Жиынға Жамбыл облысының әкімі Бердібек Сапарбаев арнайы қатысып, өзінің пікірін білдірді. "Нұротандықтар әрқашан азаматтарға жақын болуға, қиын уақытта қолдау көрсетіп, көмектесуге тырысып келеді. Бұған дейін партия "Кедергісіз келешек", "Бақытты отбасы", "Ардагерлерді ардақтайық" акцияларын өткізген болатын. "Біз біргеміз!" олардың жалғасына айналды. Еріктілердің арқасында акция ауқымы кеңейе түсті. Қарттарға ерекше қамқорлық қажет. Осы орайда жас белсенділер оларға тамақ пен дәрі-дәрмектерді жеткізіп беріп, үй шаруашылығына қолғабыс жасауда. Ерікті-дәрігерлер медициналық көмек көрсетуде. Бұл қазақстандықтардың отандастарын қиын жағдайға қалдырмайтындығының және әрқашан көмек қолын созуға дайын екендігінің дәлелі", деді Бердібек Сапарбаев.
Аталған акция Елбасының бастамасымен елде төтенше жағдай кезінде мұқтаж жандарға көмек көрсету мақсатында қолға алынған болатын. "Birgemiz – Jambyl oblysy" қоғамдық қорынан көмек көрсетудің бірінші және екінші кезеңдері бойынша 838 миллион теңге бөлінген. Бұл қаражатқа 16,7 мың адамға қолдау көрсетілген. Ал, үшінші кезең бойынша Байзақ, Жамбыл, Мойынқұм, Сарысу, Талас және Шу аудандары бойынша 10,2 мың адам қамтылып, оларға 511 миллион теңгенің көмегі көрсетілген. Облыс бойынша барлығы 27 мың жамбылдыққа 50 мың теңгенің біржолғы төлемі ұсынылған. Енді ағымдағы жылдың шілде айында төртінші кезең басталады. Аталған кезең аясында 337 миллион теңге көлемінде 6,7 мың тұрғынға көмек көрсету жоспарлануда. Сондай-ақ, 14286 отбасын бірінші кезектегі қажетті азық-түлікпен қамтамасыз ету үшін 293 миллион теңге бөлінген. Бұл жұмыстардың барлығы еріктілердің арқасында сәтті атқарылған. Сонымен қатар, Nur Otan партиясының аудандық филиалдарының жанынан еріктілер қозғалысы құрылып, оған игі іске атсалысуға ынталы азаматтар тартылған. Олар азық-түлік себеттерін тиісті мекен-жайлар бойынша жеткізіп беруді, жәрдемақы алуға ниеттілердің тізімін әзірлеуді ұйымдастырып, тұрғындарға коронавирустық инфекцияның алдын алу туралы ақпараттық парақшалар таратты.
"Қазақ халқында асар деген дәстүр бар. Онда адамдар бірігіп, үлкен жұмыстарды шынайы ниетпен және ақысыз жұмыла орындайды. Көшпелілер ежелден-ақ бір-біріне және әлсіздерге қолұшын созып, бірге үйлер салып, түрлі іс-шаралар ұйымдастырған. Бірігіп қана ауқымды тірліктерді тындыра алатындықтарын әу бастан түсінген. Сол сияқты бүгінгі таңда еріктілердің бірлік, қайырымдылық және мейірімділік қағидаларын басшылыққа алуы қуантады. Бұл ұрпақтар сабақтастығының жарқын көрінісі. Жас буынды еріктілер қозғалысына одан әрі тарта түсу үшін "Жас Ұлан" және "Жас Қыран" балалар мен жасөспірімдер ұйымдарының және "Жас Отан" Жастар қанатының қызметіне жаңа серпін беру керек», деді Бердібек Сапарбаев. Жиын барысында еріктілер де Елбасы Нұрсұлтан Назарбаевқа артқан сенімі үшін алғыстарын білдірді. Ал, Nur Otan партиясы облыстық филиалы жанындағы "Jas Otan" жастар қанатының төрағасы Уәлихан Болатбек еріктілердің тәжірибесі туралы айта келе, Түркістан облысының Мақтаарал ауданындағы екі күндік сапарына ерекше атап өтті. Қиын жағдай кезінде 20 белсенді Мақтааралға 15 тонна гуманитарлық көмек жеткізген. Сонымен қатар, Жамбыл облыстық "Жібек жолы жастары" еріктілер қозғалысының төрағасы Аяулым Расылхан қазіргі қиындықтар жақсылыққа жаны құштар жастарды бір арнаға топтастырғанын атап өтті.
Жамбыл облысы
