Білім • 15 Мамыр, 2020

Тың бағытқа жол ашатын үрдіс

148 реткөрсетілді

Білім беру саласы жаңа технологияның мүмкіндігін пайдалануда. Бұған дейін еліміздегі кейбір жоғары оқу орындары ішінара қашықтан білім алуға сатылап көшсе, елімізге ғана емес, бүкіл әлемге тараған індет салдарынан бұл жүйені орта білім беретін мекемелер де меңгеруге мәжбүр болды.

Бұл мектеп оқушылары үшін де, білім жүйесі үшін де ең тиімді шешім. Тиісті министрлік тө­тен­ше жағдай енгізілген күннен бастап еліміздегі білім ұяларын қашықтан оқуға көшіруді жедел жос­пар­лап, қызу дайындыққа кірісті. Әрине алғаш рет бетпе-бет келіп отырған жүйені енгізу­де күтпеген кедергілер мен қиын­дықтар болды. Мұны Білім және ғылым министрі А.Аймағам­бетов­тің өзі де жасырған жоқ. «Біз бұл жүйеге төтенше жағдай салдарынан көшіп отырмыз. Еліміздің орта білім жүйесінде қашықтан оқыту бұрын-соңды болмаған, тіпті «Білім туралы» Заңда да қарастырылмаған. Ол ол ма, интернет платформасы да дайын емес. Сондықтан бұл уақытша қиындыққа түсіністік танытыңыздар», деді министр.

Әуелде сынама сабақ болып, республиканың түкпір-түк­піріндегі оқушылардың қа­шық­тан білім алуға қатысуын қада­ға­ла­ған мамандарда сан түрлі са­уал туындады. Кейбір отбасында компьютер жетіспеушілігі, енді бірін­де интернеттің жоқтығы көзге көрініп тұрды. Осы түйт­кіл­ді ескерген министрлік 800 мыңнан астам компьютер, планшет, айпад құрылғысын сатып алып, тұрмысы төмен отбасы балаларына беретінін де айтты. Одан бөлек өңірдегі жергілікті кәсіпкерлер де жомарттық танытып, оқушылардың білім алуына мүмкіндік сыйлады.

Ал Алматы қаласының оқу­­­шы­лары бұл жүйеге оңай төсе­ліп алды. Әсіресе, Ала­тау ауданына қарасты №178 ли­цейінің ұстаз қауымы
IV тоқсан бас­тал­ған сәттен-ақ ата-ана мен оқу­шыға қолдау білдіріп, өзара ауызбірлікте жұмыс істеді. Білім берудің барлық платформасын пайда­ланып, ұтымды жерін алуға тырысты.

№178 лицей директоры Қай­рат­бек Шадиевтің айтуын­­­­­ша, қашық­тан білім беру жүйесінде көп нәрсе кері байланыс жасайтын мұғалімге, мұғалімді қолдайтын ата-анаға байланысты. «Егер олар өзара ауызбірлікте жұмыс істесе, нәти­желі көрсет­кіш­ке қол жет­кі­зуге болады», дейді мек­теп директоры. Ал лицей ди­рек­­торының оқу ісі жөніндегі орын­басары Гүлжан Сауыт­қы­зы­ның айтуынша, әлемдегі 167 мемлекеттің тәжірибесіне сүйеніп, қашықтық жүйеде білім алып жатқан мектеп оқушылары кері байланыс орнатуда Kun­de­lik платформасын кеңінен пай­да­ланған. Бұл тұрғыда мектеп ұжы­мы арнайы сауалдама да жүр­гізді. «Нәтижесіне қарасақ, оқушылар мұғалімдердің сабақ беру нәтижесін 67,4 пайызбен жоғары бағалады. Мұғалімдер мен оқушылар өзара кері байланыс жасағаны қуантты. Демек, ұстаз қауымы да, оқушылар да цифрлы сауатын арттырып, білім беру ресурстарын тиімді пайдалануды үйренді деген сөз», дейді Гүлжан Шажабаева.

Әрине биылғы оқу жылы мектеп түлектеріне күтпеген «тосын­сый» жасады. Алда ҰБТ сына­ғы күтіп тұр. Қазір 11-сынып оқушылары шама-шарқынша өздері дайындалуда. Аз күннен соң алтын ұядан ұшқалы отырған түлектер мектеп ұжымы мен сынып жетекшісінің қолдауына зәру екені түсінікті.

№178 лицейінің 11 «Е» сынып жетекшісі, ағылшын тілі пәнінің мұ­ғалімі Таня Ерназарқызы Бек­болатова: «Әрине балалар мек­теп бітіретін сәттен тәтті есте­лік қалғанын қалады. Соңғы қо­ңырау салтанатында көз алдымда өскен ұл-қыздарымды қо­лымнан ұшырамын деген менің де арманым болды. Бірақ әр нәр­сенің қайыры бар. Біз ғана емес, әлемдегі миллиондаған оқу­шы қашықтан оқу жүйесіне көшіп, соңғы қоңырауды жыл­да­­ғыдан өзгеше өткізгені отыр. Осы жағдайға байланысты минис­тр­л­і­ктің мемлекеттік емтиханды алып тастауы да үлкен жеңілдік. Сон­дықтан түлектер жаңа өмірге қадам басар алдында сабырлы болып, ҰБТ сынағынан сүрінбей өтсе деген тілегім бар», деп ағы­нан жарылды.

Қашықтан білім беру жүйесін енгізбес бұрын әлемдегі 167 мем­лекеттің тәжірибесіне сүйен­дік. Қазір осы жүйемен елі­міз­­дегі
5 млн-нан астам оқушы мен студент білім алуда. Қашық­тан білім беру – оқушыны жаңа­шылдыққа, тың ізденіске жетелейтінін көр­сет­ті. Ал осындай қысылтаяң шақта жан-жақты білім беруге бар күш-жігерін салған ұстаз қауымына ата-аналар тарапынан алғысы зор.

 

Динара Мыңжасарқызы,

журналист

 

Алматы қаласы

 

Соңғы жаңалықтар

Кім қалай оқып жүр?

Әдебиет • Бүгін, 12:02

ҚПЛ бір командаға азайды

Спорт • Бүгін, 08:17

Тарихқа таразы болар бастама

Саясат • Бүгін, 08:04

Жүйелі жұмысты қажет етеді

Саясат • Бүгін, 08:01

«Balapannan» базарлық

Қоғам • Бүгін, 07:23

Жетім бұрыштағы жеті нота

Өнер • Бүгін, 07:20

Алаштың асыл перзенті

Руханият • Бүгін, 07:07

Ұқсас жаңалықтар