.
Оқушыларыммен бүгінгі таңда қашықтан оқыту бағдарында – «Ел Арна» телеарнасы, Bilimland, Kundelik.kz, WhatsApp, Zoom платформаларының көмегімен күнделікті сабағымды зерделеп, сол арқылы байланыс орнатып жүрмін. WhatsApp, Zoom қосымшалары компьютер және ұялы телефонмен де кіруге қолайлы. Оқушыларға тапсырмаларды бейнематериал, презентация, тест жұмысы және аудио-жазбалар түрінде оқытуды ұйымдастырып жүрмін. 6-сыныпта «Абай – лирик ақын» атты сабағымыз онлайн форматта өтті. Bilimland платформасынан Абайдың өмірі, шығармашылығы жайлы ақпаратты тыңдады. Тыңдалған тапсырмадан кейін оқушылар өз түсінгендерін ортаға салады. Абайдың табиғат лирикасына арналған өлеңдерін ғаламтордан тауып, диаграмманы толықтыру тапсырмасы жоғары деңгейде орындалды. Оқушылар табиғат лирикасына арналған өлеңдерімен қоса, әндерінің атауы жайлы мағлұмат алды. «Ойыңды жеткіз» әдісімен жыл мезгілдері туралы мақал-мәтелдердің жалғасын тауып, 6 «А» – сыныбында Андрей Кондратов, 6 «Б» – сыныбында Амира Нұрбаева, 6 «В» – сыныбында Мұхтар Алтай атты оқушыларым сабақта мақалдың мағынасын ашып, орыс тіліндегі баламасымен салыстырып, ұтымды жауаптар берді. Zoom платформасы сабақта оқушылармен жұптық, ұжымдық жұмыстар жасауға өте қолайлы екен. Себебі, мұнда оқушылар арасындағы диалогтық оқыту іске асады және білмегендерін өзара талқылап, бір жағынан сабаққа деген ынтасы жоғарылай түседі, екінші жағынан оқушылар тақырыпты жетік меңгеретінін байқадым. Мен жеке, жұптық, ұжымдық жұмыстың дұрыс жүруі үшін тақырыпқа сай дұрыс бағыт-бағдар беріп, тапсырмаларды ұйымдастырамын. 5-сыныптарда WhatsApp желісінің көмегімен ұжымда М.Мақатаевтың өлеңін тыңдап, өлеңді жаттауға, видео түсіруге тапсырма бердім. 5 «А» – сыныбында Алпамыс Кенгеспаев, Малика Мусина, Омар Ұзақов, Толғанай Тұрғанова, 5 «Б» Әлия Шектібаева, Адия Мұхамедиева, Алан Морав, 5 «В» сыныбында Даниал Марат, Арсений Федеренко, Томирис Масхут берілген тапсырманы критерийлерге сай, өлеңді жаттап, видеоларын жіберді. Менің мақсатым – өлеңді басты назарға ала отырып, ынтымақтастықпен оқыту, оқушылардың жауапкершілікті сезініп, видео дәлелдерімен қызықтыра отырып, білім алудағы қабілеттерін арттыру.
Kundelik.kz сайтының көмегімен оқушыларға ұсынылған тапсырмаларын жүктеп, қайта кері байланыс алуға таптырмас мүмкіндік алып отыр. Kundelik.kz – мұғалім тарапынан сабаққа қатысу белсенділігін бағалаудағы ұтымды платформалардың бірі. Мектеп әкімшілігі мұғалімдерге өткізілген сабақтарға мониторинг жүргізіп, апта сайын Zoom платформасының көмегімен онлайн-кеңес беруде.
Айдана БОЛАТХАН,
М.Мәметова атындағы №28 мектеп лицейдің қазақ тілі мен әдебиеті пәні мұғалімі
АЛМАТЫ