Тоғыз оқушы мен тәрбиеші тауға күндіз шығыпты. Олардың алтауы мен тәрбиеші өз бетімен төменге түскен, ал 3 оқушы адасып кеткен.
Ішкі істер министрлігі Төтенше жағдайлар комитетінің хабарлауынша, тәрбиеші таудан түскеннен кейін сағат 22:48-де "112" нөміріне хабарласқан. Сағат 23:00-ден бастап Шымкент қаласының Төтенше жағдайлар департаменті Жедел-құтқару жасағының (6 қызметкер мен 1 техника), Түркістан облысының ТЖД (10 қызметкер мен 3 техника), жедел медициналық жәрдем бригадасы (5 қызметкер мен 1 техника), полиция бөлімі (2 адам мен 1 техника) күштері іздестіру-құтқару жұмыстарын жүргізді. Өкінішке қарай, жексенбіден дүйсенбіге қараған түн жарымда, яғни 00:58-де Шымкент қаласының ТЖД-ның іздестіру тобы жардан құлап кеткен 2003 жылы туған жасөспірімнің өлі денесін тауып, жерге түсірді. Ал екі оқушымен түске жақын хабарласуға мүмкіндік туған. Құтқарушылардың айтуынша, олармен ұялы телефонмен байланыс бар.
"Шымкент қаласы ТЖД ЖҚЖ құтқарушылары альпинистік құрал-жабдықтарды қолдана отырып, балаларды түсіру және құтқару бойынша операция жүргізуде. Алайда, жартасты жерлер, биік таулар мен тік беткейлерге байланысты құтқару жұмыстары қиындай түсуде. Құтқару операциясының қорытындысы туралы қосымша хабарланады", - делінген ІІМ ТЖК хабарламасында.
Түркістан облысы
