Елімізге белгілі фотосуретші Асылхан Әбдірайымұлы бастаған «Фотоөнер» қоғамдық бірлестігі мүшелері Маңғыстаудың керемет жерлерін аралап, фотоға түсірді.
7-10 маусым аралығында өткен фото-экспедицияның негізгі мақсаты – әр өлкенің тылсым табиғатын, әдемі, көркем жерлерін, ұлттық өнерін, дәстүрі мен мәдениетін көрсетіп, шет мемлекетке таныту. «Фотоөнер» қоғамдық бірлестігі мүшелері төрт күн ішінде Түпқараған, Маңғыстау, Қарақия ауданында болып, алғаш рет өңірдің киелі жерлеріне таңғы және түнгі әдіспен фототүсірілім жасады. Олар Бозжыра, Тобықты, Тамшылы, Жығылған, Саура, Шерқала, Айрақты секілді Маңғыстаудың сырлы жерлерін суретке түсірді.
– Маңғыстау табиғатының көркемдігіне көз тоймайды. Салт-дәстүрді өте берік ұстанған жер. Түйе шаруашылығы дамыған. Шұбаттың отаны саналады. Осының бәрін болашақ ұрпаққа қалдырғымыз келеді. Мың сөзді бір суретпен жеткізу бар мақсатымыз, – деді Түркістан облысының фотографы, «Фотоөнер» ҚБ мүшесі Мақсат Шағырбай.
Экспедиция мүшелері Маңғыстаудың кереметтерімен қоса сапардың соңғы күнін Ақтау іргесіндегі Каспий жағалауындағы көрініске арнады. Шаһар тұрғындарының теңіз жағасындағы серуенін, жастардың ән айтып, бөбектердің бақытты күлкіге бөккен сәттерін кадрға түсірді.
Экспедиция барысында жас фотографтарға шеберлік сағатын өткізу жоспарланған болатын, алайда карантинге байланысты бұл шара кейінге қалдырылып, онлайн түрде өтетін болды. Осылайша әр аймақта өткізілген «Фотоөнер» ҚБ мүшелерінің 7-экспедициясы киелі өлкеде өткізілді.
– Фотография – бір ұғым болғанымен оның жанры әртүрлі. Біздің құрамдағы шебер мамандардың бірі табиғатты, бірі адамның бейнесін, енді бірі туристік әлеуетін фототұзаққа алды. Шетелдің керемет жерлері мен нысандарын ғаламтордан іздегенде кәсіби суреттерге тап боласың. Ал бізде көбінесе әуесқой түсірген сапасыз суреттер шығады. Осы олқылықтың орнын толтыру үшін де аталған жұмысты қолға алдық, – дейді Т.Жүргенов атындағы өнер академиясының ұстазы, Алматы қаласының «Фотоөнер» ҚБ жетекшісі Оңғарбек Алхаров.
Ізгі шара алдағы уақытта жалғасын табады.
Маңғыстау облысы
