Елбасы • 17 Маусым, 2020

Елбасы жолымен

254 рет көрсетілді

Еліміздегі ауылшаруашылық саласы мамандарының негізгі ұстаханасы саналатын жетекші оқу орны – Қазақ ұлттық аграрлық университеті биыл 90 жылдық белеске көтеріліп отыр.

Университеттің бүгінгі ұстанымы – мемлекетке жүк артпай, автономиялық басқару негізінде халықаралық байланыстарды күшейте отырып, еліміздің агроөнеркәсіптік кешенінде сұранысқа ие, озық біліммен қаруланған, ұлттық құндылықтарды бойына сіңірген, бәсе­кеге қабілетті жаңа буын мамандарын даярлау. Осы мақсатта оқу орны тиімді менеджментті қолдану арқылы зерттеу университетіне трансформациялану үрдісін жүзеге асырып, әлемдік университет талаптары бойынша дамуда.

2001 жылы Қазақстан Республика­сы­ның Тұңғыш Президенті Н.Ә.Назарбаев­тың Жарлығымен оқу орнының жоғары ғылыми әлеуетті және кәсіби білікті мамандар даярлаудағы жетістіктері ес­кері­ліп, университетке Ұлттық мәр­тебе берілген уақыттан бастап уни­вер­­­­си­тетіміз Елбасы негізін қалаған ай­қын жолмен жүріп, биік белестер­ді ба­ғын­дырып келеді. Бүгінде универси­тет өзінің барлық ресурсын шоғырлан­ды­­рып, еліміздің аграрлық саласының бә­се­­кеге қабілеттілігіне ықпал жасай ал­атын, ғылым мен білімнің, аграрлық-индустриялық дамудың инновациялық ортасының түпқазығына айналды.

Қазіргі уақытта оқу орнымыздың тоқ­сан жылдық тарихынан сыр шертіп, жет­кен жетістіктерін баяндайтын, оның қалыптасып, дамуына ерекше ық­пал жасаған зерделі ғалымдар мен біре­гей тұлғалар жайында тағылымды кітап­тар шығаруды қолға алған болатын­быз. Жақын­да университетіміздің соң­ғы жиыр­ма жылында атқарылған еңбек­тері­мізді саралап, «Елбасы жолымен» деп ата­латын кітап шығардық. Бұл кітап егемен елі­міздің арғы-бергі тари­хынан сыр шертетін топтама­лы мақала-эссе­лері­мен, сирек кездесе­тін фото­сурет­тері­мен тартымды. Соны­мен қатар бұл жинақ Елбасы жолы­мен айқын бағыт ұс­тан­­ған универси­теті­міздің тыныс-тір­­ші­лігін, ұжымның атқарып отырған келелі істерін, студент жастарымыздың білім­ге деген құлшынысын әйгілеуімен де құнды.

Жақында университетімізде ел зия­лы­лары мен жастардың қатысуымен жаңа кітаптың on-line тұсауке­серін өткіздік. Тікелей эфирде ұйымдасты­рылған тұсаукесер шарасына «Қазақстан Республикасының Тұңғыш Президенті – Елбасы кітапханасының» директоры Әмірхан Мұратбекұлы Рахымжанов, Алматы қаласы Қоғамдық даму басқар­ма­сының  басшысы Диас Рахметұлы Ес­дәу­летов, Әл-Фараби атындағы Қазақ ұлт­­тық университетінің ректоры Ғалым­қайыр Мұтанұлы, Т.Жүргенов атындағы Қазақ ұлттық өнер академиясының рек­торы Ақан Жылқышыбайұлы Әб­дуа­лиев сынды азаматтар қатысып, «Елбасы жолымен» кітабының білім жолындағы жас­тарға беретін рухани өнегесі мол екен­дігін атап өтті. Шамалған ауылындағы Елбасы оқыған Қарасай батыр орта мек­­тебінде «Елбасы музейін» ұйым­дас­тырған ардагер-ұстаз, «Құрмет» ордені­нің иегері Рымкеш Шәйкенқызы Бай­қо­нысова ізгі ниетін білдіріп, ұжымға ақ батасын беріп, Елбасы туып-өскен өңірдің зиялылары мен жастары да онлайн байланысқа шығып, жаңа жинаққа қатысты өз ойларын білдірді.

«Елбасы жолымен» кітабы «Н.Назар­баев феномені» және «Н.Назарбаев: білім-ғылым және «Рухани жаңғыру» инс­титуты» деп аталатын екі бөлім­нен тұрады. Бірінші бөлімде Елбасының тәуелсіздік бастауынан бүгінге дейінгі ел болашағын қамта­масыз ету жолындағы қажырлы еңбегі баян­далса, екінші бөлім­де университетте Ел­басының тіке­лей қолдауымен іске асы­ры­лып отыр­ған руханият бағытын­дағы өнегелі бастамалар мен ауқымды жобалар туралы жан-жақты баяндалған.

Егемен ел болудың күрделі құрылы­сын басқарып, жаңа да жас мемлекет­тің іргесін қалыптастырған Қазақстан Республикасының Тұңғыш Президенті – Елбасы Нұрсұлтан Әбішұлы Назарбаев әлемдік саясат ауқымына «Қазақстандық даму моделі» ұғымын енгізді. Ел дамуы­на айрықша ықпал етіп отырған Елбасы сая­сатында ғаламдық деңгейдегі кемең­гер тұлғаға тән көрегендік қасиет жатыр. Міне, осы құбылысты әлемдік сарапшылар «Назарбаев феномені» деп атап жүр. Бұл – Елбасының даналық болмысы, болашаққа бағытталған саяси стилі, қоғаммен қарым-қатынас және стратегиялық басымдықтары арқылы қалыптасқан ерекше тұлғалық құбылыс. Сондықтан отаншылдық қасиет пен тәуелсіздіктің қадірін барынша бойына сіңі­ріп, Елбасының елдік жолындағы өрелі істері мен ерен еңбектерінен үл­гі-өнеге алсын деген мақсатпен атал­ған кітап мазмұны арқылы кейінгі жас буын­­ға «Н.Назарбаев феноменінің» қыр-сы­рын ашуға талпыныс жасадық.

Бүгінгі кезең болашаққа жаңа мін­дет­тер қойып, қоғамның барлық саласына жаңаша көзқараспен қарауды талап етуде. Жаһандану әлемінде өз келбет-кес­кіні мен ұлттық құндылықтарын сақ­тап қалатын, бәсекеге қабілетті, білім­ді әрі белсенді халық қана болашағына зор сеніммен қарай алатынын өмірдің өзі көрсетуде.

Қазақстан ширек ғасырдан астам уақыт аралығында ғасырға татитын жол­дан өтті, осы кезеңде таңғажайып та­быс­­тарға қол жеткізді. Тәуелсіз мемле­кет құру арманнан шындыққа ұласты. Өр­­ке­ниетті даму жолына түскен мемле­кетіміз үшін тәуелсіздік қасиетті ұғым­ға айналды. Біз үшін бұдан асқан бақыт, бұдан қымбат байлық жоқ. Сон­дықтан оны қадірлеп, қастерлеу – әр аза­маттың борышы. Бұл қастерлі ұғымды жастардың бойына дарыту – біздің міндетіміз.

Елбасының білім, ғылымға қатысты ұстанымы, ауыл шаруашылығына қа­тыс­ты бастамалары, әсіресе ауыл жас­­тары­ның келешекке деген үміті мен сені­мін ұялатты. Қазіргі уақытта ауыл жас­тары заманауи біліммен қару­ланып, еліміздегі жоғары оқу орындары­мен қатар, шетел­дің беделді уни­вер­ситеттерінде білім алу мүмкінді­гіне ие болуда. Туған тамырынан нәр алған осы жастардың легіне біз дұрыс бағыттағы білім мен тәрбие бере алсақ, олар келешекте біздің ұлттық потенциалымыздың негізгі көрсеткіші болатыны даусыз. Яғни ауылда туып, ата-баба салтынан ажырамай, дәстүрімізді дәріптеп, құн­ды­лық­тарымызды бойына сіңіріп өскен ұрпақ­тың болашағын қамтамасыз ету  – елдік мақсат болып отыр­ғаны даусыз. Сондықтан ата-баба­ларымыздың сан ғасырлық арманын жүзеге асырған бүгінгі тәуелсіз ұрпақ Елбасы анықтап берген «Мәңгілік ел» идеясы төңірегіне жұмылуы тиіс.

Бүгінгі күні әлемдік сарапшылар бағамдаған «Н.Назарбаев феномені» қазақ­стандық даму мен патриотизм рухының қайнар көзіне айналды. Елбасы­ның батыл қадамдары ішкі саясатта ел эко­но­микасының қарыштап дамуына, сырт­қы саясатта тәуелсіздігіміз­дің қауіп­­­­­сіз­­д­ігін нығайтуға негіз болды. Қай ке­зең­де де Елбасының ұстан­ған жолы, ұсын­­­ған саяси бағдары, мем­ле­кеттік қай­­рат­­керлігі, жасампаздық және жаңа­шыл тұлғасы, Қазақстанды жаң­ғырту жо­­лын­­дағы күрескерлігі еліміз­ді әлем­дік даму­дың үлкен биіктеріне жеткізіп келеді.

Ұлы даламыздың данасы, Түркі әлемі­нің Көшбасшысы ретінде халқының қамын ойлап, елдік мүдде жолында аянбайтын Елбасының кемеңгерлік болмысы мен көрегендік қасиеттері мемлекетіміздің дамуына зор ықпал етіп отырғаны сөзсіз.

Кітаптың «Н.Назарбаев: ғылым-білім және «Рухани жаңғыру» институты» деп аталатын екінші тарауында ұлттық зерттеу университетіне бағдар ұстанған оқу орнымыздың оқу-тәрбие және рухани өміріндегі күрделі үдерістер мен бетбұрысты сәттер баяндалады.

Елбасының «Болашаққа бағдар: рухани жаңғыру» атты бағдарламалық мақаласының басты тұжырымдамалары негізінде университетіміздегі оқу-ғылы­ми бағыт пен тәрбие жұмысы қайтадан қарастырылды. Осы орайда университет Қазақстанның жоғары оқу орындарының арасында бірінші болып «Н.Назарбаев: білім-ғылым және «Рухани жаңғыру» институтын ашты. Басты мақсат – жастардың бойында патриоттық және саяси мәдениетті қалыптастыруға ба­ғыт­талған білім және тәрбие беру жұ­­мыс­тарын жаңаша ұйымдастыру. Сол арқылы талантты және креативті жастарға қолдау көрсету мен олардың әлеуетін арттыру, қазақстандықтардың жаңа буынын қалыптастыру, Қазақстан Республикасының Тұңғыш Президенті – Елбасы Н.Ә.Назарбаевтың өмірлік қағидасы мен жасампаз идеясын жан-жақты пайдалану арқылы жеке тұлғаны әлеуметтендіру және студенттер арасынан көшбасшы тәрбиелеу.

Елбасының «Egemen Qazaqstan» газетінде жарық көрген «Ұлы даланың жеті қыры» атты мақаласы да рухани жаңғыру идеясымен үндес  болғандықтан, бұл бағытты да кеңінен қамтуды қолға алдық. Қазіргі таңда «Назарбаев институты» аясында «Елбасы кітапханасы», «Таза планета», «Парасат» орталықтары, «Саналы ұрпақ» клубы, сатушысы жоқ «Адалдық алаңы», «Еріктілер орталығы» тиімді жұмыс атқарып келеді. Осының бәрі – бүгінгі жастардың ұлттық код пен тарихи түп-тамырын танып-білуі үшін іске асырылатын игі шаралар.

Қай кезде де оқу орнымыз Елбасы жолымен жүріп, мемлекет артып отыр­ған үлкен сенім үдесінен шығу бағыты­нан танған емес. Бүгінгі күні универ­си­те­тіміз мемлекеттік саясат ұстаным­дары­на сүйене отырып, Елбасының нақ­ты стра­тегиялық бағыт­тарына сәй­кес жұ­мыс атқарып келеді. Уни­вер­ситет түлек­терінің басым бөлігі ауыл зия­лы­лары­ның қатарын қалып­тастыруға негіз болып, еліміз бен алыс-жақын шет мемлекеттерде кәсіби маман ретінде еңбекке араласуда.

Оқу орны тарихының әрбір кезеңі белгілі ғалымдар, оқытушылар мен сту­денттердің шығармашылық ізденісі, тал­мас күш-қайраты мен күнделікті ең­бегі­нің арқасында қалыптасқан. Жас­тар­ды тұлғалар арқылы тәрбиелеу ісіндегі тағы бір маңызды мәселе –  тоқ­сан жыл­дық терең тарихы бар универ­сите­тіміз­дің бастауында тұрған қай­рат­кер ғалым­дарымызды, оқу орнының дамуы­на серпін берген тұлғаларды зерттеп-зерделеп, олардың ізгі өнегелерін дәріптеу.

Біздің мақсатымыз – ауыл-ауылдардан келген студенттерімізге заманауи білім беріп қана қоймай, оларды Ел мен Жердің қасиетін бағалайтын тұл­ға ретінде қалыптастыру. Ұлы дала­мыз­дың ұлағатын бойына сіңірген, туған топы­рақтың қадірін біліп, ауылын қадір­лейтін және сол ауылдың зиялысына айналатын азамат тәрбиелеу – парызымыз. Бұл ретте Елбасымыздың әр кездегі ерекше ойлары біздің жас­тарымызды жігерлендіріп келеді. Өйт­кені болашақта егемен еліміздің тұғыры берік болып, қарыштап дамуы үшін сапалы білімі, саналы тәрбиесі бар, рухы биік, отан­сүй­гіш жастар мен ин­но­ва­циялық техноло­гия­­ларды игерген білікті мамандар ғана биік белесті ба­ғын­дыра алмақ.

Елбасы Нұрсұлтан Әбішұлы Назар­баев­тың өз сөзімен түйіндесек: «Біз – жолы­мызды дұрыс таңдай білдік. Бұған бү­гінгі қолымыз жеткен нәти­же­лері­­міз дәлел. Осы негізде өзіміздің ілгері бас­қан қадамдарымызды жеделдете түсуге тамаша мүмкіндігіміз бар. Қазақстанды әлемнің дамыған әрі көркейген елдерінің қатарына қосатын жол – осы».

 

Тілектес ЕСПОЛОВ,

Қазақ ұлттық аграрлық университетінің Басқарма төрағасы – ректор, ҰҒА вице-президенті, академик, Әл-Фараби атындағы мемлекеттік сыйлықтың лауреаты

 

Соңғы жаңалықтар

Арақ сатылмайтын аудан

Аймақтар • Кеше

Ерлікке толы суреттер

Руханият • Кеше

Ұқсас жаңалықтар