Саясат • 26 Маусым, 2020

Үміткерлерге бөлінетін қаржы көлемі белгілі

5 рет көрсетілді

Орталық сайлау комиссиясының (ОСК) отырысы өтіп, онда Парламент Сенатының депутаттығына кандидаттың республикалық бюджет қаражатынан өтелетін шығыстарының мөлшерін белгілеу, кандидаттардың сайлау қорлары мәселелері қаралды.

Отырыста сөз алған Орталық сайлау комиссиясының төрағасы Берік Имашев 2020 жылғы 12 тамызға тағайындалған Парламент Сенатының депутаттарын сайлау жөніндегі сайлау науқанының барысымен қысқаша таныстырды.

«Биылғы 25 маусымдағы жағдай бо­йынша депутаттыққа 88 адам ұсынылды. Орташа алғанда бір депутаттық орынға 5 адам үміткер болып отыр», деп атап өтті Б.Имашев.

Отырыста Орталық сайлау комис­сиясының хатшысы Сәбиля Мұстафина баяндама жасады. Оның айтуынша, мемлекет кандидаттарға бұқаралық ақпарат құралдарында өз бағдарламаларын таныстыру үшін тең қаражат бөлінуі­не кепілдік береді. Кандидаттардың бағдарламаларын таныстыруға телеарналар үшін 10 минут, радиолар үшін 10 минут, мерзімді басылымдар мен желілік басылымдардағы жарияланым үшін екі мақала көлемінде мүмкіндік беріп отыр.

Сондай-ақ республикалық бюджет қара­жатынан кандидаттардың сайлау ал­дындағы жариялы іс-шараларын өт­кізуге, үгіт материалдарын шығаруға арнал­­ған шығыстары мен көлік шығыс­тары Орталық сайлау комиссиясы белгі­ле­ген мөлшерде өтеледі», деді С.Мұстафина.

ОСК өз қаулысымен Парламент Сенатының депутаттығына кандидаттың республикалық бюджет қаражатынан өтелетін шығыстарын 450 000 теңге көлемінде белгілеген. Оның 300 000 теңгесі теледидардан, радиодан сөз сөйлеу және мерзімді баспа басылымдарында 2 мақала жариялау үшін, сайлау алдындағы көпшілік іс-шараларды өткізу және үгіт материалдарын шығару үшін 70 000 теңге, ал көлік шығындары үшін 80 000 теңге бөлек қарастырылған.

Сондай-ақ С.Мұстафина Парла­мент Сенатының депутаттығына канди­дат­тардың сайлау қорлары туралы ақпа­ратты түсіндірді. Баяндамадан белгілі болғандай, кандидаттың меншікті қаражатының жалпы сомасы заңнамамен белгіленген ең төменгі жалақыдан екі жүз есе мөлшерден аспауы тиіс, яғни бұл 8 500 000 теңгені құрайды. Соны­мен бірге басқа да азаматтар мен ұйым­дардың көрсететін қолдауы заңнама­да белгіленген ең төменгі жалақы мөл­шерінен бес жүз еседен аспауы тиіс, ал бұл 21 250 000 теңге.

ОСК төрағасы Б.Имашев «Сенат депу­тат­тарының жанама сайлауын өткізу кезінде қазіргі заманғы ақпарат­тық тех­нологияларды қолдану сайлау про­це­сінің ашықтығы мен жариялы­лы­ғын қамтамасыз етеді», деп атап өтті.

 

Соңғы жаңалықтар

Италияда тоғыз жүлде алдық

Спорт • Бүгін, 10:10

Әр сала үздіктеріне құрмет танытты

Аймақтар • 05 Наурыз, 2021

Бағдат Мусин Шымкентке барды

Аймақтар • 05 Наурыз, 2021

Ұқсас жаңалықтар