«Бәйтерек» ҰБХ» АҚ-та «Қазақстан Республикасы индустрияландыру бағдарламасын қаржыландыру жобасын жетілдіру» жөніндегі басқарушы комитеттің екінші отырысы өтті.
«Бәйтерек» ҰБХ» АҚ-та «Қазақстан Республикасы индустрияландыру бағдарламасын қаржыландыру жобасын жетілдіру» жөніндегі басқарушы комитеттің екінші отырысы өтті.
Оған Қаржы министрі Б.Жәмішев, «Атамекен» одағы» ҚҰЭП президиум төрағасы Т.Құлыбаев, «Бәйтерек» ҰБХ» АҚ басқарма төрағасы Қ.Бишімбаев, McKinsey (МакКензи) жаһандық зерттеулер институтының директоры Ричард Доббс, «Ракурс» экономикалық сараптама орталығының директоры О.Жандосов, екінші деңгейлі банктердің басшылары, халықаралық сарапшылар қатысты.
Отырыста сарапшылардың ел экономикасының маңызды секторларындағы ахуалына қатысты жасаған сараптамалары тыңдалып, экономикаға тартылатын инвестиция көлемін арттыру үшін қаржы секторын жетілдіру бағытындағы шараларға қатысты ұсыныстар жасалды.
Сарапшылардың тұжырымы бойынша, ішкі жалпы өнім өсімін 7 пайызға жеткізу үшін 2013- 2020 жылға дейін 80 млрд. доллар шетелдік инвестиция тарту керек. Бұл шамамен жылына 10 млрд. долларға жуық. Бұл инвестицияларды отандық жеке сектордан және де тікелей шетелдік инвестициялық құйылымдар арқылы тартуға болады.
Қазіргі жағдайда екінші деңгейлі банктер «нашар» несиелердің қордалану мәселесін шешуге аса мүдделілік танытып отырған жоқ. Борышты өндіру процесі ұзаққа созылады, салыққа қатысты түйткілдер туындайды, әрі бұл мәселені шешудің айқын әдіс-шаралары қарастырылмаған. 2008-2010 жылдардағы дағдарысқа дейін банктер несиелерді кепілдендіру құралдарын сараптауға ерекше көңіл бөлген де, қарыз алушылардың бизнесін саралауға, салалық біліктілікті дамытуға тиісті мән бермеген. Осының салдарынан NPL көрсеткіші дағдарыстан кейінгі кезеңде жоғары күйінде қалуда.
Сарапшылардың пікірі бойынша, ішкі қор нарығын KASE-ның (Қазақстан қор биржасы) өтімділігін акцияларға сұранысты да, эмитенттер тарапынан ұсынысты да ынталандыру арқылы көтеруге болады. Сарапшылар мемлекеттік компанияларды KASE арқылы ішінара жекешелендіруді ұсынып отыр (мысалы, IPO бағдарламасын жандандыру арқылы).
«Бәйтерек» ҰБХ» АҚ басқарма төрағасы Қуандық Бишімбаевтың айтуынша, қазір қаржыландыру көздері нақтыланып, бұл ресурстарды экономикаға тартудың тиімді механизмдері мен әдістері қарастырылуда. Егер экономиканың ағымдағы жағдайын алатын болсақ, соңғы бес жылда жеке инвестициялардың, соның ішінде шетелдік инвестициялардың, банктердің үлесі азайып, керісінше, мемлекеттік сектор тарапынан инвестиция салу ауқымы айтарлықтай артқан. Сондықтан мемлекеттік бюджетке түсіп отырған салмақты азайту үшін инвестицияның негізгі бөлігі жеке сектор мен шетелдік қаржы көздерінен тартылатындай жағдай жасау керек.
«Егемен-ақпарат».
