Қоғам • 07 Мамыр, 2020

Абыройлы міндет

14 реткөрсетілді

«Отан – елдің анасы, Ел – ердің анасы». Халық даналығы осылай дейді. Әйтпегенде, ерім дейтін ел болмаса, елім дейтін ер қайдан болсын? Ел-жұрты олар үшін де алаңдайды. Олардың ерлігі мен еткен еңбегіне қарап, ертеңгі жас ұрпақ бой түзейді. Сезінбейді емес, бұл жауапкершілік жүгін әрбір әскери адам сезінеді. Туған топырағын от пен судан, аңдап келген жау­дан қорғауды ұстаным етіп, олар да бір кез әскер қатарына қосылған еді. Міне соларға қарап Қазақстан Қарулы Күштерінің бүгінгі қайраты мен айбатын аңғара беріңіз.

Суретті түсірген Ерлан ОМАР, «ЕQ»

Мемлекет басшысы Қасым-Жомарт Тоқаев бір сөзінде: «Тәуелсіздіктің алғашқы жылдарында елімізде жоғары санатты, білікті сардарлар мүлде аз болды. Тұңғыш Президентіміз әр сарбаз­ды жігерлендіре отырып, айбынды әскер құрды. Бүгінде біздің Күштік құрылым­дарымыз заманауи техника мен технологияны меңгерген. Олар кез келген қауіп-қатерге қарсы соққы бере алатын айбынды әрі мобильді күшке айналды» деген болатын. Президенттің Қазақстан Қарулы Күштеріне деген бұл сенімі қазіргі жағдайда күн сайын ақталып келеді. Еліміздің Күштік құрылымдары дәрігерлермен, тәртіп сақшыларымен тізе қосып, індеттің жаппай таралуына тосқауыл болуда.

Осы мақсатта аз жұмыс атқарылған жоқ. Президент Қазақстан Қарулы Күш­терінің аумақтық әскерлерін жасақ­тау үшін әскери міндеттілер арнаулы жиындарға шақыру туралы Жар­лық­­қа да қол қойды. Сонымен қатар Қарулы Күштердің Бас шта­бында радиа­циялық, химиялық, био­ло­гиялық қорғау және экологиялық қауіп­сіздік әс­керлері департаменті құрыл­ды. Осылай жалғастыра беруге болады. Алайда бүгінгі мақсатымыз ол емес. Көз­дегені­міз – Қазақстан дейтін қараша­ңы­рақты Отаным деп білетін ынтымағы мен бірлігі жарасқан сарбаздар өміріне үңілу.

–  Әскерге өткен жылдың күзінде шақы­рылдым. Тараз қаласының тумасымын. Тараз гу­мани­тарлық универ­сите­тінде «Дене шы­нық­тыру және спорт» мамандығы бойын­ша оқуымды тәмам­дағаннан кейін Отан қор­ғаушылар қатарына қосылуға шешім қа­былдадым, – дейді «Шығыс» өңірлік қол­бас­шылығына қарасты Халық Қаһар­ма­ны Қасым Қайсенов атындағы 27943 әс­кери бөлімінің жас сарбазы Қанат Асқаров.

Сарбаздың сөзіне сенсек, Қазақстан Қару­лы Күштерінің қатарынан табылғаны жігерін жанып, намысын шыңдап, әскери қызмет мерзімі аяқталған соң осы салада еңбек етуді көздеп отыр. «Бірақ алдымен офицерлерді даярлайтын әскери училищеге оқуға түсіп, білімімді жетілдіруді көздеймін» дейді. Мақсатына жетуіне тілектестігімізді білдірдік. Іле-шала осы бөлімшенің тағы бір жауынгерін әңгімеге тартудың сәті түсті.

– Алматы облысына қарасты Еңбекші­қазақ ауданында Тескенсу атты ауыл бар. Сол ауылдың тумасымын. Ұлтым – ұйғыр. 2019 жылдың күзінде маған Отан қорғаушылар қатарынан табылудың бақыты бұйырды. Қазір БМП-2 арнайы жаяу ұрыс машинасының көздеуші-операторы ретінде Отан алдындағы борышымды өтеп келемін. Жауынгерлік жалын – қанымда бар. Атам Ұлы Отан соғысының ардагері еді. Сол кісінің ізін жалғасам деймін. Кейін келісімшарт бойынша қызмет еткім келеді, – дейді Асылжан Халил.

Асылжанның айтқанына құлақ түре отырып, оның білім ошағынан түлеп ұшқаннан кейін азды-көп еңбек еткенін білдік. Одан соң барып сарбаз атаныпты. Алайда Отан қорғау ісі жанына жақ­қаны, көңілінен шыққаны аңғары­ла­ды. Әскерден соң да әскери өмірді жалғас­тыруға деген құлшынысы – соның дәлелі.

– Шымкент қаласының тумасымын. Ұлтым – өзбек. 2013 жылы Алматы­дағы Құрлық әскерлері әскери инс­титутына түсіп, оны лейтенант шенінде ойдағыдай аяқтадым. Бұдан соң Өскемен қаласындағы «Шығыс» өңірлік қолбасшылығына қарасты 27943 әскери бөлімінде рота командирінің тәрбие және идеологиялық жұмыстар жөніндегі орынбасары болып қызмет еттім. Осы бөлімде екі жарым жыл тер төккеннен кейін биыл 16 наурызда Үшарал гарнизонындағы 40398 әскери бөлімінің барлау жауынгерлік батальоны командирінің тәрбие және идеологиялық жұмыстар жөніндегі орынбасары болып бекідім, – дейді Мурод Махамедов.

Мурод әскери өмірмен ұштастырып, спортты да  жанына серік ете біліпті. Тіпті таэквондодан «қара белбеуі» де бар І дан иегері. «Шығыс» өңірлік қолбасшылығы ұйымдастыратын қоян-қолтық ұрыста өнер көрсетіп қана қоймай, Елбасы кубогын, Қазақстан чемпионаттарында да атой салып жүрген жайы бар.

– Жамбыл облысына қарасты Қордай ауданында Гвардейское кенті бар. Сонда дүниеге келдім. Әкем әскери адам еді. Содан болар, әскери техника тізгіндеп жүр­ген бейнесі жадымда жатталып қалды. 2011 жылы мен де әскер қатарына шақы­рылып, соны әрі қарай жалғастыра келе келісімшарт бойынша қалуға бел байладым. Әскерге шақырылған кезімде де радиациялық, химия­лық, биологиялық қорғау взодына тап бол­ған едім. Сол взводта қалдым. Бүгінгі төтенше жағдай режімі кезінде Тараз қаласында дезинфекциялау жұмыстарын жүргіземіз, – дейді «Оңтүстік» өңірлік қолбасшылығына қарасты 85395 әскери бөлімінің командирі, сержант Владимир Мартыненко.

Үйленіп, отбасында қыз өсіріп отыр­ған Владимирдің әскер қатарында жүр­ге­ніне 9 жылдың жүзі болыпты. Бұл қыз­метін алдағы уақытта да абыроймен атқаруға ниетті.

– Қарағанды облысына қарасты Оса­каров ауданының Святогорвка ауылында кіндігім кесілген. Ұлтым – неміс. 2008 жылы орта мектепті тәмамдап, сол жылы Құрлық әскерлері әскери институтына оқуға қабылдандым. 2012 жылы аталған инс­ти­тутты үздік тәмамдаған түлек ретін­де иыққа тағар погонды Елбасы Нұр­сұл­тан Назарбаевтың қолынан алдым. Оқуым­ды ойдағыдай аяқтаған соң еңбек жолым Тараз қаласында орналасқан әскери бөлімде басталды. Екі жыл қызмет етіп, кейін Қарағанды қаласына ауыстырыл­дым, – дейді «Астана» өңірлік қолбас­шы­лығына қарасты Қарағандыдағы 31775 әс­кери бөлімінің аға офицері, капитан Александр Рафшнайдер.

Александар әскери қызметкер болуды бала кезінен армандады. Олардың киіміне, жүріс-тұрысына қызықты. Есейе келе Отанға деген сүйіспеншілігі бала күнгі арма­нымен ұштасып шыға келген екен. Әсі­ресе жазушысы Александр Бектің «Арпалыс» («Волоколам шоссесі») пове­сін оқып, батыр Бауыржан Момыш­ұлы­ның ерлігіне қатты сүйсініпті. Сүйікті шығармасы да – осы.

Күні кеше Мемлекет басшысы Қасым-Жомарт Тоқаев мәлімдеме жасап, «Індет­пен күрестің алдыңғы шебіндегі азаматтарды тағы да ерекше атап өткім келеді. Халықтың қауіпсіздігі үшін жанкештілік танытып жүрген дәрігерлер мен медицина қызметкерлеріне, құқық қорғау органдарының өкілдеріне және әскери қызметшілерге алғыс айтамын» деген еді.

Алдыңғы шепте жүргендер... Соның арасында әскери қызметшілер де бар. Жау – қару асынып келеді деген ұғымның ескіргенін пандемияны көріп түйсіндік. Адамзаттың қас жауына айналған вирус­тың вакцинасы да табыла қоймады. Солай бола тұра жанын шүберекке түйіп, алдыңғы шепте жүрген әскери азаматтар барын білеміз.

 

Соңғы жаңалықтар

Шайқының домбырасы

Өнер • Бүгін, 08:15

Театр алдындағы тарландар

Руханият • Бүгін, 08:13

Пандемия: Стивен стихиясы

Әлем • Бүгін, 07:51

Лу Шүн. Маржан сүзген жазушы

Әдебиет • Бүгін, 07:50

Тұтқын тағдыры

Руханият • Бүгін, 07:34

Жаз шықпай-ақ қурай бастады

Экология • Бүгін, 07:30

Экология бәрімізге ортақ

Экология • Бүгін, 07:27

Ойлап тапқан дүниесіне демеуші жоқ

Ең қысқа әңгіме • Бүгін, 07:25

Мыңнан астам жұмыс орны ашылады

Экономика • Бүгін, 06:45

Ұмтылғандар ұтады

Бизнес • Бүгін, 06:41

Фермерлердің көңілі әлі де күпті

Экономика • Бүгін, 06:39

Сахара үнінің саңлағы

Өнер • Бүгін, 06:37

Бетперде режімін бұзуға болмайды

Коронавирус • Бүгін, 06:32

Жер көп, жайылым жоқ

Қоғам • Бүгін, 06:31

Ұқсас жаңалықтар