– 2019 жылы банк жүйесіндегі депозиттер 2,5 пайызға көбейіп, 19 трлн теңгеге жетті. Бұған қоса ұлттық валютадағы салымдардың мөлшері 13,1 пайызға өсіп, 10,8 трлн теңге болды. Бұған теңгемен берілетін ставкалардың жоғарылығы, сонымен бірге айырбас бағамының тұрақтылығы себеп болып отыр. Ал шетелдік валютамен жиналған депозит мөлшері 8,7 пайызға азайып, 8,2 трлн теңгені құрады. Соның арқасында депозиттердің долларлануы 43,1 пайызға төмендеді. Бір жыл бұрын бұл бағыттағы көрсеткіш 48,4 пайыз болған еді, – деді Ақылжан Баймағамбетов.
Ұлттық банк төрағасының орынбасары елде ұзақмерзімді несиелер 6,5 пайызға өсіп, 11,8 трлн теңгеге жеткенін, ал қысқамерзімді несиелер 2,7 пайыздық өсімді көрсетіп, 2 трлн теңгеге жеткенін айтты.
Бір айта кетерлігі, соңғы бес жылда ел экономикасындағы банктердің рөлі төмендеп бара жатқаны байқалады. Мемлекет тарапынан қаржылай көмек шаралары жасалғанына қарамастан, ІЖӨ-дегі банктердің активтері 40 пайызға дейін кеміген. Керісінше, проблемалық қарыздардың көлемі ұлғайып бара жатыр. Банктердің тарапынан бизнес үшін қолжетімді қаражат ұсыну тетіктері жетілдіруді қажет етеді.