Қоғам • 14 Мамыр, 2020

Жамағат Алла үйін сағынып жүр

608 рет
көрсетілді
4 мин
оқу үшін

Карантин болса да Рамазан айында сауапты істер легі тоқтап қалған жоқ. Ендеше онлайн төлемдегі «Пітір садақасы» мен «Ауызашарды» ел-жұрт қалай қабылдауда?

Жамағат Алла үйін сағынып жүр

Қазір қауіпті індетке байланысты тұтынушылардың көбісі онлайн төлемге көшкені белгілі. Карантин кезінде мешіттерге кіруге рұқсат жоқ болғанымен, үйінде дұға еткен жамағат «Пітір садақасы», «Зекет», «Пі­дия» және «Ауызашар» секіл­ді қайы­рымдылықты Kaspi Bank, Halyk Bank немесе Qiwi мо­бильді қосымшалары ар­қы­­лы көрсете алады. Мәсе­лен, қайырымдылық жасау­ға ниет еткен адам Kaspi Bank қо­сым­шасындағы Қайырым­дылық (Блоготворительность) бөлі­мін таңдап, өзі тұратын аумақ­тағы мешітке арнайы төлем жібере алады. Қазірдің өзінде Нұр-Сұлтан қаласына қарасты 13 мешіт, сондай-ақ Алматы және Алматы облысында – 45, Шымкентте – 40, Батыс Қазақстан облысында – 62, Солтүстік Қазақстан облысында – 53, Шығыс Қазақстан облысында – 24, Оңтүстік Қазақ­стан облысында 22 мешіт осы жүйеге тіркеліп үлгеріпті. Сон­дай-ақ «ЗЕКЕТ», «Харекет», «Дара», «Қасиетті жол», «Подари Детям Жизнь» сияқты қа­йы­рым­дылық қорларына да ақша­лай көмек ретінде төлем жібере аласыз.

Шариғат бойынша әр мұсыл­манға пітір садақасын беру парыз. Хадисте: «Пітір сада­қа­сы ауыздан шыққан ұнам­сыз сөз­дерден және (абайсызда іс­теп қойған) жағымсыз әрекет­тер­ден тазартушы әрі кедей­лер­ге ішер ас болсын», деп ай­тылғ­ан. Осыған байланыс­ты Алматы облысы, Ұйғыр ауда­ны­ның бас имамы Данияр Қал­мақбайұлымен әңгімелесу­дің сәті түсті. «Асыға күткен он екі айдың сұлтаны Рамазан айында біздің аудан тұрғындарының да пітірлерін онлайн төлем арқылы жіберуге мүмкіндігі бар. Интернет арқылы жіберуге мүмкіндігі жоқ жандар үшін мешіттің сыртына жәшік қойып қойғанбыз. Күнделік­ті тәртіп бойынша мешітке имам, көмекшісі және азаншы ғана келеді. Індеттен тезірек құтылу үшін Бас мүфтиіміздің үндеуіне біз де қосылып, күнде үздіксіз хатым Құран оқудамыз. Мүфтияттың тапсырмасымен жамағаттың атынан әлеуметтік жағдайы төмен отбасыларға, жалғызбасты аналарға 100-ден астам азық-түлік пакеттері таратылды. Сауабы мол ізгі айды барша мұсылман қауым игі істерге жұмсауы тиіс! Рамазан айында тілеген тілек қабыл болады дейді. Шынын айту керек, жамағат мешітті сағынып жүр, Алла тағалам сабыр берсін», дейді Д.Қалмақбайұлы.

Қазір онлайн тапсырыс­пен ағайын, туыс, дос-жаран, мүм­кіндігі шектеулі жандарға қайы­рымдылық ретінде ауызашарлар беріп жатқандар көп. Мысалы, белгілі психолог Құралай ханым жолдасы екеуі Hantalapai_Nursultan мейрамханасынан онлайн тапсырыспен тағам алдырып, ораза тұтқан 100 адамға жеткізіп беріп, ауыз аштырыпты. Осындай сауапты істердің басы-қасында жүрген Iftar_kafe мейрамханасының әкім­шілік жетекшісі Табиғат Жұма­шевамен телефон арқылы тіл­дескенімізде «Біздің мейрам­ханадағы ауыз­ашарға келетін болсақ, тек online сауда жасаудамыз. Әрине, бұл әдеттегі саудадан сәл қиынға соғуда. Дегенмен де фирмалық тағамдарымызға жеңілдіктер қарастырылған. Мысалы, 5 түрлі кәуапқа тапсырыс беретін болса, таба нан және өзіміз дайындаған 3 литрлік компот, каркаде, кисель сусындарын сыйға тартамыз. Одан да көп тапсырыс беретін болса осы сыйлықтарға қоса қымыз беріледі. Аллаға шүкір, ауызашар тағамдарына тапсырыс берушілердің қатары күннен күнге артып келеді», деді.

Ендеше Оразада тілеген дұға-тілектеріңіз қабыл болып, барша әлем жұрты аман болсын, ағайын. Жақсы амалдарымыз көбейе берсін. 

 

Айым БОЛАТҚЫЗЫ

 

НҰР-СҰЛТАН