Әлем • 02 Маусым, 2020

Трамп бункерге тығылды

361 рет көрсетілді

АҚШ президенті Дональд Трамп Вашингтон қаласындағы шеруге шыққандардың ықпалынан қашып, Ақ үйдің арнайы жерасты бункеріне тығылды. Оқиға туралы алғаш ақпарат таратқан The New York Times газетінің хабарлауынша, Құрама Штаттарының басшысы бір сағатқа жуық бункерде болған.

CNN арнасы таратқан ақпаратқа сүйенсек, Д.Трамппен бірге жұбайы Мелания Трамп пен ұлы Баррон да бункерге жеткізілген. Ақ үй басшысының мұндай қадамына бүкіл елде жүріп жатқан шерулер әсер етті. Әсіресе ап­­­­таның аяғында Вашингтонда мың­даған наразы Ақ үй маңына жиналып, Д.Трамптың атына қарғыс жау­дырып, ғимаратқа қарай кірпіш, бө­тел­ке лақ­тырған. Шерушілердің екпіні­нен се­кем­денген «Құпия қызмет» өкіл­дері президент пен оның отбасын про­­токолға сәйкес қауіпсіз камераға апарған.

The New York Times газетінің хабар­лауынша, Ақ үй маңындағы митинг кезінде Д.Трамп қауіпсіз бөлмеде отырып, туиттердегі парақшасына жазбаларды қарша боратыпты. Нара­зы­лардың әрекетін заңсыздыққа те­ңе­ген ол елдегі демократтарға да тиі­сіп­ті. Дегенмен, аталған басылым пре­зидент айналасындағылар ше­ру­ші­­лер­дің әрекеті тікелей Д.Трампқа ба­ғытталмағанын, керісінше елдегі нә­сілдік бөлінуге байланысты туын­даға­нын жеткізуге тырысқанын кел­тіреді.

Естеріңізге салсақ, АҚШ-та қара нә­сілді Джордж Флойдтың полиция қо­лынан қаза табуына байланыс­ты халық шеруге шығып, кө­ше­лерді қиратып, тонап, полиция­мен қақтығысып, бір­неше адам жарақаттанған-ды.

Миннеаполис қаласында 25 мамырда полиция қызметкерлері жалған банкнот қолданған-қолданбағанын тек­серу үшін Джордж Флойд есімді қара нәсілді азаматты тоқтатады. Ол көліктен шығудан бас тартқан. Құқық қорғаушылар оның қолына кісен салғанда жағдайы нашарлағанын байқап, ауруханаға жеткізеді. Әйтсе де, Флойд ауруханаға жетпей демі үзіледі.

Осы оқиғадан көп ұзамай әлеу­меттік желілерде Флойдты тұтқындау сәті бейнеленген видео тарады. Онда полиция қызметкері қара нәсілді аза­матты қылқындырып, мойнын тізе­сімен басып отырғаны байқалады. Видеода Флойдтың бірнеше рет «Дем жетпей барады!» айқайлап, «Мені өл­тірмеңдерші» деп жалынғаны естіледі.

Осы оқиғадан кейін Флойдтың өлі­міне қатысы бар 4 полиция қыз­меткері жұмыстан қуылса, оны қыл­қындырған Дерек Шовин есімді полицей тұтқын­далған. Оған күш қолданып, бірақ қастандықсыз адам өлтірді деген айып тағылып отыр.

Флойдтың өлімінен кейін АҚШ-тың көптеген қаласында әлеуметтік теңсіздік пен нәсілшілдікке қарсы жаппай наразылық шерулері басталған-ды. Бірнеше қалада митин соңы тәр­­тіпсіздікке ұласқан. Наразылық біл­дірушілер көшелерде от жағып, ар­найы жасақ қызметкерлеріне тас лақтырған. Наразылық акцияларына байланыс­ты Миннеаполис, Вашингтон, Лос-Анджелес, Майами, Портленд, Сан-Франциско, Чикаго, Атлант, Индианаполис, Филадельфия секілді бірқатар қалада комменданттық сағат енгізілді. Сондай-ақ АҚШ-тың ұлттық гвардиясы тәртіпті сақтауға бес мың сарбазды жұмылдырған. Олар Вашингтон қаласы мен 15 штатты өз қарауына алған.

 

Соңғы жаңалықтар

Шәміл

Тарих • Кеше

ZOOM акциялары қымбаттады

Технология • Кеше

Ұқсас жаңалықтар