Коронавирус • 10 Маусым, 2020

COVID-19: Қауіп қайта күшейді ме?

167 рет
көрсетілді
7 мин
оқу үшін

Бірер күн бұрын Дүниежүзілік денсаулық сақтау ұйымының басшысы Тедрос Аданом Гебреисус әлемде пандемияның беті әлі қайта қоймағанын айтып, босаңсуға болмайтынын ескертті.

COVID-19: Қауіп қайта күшейді ме?

Сурет «Егемен Қазақстанның» архивінен алынды

Кей өңірлерде карантин күшейді

«Қазірге дейін 7 млн-дай адамнан коронавирус анықталды, 400 мың адам көз жұмды. Еуропада жағдай жақсар­ғанымен, жаһандық ахуал нашарлап барады. Соңғы 9 күнде вирус анықталғандардың саны тәулік сайын 100 мыңнан асып түсіп отыр. Тіпті жексенбі күні 136 мыңға жетті», деді Гебреисус. Ден­саулық сақтау саласының маман­дарын вирустың симптомсыз таралуы мен аймақтарда өр­ши түсуі алаңдатып отыр. Олар үшін пандемияның екінші толқы­ны­ның алдын алу мәселесі де өте өзекті.

Қазақстандағы жағдай да кө­ңіл көншітпейді. Мемлекет басшысы Қасым-Жомарт Тоқаев­тың Twitter-дегі парақ­ша­сында: «Үкіметтік комиссияның барлық іс-әрекетіне қарамастан, індетке шалдыққан азаматтарымыз азай­май отыр. Коронавирустың екінші толқынының қаупі сейіл­ме­генін ДДҰ да растады. Отан­дастарымызды жаппай ауруға шалдығудан қашып, індеттен қор­ғанудың жолдарын (ара қа­шық­тықты сақтау, дезинфекция, же­ке тазалық, бетперде кию) ұстану­ға тағы да шақырамын», деп жаз­ғаны бекер емес.

Шынында, төтенше жағдай аяқталғаннан кейін халықтың басым көпшілігінде босаңсу пайда болған сияқты. Атап айтқанда, 11 мамырға дейін елімізде 5 мың­ның айналасындағы адам вирус жұқтырған болатын. Бір айға жетпейтін уақытта бұл көр­сет­кіш 2,5 есе көбейді. Яғни елі­мізде індетке шалдыққандар 13 мыңнан асып түсіп отыр.

Түркістан және Қызыл­орда облыстарында каран­тиндік шектеу шаралары эпидемиялық жағ­дай тұрақталғанға дейін ұзар­тыл­ды. Мысалы, Шымкент қала­сын­да сырқаттану деңгейінің өсуі­­не байланысты карантин 22 мау­сымға дейін жалғасады. Ал Қы­зылордадағы «Қамбаш» дем­­алыс орнының жұмысы тоқта­­тылды. Аймақтағы балалар сауық­­тыру лагерьлерін іске қосу мер­­зімі де кейінге шегеріліп отыр.

Маңғыстау облысында СOVID-19 індетін жұқтыр­ған­дардың 7%-ға артуына байланыс­ты 8 маусымнан бастап каран­тиндік шаралар қайта күшей­тілді. Аймақтағы бас сани­тарлық дәрігердің қаулысымен бірқатар нысандар жұмысын тоқтатты. Қаулы­да ка­ран­тиндік іс-шаралардың тәртібі мен мер­зімдері COVID-19 коро­на­вирустық инфек­циясының таралу жағдайының өзге­руіне сәйкес өз­гер­тіл­уі мүмкін екені көрсетілген.

Алматы облысының бас санитар­лық  дәрігері Қайрат Баймұхамбетовтің ай­туынша, өңір­дегі коронавирус жағ­да­йы карантин талаптарын жеңіл­де­ткеннен кейін өрши бастаған. Яғни ка­рантин кезінде аурудың таралу көр­сеткіші 2%-дан аспаған болса, бүгінде 5,5%-ды көрсетіп тұр. Әсі­ресе вирустың тара­лу қарқыны Тал­дықорған қаласында жоға­ры. Осыған байланысты 6 маусым күні Талдықорғанның бас санитарлық дәрі­­гері жаңа қаулы шығарды, облыс орталығында карантин режімі жал­ғасады. Бірақ блок, санитарлық бекет­тер қойылмайды, ешбір нысан жа­был­майды. Тек қатаңдату шаралары объектілердің жұмыс уақытын қысқартуға ғана әсер етеді. Ал дезин­фек­циялау жұмыстары қоғамдық орын­­дарда, халық көп шоғырланатын жер­­лер­де, тұрғын үй кіреберістерінде күн­де жүргізіледі.

Ақтөбенің Шалқар ауданында да кешеден бастап карантин күшейді. Халқы 50 мыңға жетпейтін ауданда бір аптада 19 адам вирус жұқтырған. Аты­рау облысының Құрманғазы ауданына қарасты Ақкөл ауылдық ок­ру­гі де карантинге жабылып, ауыл­ға кіріп-шығуға тыйым салынды. Атал­ған ауылда 18 адамнан коронавирус инфекциясы анықталып, бір адам қай­тыс болған. Сондықтан да Құр­ман­ға­зы ауданы бас санитарлық дәрі­гері Карл Отаровтың қаулысымен каран­тин­дік шаралар 18 маусымға дейін ұзар­тылып отыр. 

Ал дүйсенбі күні Денсаулық сақтау министрлігінің Facebook-тегі ресми парақшасы арқылы сұхбат берген Бас мемлекеттік санитарлық дәрігер Айжан Есмағамбетова Алматы мен Нұр-Сұлтан қалаларындағы карантин талаптарына тоқталды. «Науқастар санының артуы – карантинді күшейту немесе жұмсартудың жалғыз факторы емес. Алматы облысын алып қарасақ, бір апта ішінде ауру өсімі 7%-ға артқан, сондықтан карантин күшейтілді. Нұр-Сұлтан мен Алма­ты­дағы көрсеткіш 7%-дан төмен. Бірақ соңғы аптадағы оқиғалардың 30%-ы осы қа­ла­ларға тиесілі. Төтенше жағдай ре­жі­­мінен кейін ашылған нысан­дардың жұмысын тексеретін мони­то­рин­гт­ік топ нысандардың 53%-ы ереже бұзғанын анықтады», деді бас санитар.

 

Симптомы жоқтар статистикаға енбейді

Бұған дейін Денсаулық сақтау министрлігі күн сайын коронавирус инфекциясын жұқтырған науқастар бойынша статистика жүргізіп келді. Статис­тикаға ауру белгілері болсын, бол­­ма­сын, вирус анықталғандардың бар­­лығы еніп келген болатын. Енді ми­нистрлік клиникалық белгілері бар азамат­тарды ғана есепке алып,  сим­п­то­­мы жоқ тасымалдаушылардың са­­нын жеке жариялай бастады. «Бұл ха­лықаралық тәжірибе және түр­лі елдерде қолданылып келеді. Бұ­лай бөлудегі мақсат – симп­то­ма­ти­ка­лық емдеуді қажет ететін нау­қас­тар­дың саны бойынша жағдайды көр­се­ту. Ауру белгілері жоқ адамдар ай­на­ла­­сын­­да­ғыларға едәуір эпи­демия­­лық қауіп төндіреді. Бүгінде ел­і­­­міз­де тестілеу арқылы күн сайын анық­­талып жатқан жағдай­лар­дың 60%-ға жуығы – симптомсыз тасы­мал­­­дау­шы­лар», деп хабарлады минис­тр­­лік.

Бас санитар А.Есмағамбетова елі­­­­мізде вирустың өткен аптадағы та­­ра­­лу деңгейін осы тәртіп бойын­ша түсіндіріп берді. «Өткен апта­да­­­ғы күнделікті науқастар өсімі 1,9 % бен 4,7% аралығында болды. Бұл – симптомды және симп­том­сыз нау­­қас­тардың жалпы саны. Нау­қас­тар­­­ды 3 маусымнан бастап, симп­том­ды және симптомсыз деп бөле бас­­­тадық. 3-7 маусым аралығында 1357 симптомсыз, 1073 симптомды науқас тіркелді. Олардың 45%-ы нау­қас­­тармен байланыста болса, 40%-ы – профилактикалық тексеруден өткен­дер. Ауру белгілерін байқап, дәрі­герге хабарласқандар 10%-ды құ­ра­са, шетелден келгендер – 5%»,  деді ол.

Кеше Нұр-Сұлтан қалалық қоғам­дық Денсаулық сақтау басқармасының басшысы Сәуле Қисықова екі топ­та­ғы науқастарға қалай ем-дом жасалатынын былайша түсіндірді: «Кли­никалық белгілері жоқ вирус тасы­мал­даушыларға қатысты статистика жеке жүргізіледі. Бүгінде елордада коро­навирус жұқтырғандардың 60%-ы клиникалық белгілері жоқ вирус тасы­малдаушылар болып отыр. Бұл шара медициналық көмекті ұтым­ды әрі уақтылы көрсетуді ұйым­дас­ты­ру үшін жасалуда. Симптомы бар нау­қастарға көбірек көңіл бөлі­неді.  Ал ауру белгісі жоқ үй каран­тинін­дегі адамдарға емханалар арна­йы нұсқаулық беріп, қашықтан бақы­лай­ды. Науқастар қажетті аппараттармен қам­­тамасыз етіліп, олардың жағдайын білу үшін күн сайын қоңырау шалы­на­ды. Клиникалық белгі пайда болған кезде, олар белгіленген ауруханаларда тек­серіледі. Осы орайда өкпені рентгенге немесе компьютерлік томо­гра­фия­ға түсіреді. Қорытындыға сәйкес ем-дом жүргізіледі».

Өкінішке қарай жарты жылдан бері әлемді әлекке салған індетке сен­бей­тіндер арамызда күн санап көбейіп барады. Бұл вирустың таралуынан да қауіпті десек артық айтқан болмаймыз. Статистиканың күн санап өсуі сақтыққа салғырт қарауға жол бермеу керектігін айқын көрсетеді.