МҰНАЙ-ГАЗ ӨНЕРКӘСІБІНЕ ҚЫЗЫҒУШЫЛЫҚ

Атырау қаласында “Атырау Мұнай, Газ және Инфрақұрылым – Atyrau Oіl & Gas 2010” көрмесі мен “OіlTech Atyrau” конференциясы өтті. Оған  Ұлыбритания, Германия, Италия, Қазақстан, Қытай, Литва, Ресей, Түркия, Украина мен Франциядан келген 100 компания қатысты. Көрмеде “ҚазМұнайГаз” ҰК, “Теңізшешевройл” мен “North Cas­pіan Operatіng Company” (NCOC) компанияларынан басқа мұнай-газ саласында сервистік қыз­мет көрсететін, мұнай-газ жабды­ғын, арнайы киімді және қоршаған ортаны қорғау жөніндегі техноло­гия­ларды ұсынатын, сондай-ақ құ­ры­лыс салу мен инфрақұрылым саласында жұмыс істейтін компа­ния­лардың жұмысы мен өніміне айрықша қызығушылық танытуда. Олардың арасында “Атырау­Нефте­Маш”, “КазПромПрибор”, “Сер­вис­ный центр “КазТурбоРемонт”, “Прикаспийский машинострои­тель­ный комплекс” ЖШС, “Энер­го­центр Азия” секілді отандық ком­паниялардың қатысып отырғанын ерекше атап өту керек. Ресейдің компаниялары да көптеп қатысуда. Көрме аясында “OіlTech Atyrau” техникалық конференция­сы басталды. Оның жұмысына 150 делегат қатысуда. Техникалық кон­ференцияның тақырыптар аясы кең. Мәселен, “Атырау облысының Қазақстанның саяси және эко­но­ми­калық дамуындағы рөлі”,  “Қа­зақстанның барлау және өндіру секторын страте­гиялық дамытудағы мемлекеттің рөлі”, “Су ресурстары мен төкпе суларды басқару: ше­шім­дер және технологиялар”, “Қа­тал климат жағдайларында сақтап қалу арқылы күрделі жұмсалым­дар­ды қорғау”, “Батыс Қазақстан ай­мағының шектерінде инженерлік-геологиялық (геоэкологиялық) зерттеулер жүргізу концепциясы”, “Қазақстанның мұнай өңдеу өнеркәсібін дамыту: нақты мы­сал­дар  Атырау мұнай өңдеу зауыты”, және тағы басқа тақырыптарды қамтымақ. Сондай-ақ, осы күні “Қазақ мұнай және газ институты” АҚ негізінде құрылған, Қазақстан үшін бірегей маңызы бар петрофи­зи­калық лаборатория ашылды. Заманауи жабдықпен жарақталған бұл лаборатория аймақтың жер қойнауын пайдаланушыларына керн материалына жергілікті ма­ман­дардың күшімен қажетті жедел әрі сапалы зерттеу жүргізуге мүм­кін­дік беретін болды. Бұрын мұн­дай зерттеу тек шетелде жүргізілетін. Осы конференцияда “Нефте­газ” ГНКАР ҒЗӨИ өзінің жаңа әзірленімдерін ұсынды. “Нефтегаз” ГНКАР ҒЗӨИ директоры Исмаи­лов Фахреддин Саттар оглы “Жаңа композициялық деэмульгатор” тақырыбында баяндама жасады. Институт Әзірбайжан мен Қазақ­станның кен орнының тұрақты мұнай эмульсияларын ыдырату үшін деэмульгация әсерін тигізетін кейбір композициялық құрамдарды әзірледі. Қазақстанда соңғы он жылдың ішінде мұнай шығару кө­лемі екі есе ұлғайды. Көмірсутек шикізатын әлемдік рыноктарға тасымалдаудың жаңа бағыттары ай­қындалуда. Мұнай-газ саласының дамуы Қазақстан экономикасының шикізаттық емес секторларының даму қарқынына оң әсер етеді. Бүгінде Қазақстан Еуразия аймағының көшбасшы елдерінің біріне айналды. Ел экономика­сы­ның дамуында мұнай-газ өнер­кә­сібінің рөлі басым болып отыр. Өндірістік қуатттардың өсуі және көлік инфрақұрылымының кеңеюі мұнай-газ саласында қазақстандық және шетелдік серіктестер арасын­дағы ынтымақтастықтың нығаюы­на септігін тигізіп отыр. Батыс Қазақ­стан аймағы, соның ішінде Атырау  өңірінің өркендеу маңызы ерекше, мұны осында өткізіліп жатқан мұнай-газ іс-шараларына деген қызығушылықтың барған сайын артып отырғаны тағы да айғақтайды, дейді ұйым­дастыру­шылар. Жолдасбек ШӨПЕҒҰЛ. Атырау облысы.